ភ្នំពេញ ៖ អាជ្ញាធរខណ្ឌឫស្សីកែវដឹកនាំដោយលោកជាពិសីអភិបាលខណ្ឌ បានចុះវាស់វែងដីក្នុងតំបន់អភិវឌ្ឍឫស្សីកែវ ខណៈប្រជាពលរដ្ឋ ចំនួន៨គ្រួសារបានប្រតិកម្ម សុំឲ្យសាលារាជធានីភ្នំពេញមានជំហរធ្វើការដោះស្រាយ ដើម្បីបញ្ចប់ទំនាស់ដ៏រ៉ាំរ៉ៃនៅតំបន់អភិវឌ្ឍន៍ឫស្សីកែវ ។
កាលពីវេលាម៉ោងប្រមាណ៨ព្រឹកថ្ងៃទី០៧ ខែតុលា ឆ្នាំ២០១៩ ដល់ថ្ងៃទី១៧ ខែតុលា ឆ្នាំ២០១៩ អាជ្ញាធរ ខណ្ឌឫស្សីកែវបានប្រើកម្លាំងប្រមាណជាង១០០នាក់ចុះទៅវាស់វែង និងការពារគ្រឿង ចក្រដើម្បីចាក់ដីឈូសឆាយស្ថាបនា ផ្លូវមួយចំនួន នៅក្នុងតំបន់អភិវឌ្ឍន៍ឫស្សីកែវ ដែលស្ថិតនៅភូមិ ទួលពពែ សង្កាត់ទួលសង្កែ២ខណ្ឌឫស្សីកែវ ។
តាមសេចត្តីជួនដំណឹងរបស់រដ្ឋបាលខណ្ឌឫស្សីកែវបានឲ្យដឹងថា ការចុះវាស់វែង បើកផ្លូវទាំងអស់នៅក្នុង តំបន់អភិវឌ្ឍន៍ ឫស្សីកែវធ្វើឡើងតាមស្មារតីអង្គប្រជុំរបស់រដ្ឋបាលរាជធានីភ្នំពេញនាថ្ងៃទី០៤ ខែតុលា ឆ្នាំ២០១៩ ។ រដ្ឋបាលខណ្ឌឫស្សីកែវបានរៀបចំផែនការចុះវាស់វែងបើកផ្លូវសាធារណៈទាំងអស់ក្នុងតំបន់អភិវឌ្ឍន៍ឫស្សីកែវស្ថិតក្នុងភូមិទួលពពែ សង្កាត់ទួលសង្កែទី២ និងភូមិស្ពានខ្ពស់ សង្កាត់គីឡូម៉ែត្រលេខ៦ ។ ចំពោះមុខរដ្ឋបាលខណ្ឌបានចុះវាស់វែង បោះបង្គោលកំណាត់ផ្លូវលេខ១៧២១ កំណាត់ផ្លូវលេខ១៧២៣ រួចរាល់ និងកំពុងចាក់ដី ឈូសឆាយបើកផ្លូវលេខ១៨០២ហើយនឹងបន្តចុះវាស់វែង បោះគោល និងឈូសឆាយបើកផ្លូវលេខ១៨០៤បន្តនៅថ្ងៃទី០៧ ខែតុលា ឆ្នាំ២០១៩នេះ ។ឡែកកំណាត់ផ្លូវលេខ ១៧២១ និងផ្លូវលេខ ១៧២៣ ដែលនៅសល់នឹងបន្តឈួសឆាយបើកផ្លូវបន្តទៀត ។
ប្រជាពលរដ្ឋ ៨គ្រួសារ បានឲ្យដឹងថា ពួកគាត់ ត្រេកអរណាស់ មិនជំទាស់នោះទេចំពោះអាជ្ញាធរ ដែល ឈូសឆាយបើកផ្លូវ តែសូមឲ្យ សាលារាជធានីភ្នំពេញដោះស្រាយឲ្យចប់សិន ដោយទទួលបាននូវគោលការឈ្នះឈ្នះ ទាំងអស់ គ្នា ។ ម្យ៉ាងទៀត រឿងទំនាស់ដីធ្លីនេះកំពុងតែប្តឹងផ្តល់គ្នា នៅតុលាការ ហើយ ត្រូវបានចៅក្រមកោះហៅជាលើកទី២ នៅថ្ងៃទី១៨ ខែតុលាខាងមុខនេះស្រាប់តែអាជ្ញាធរ បានជូនដំណឹង ឲ្យពួកគាត់រុះរើចេញភ្លាមៗៗតែម្តង ។
ប្រជាពលរដ្ឋ បានឲ្យដឹងទៀតថា ដីដែល ពួកគាត់បានរស់នៅ និងកាន់កាប់ដីតាំងពីឆ្នាំ ១៩៨២មកម្លេះ ដោយក្រោយមកត្រូវបានសាលាក្រុង បានយកដីរបស់គាត់ដាក់ជាតំបន់អភិវឌ្ឍន៍ ហើយ លក់ឲ្យមន្ត្រីរាជការ២០ម៉ឺនរៀល កាលពីជំនាន់រដ្ឋកម្ពុជា ហើយ ពួកគាត់បាននាំគ្នា តវ៉ា អស់រយះពេលជាង២០ឆ្នាំ មក ហើយ ត្រូវបានគណះកម្មាការដោះស្រាយវិវាទដីធ្លីដោះស្រាយ ប្រគល់ឲ្យ ពួកគាត់ខ្លះ១ឡូតិ៍ ,៣ឡូតិ៍ , ៤ឡូតិ៍ជាដើមតែពួកគាត់មិនយល់ព្រមព្រោះខ្លះមានដីជាង១ហិតតាបានតែ៤ឡូតិ៍ ទំហំ២០គុណ៣០ម៉ែត្រតែប៉ុណ្ណោះ ។
