ខេត្តកណ្ដាល ៖ មន្ត្រីនគរបាលខេត្តកណ្តាលម្នាក់ត្រូវបានស្ត្រីរងគ្រោះជាប្រពន្ធមិនទាន់រៀបការ ដាក់ពាក្យបណ្តឹងទៅលោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្ត ពីបទមនុស្សឃាតដោយចេតនា និងហិង្សាមានស្ថានទម្ងន់ទោស ។
ពាក្យបណ្តឹងរបស់នារីរងគ្រោះ ដែលកាសែតទទួលបាន កាលពីថ្ងៃទី១៩ ខែតុលា ឆ្នាំ២០១៩នេះបានឲ្យដឹងថា៖ ស្ត្រីរងគ្រោះឈ្មោះ ស៊ាង ស្រីល័ក្ខ អាយុ២៦ឆ្នាំ មានទីលនៅបច្ចុប្បន្នភូមិសុកុំផ្ញើ ឃុំគងជ័យ ស្រុកអូរាំងឪ ខេត្តត្បូងឃ្មុំ បានប្តឹងឈ្មោះ ជិន ជឿន ភេទប្រុស ជាមន្ត្រីបម្រើការងារនៅស្នងការនគរបាលខេត្តកណ្តាល ផ្នែកបុគ្គលិក មានទីលំនៅភូមិកោះគរ ឃុំរកាខ្ពស់ ស្រុកស្អាង ខេត្តកណ្តាល ។ស្ត្រីរងគ្រោះបានរៀបរាប់ថា កាលពីថ្ងៃទី១៤ តុលា ឆ្នាំ២០១៩ វេលាម៉ោង១០ និង៣០នាទីយប់ ឈ្មោះ ជិន ជឿន ដែលជាប្ដីរស់នៅដំបូលផ្ទះតែមួយ (ដោយមិនទាន់បានរៀបការ) បានប៉ុនប៉ងធ្វើឃាត និងហិង្សាមានស្ថានទម្ងន់មកលើនាង បណ្តាលឱ្យរលូតកូននៅក្នុងផ្ទៃ ដែលកំពុងពរពោះ៤ខែ។
នារីរងគ្រោះ ស្នើសុំលោកស្នងការដ្ឋាននគរបាល ខេត្តកណ្តាលអ៊ាវចំរើនដែលជាមេកើយមេត្តាជួយរកយុត្តិធម៌ និងចាត់វិធានការតាមផ្លូវច្បាប់ ។ នៅពុំទាន់សុំការបញ្ជាក់ពីលោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាលបានទេ ៕
