ភ្នំពេញ ៖ ជនបរទេសម្នាក់ត្រូវបាននគរបាលការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលខេត្តសៀមរាប នគរបាល រាជធានីភ្នំពេញ សហការគ្នាចាប់ខ្លួនកាលពីថ្ងៃទី១៨ ខែតុលា ឆ្នាំ២០១៩ នៅចំណុចមុខអាគារ The Brigh (ខាងត្បូងស្ថានទូតអូស្ត្រាលី) រាជធានីភ្នំពេញពាក់ព័ន្ធនឹងករណីការទិញពេស្យាចារលើកុមារ ប្រព្រឹត្តទៅកាលពីអំឡុងខែឧសភា ឆ្នាំ២០១៩ នៅខេត្តសៀមរាប ។
សកម្មភាពចាប់ខ្លួននេះធ្វើតាមដីកាបញ្ជាឲ្យចូលខ្លួន របស់អយ្យការអមសាលាដំបូងខេត្តសៀមរាបដោយសារជនបរទេសរូបនេះរត់គេចខ្លួន។
នគរបាលស្នងការដ្ឋាននគរបាលរាជធានីភ្នំពេញបានឲ្យដឹងថា ជនបរទេសនេះ មានឈ្មោះ រ៉ូម៉ានបាក់ទិហ្គ(ROMAN BAK TIGZIH) ភេទប្រុស អាយុ ៣០ឆ្នាំ ជនជាតិ រុស្ស៊ី មិនមានលិខិតឆ្លងដែនជាប់ខ្លួន។
បច្ចុប្បន្ន ជនសង្ស័យរូបនេះ ត្រូវបានឃាត់ខ្លួនបណ្តោះអាសន្ន នៅស្នងការដ្ឋាននគរបាលខេត្តសៀមរាប ដើម្បីរៀបចំកសាងសំណុំរឿង បញ្ជូនទៅសាលាដំបូងខេត្ត ចាត់ការបន្តតាមនីតិវិធី ៕
