ភ្នំពេញ ៖ យោងតាមចំណារឯកភាពរបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា នៅថ្ងៃទី១៧ ខែតុលា ឆ្នាំ២០១៩ទីស្ដីការគណៈរដ្ឋមន្ដ្រី បានចេញស.ជ.ណថ្មីមួយចុះហត្ថលេខាដោយលោក ហ៉ីង ថូរ៉ាក់ស៊ីរដ្ឋលេខាធិការ ធ្វើការនិរាករណ៍ស.ជ.ណចាស់ ស្ដីពីការដោះដូរទីតាំងដី អគារផ្នែករដ្ឋបាលព្រៃឈើ ខេត្តកំពង់ស្ពឺ ដែលមានផ្ទៃដីសរុបចំនួន៣,៤០៨ម៉ែត្រការ៉េ។
សូមបញ្ជាក់ថាកាលពីថ្ងៃទី០៥ ខែសីហា ឆ្នាំ២០១៩ ទីស្ដីការគណៈរដ្ឋមន្ដ្រី បានចេញស.ជ.ណមួយចុះហត្ថលេខាដោយលោកខូចឃុនហួរដ្ឋលេខាធិកា អនុញ្ញាតឲ្យក្រុមហ៊ុន ភី អេនឡេន ឌីវេឡុបម៉ឺន ឯ.ក ធ្វើការដោះដូរទីតាំងដី អគារផ្នែករដ្ឋបាលព្រៃ ឈើកំពង់ស្ពឺ ដែលមានផ្ទៃដីសរុបចំនួន ៣,៤០៨ម៉ែត្រការ៉េ ស្ថិតនៅភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ និងទីតាំងដីឃ្លាំងដាក់សម្ភារខាងកើតផ្លូវ ស្ថិតនៅភូមិក្រាំងពលទេព ឃុំរកាធំ ក្រុងច្បារមន ខេត្តកំពង់ស្ពឺ ដែលមានផ្ទៃដីនៅសល់ ចំនួន២,៨០១ម៉ែត្រការ៉េ។
គួរជម្រាបថាទោះជាមានការផ្អាក់ការលកដូចក៏ដោយក៏ ទាំងមន្ដ្រីរដ្ឋបាលព្រៃឈើ និងមន្ដ្រីមន្ទីរកសិកម្ម បានអំពាវនាវដល់ថ្នាក់ដឹកនាំ និងអង្គភាពប្រឆាំងអំពើពុករលួយ បើកការស្រាវជ្រាវដើម្បីឈានទៅដល់ការចាត់វិធានការចំពោះមន្ដ្រីពាក់ព័ន្ធ ដែលរួមគ្នាផ្ដើមលួចលក់ ឬដោះដូរទីតាំងអង្គភាពរបស់រដ្ឋ នាំឲ្យមានការរិះគន់ជាបន្ដបន្ទាប់ផងកុំឲ្យថ្ងៃក្រោយមានមន្ត្រីផ្សេងៗទៀងចេះតែហ៊ានធ្វើដោយមិនមានការដេញថ្លៃជាសាធារណៈ ចឹង៕
