ខេត្តបន្ទាយមានជ័យ ៖ ករណីគ្រោះថ្នាក់ ចរាចរណ៍មួយបានកើតឡើង នៅវេលាម៉ោង១០ និង១០នាទី ថ្ងៃទី១០ ខែសីហា ឆ្នាំ២០១៦ យោងតាមរបាយការណ៍របស់មូលដ្ឋានកងរាជអាវុធហត្ថ(ក្រុងប៉ោយប៉ែត)បានអោយដឹងថា ករណីគ្រោះថ្នាក់ចរាចរណ៍នេះ កើតឡើងរវាងរថយន្ត និងម៉ូតូ នៅលើកំណាត់ផ្លូវជាតិលេខ៥ ត្រង់ចំណុចមុខភោជណីយដ្ឋានអង្គរជាយដែន ស្ថិតក្នុងភូមិគីឡូម៉ែត្រលេខ៤ សង្កាត់ប៉ោយប៉ែត ក្រុងប៉ោយប៉ែត ខេត្តន្ទាយមានជ័យ។
លោកវរសេនីយ៍ត្រី ជា ដា មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានឲ្យដឹងបន្តថា អ្នកបើកបររថយន្តដឹកម៉ាស៊ីនច្រូតស្រូវពាក់ផ្លាក់លេខៈ 63-0429 ពណ៌សំបកឪឡឹកម៉ាកHino ជាជនជាតិថៃអត់ស្គាល់អត្តសញ្ញាណ បានរត់គេចខ្លួនបាត់ បើកមកពីទិសខាងលិចទៅកើតបត់ចូលក្រុមហ៊ុន បានទាក់ខ្សែកាមធ្វើអោយដួលបង្គោលភ្លើងមកប៉ះនឹងម៉ូតូមួយគ្រឿងបើកបរដោយឈ្មោះម៉ៃ សុគន្ឋី ភេទស្រី អាយុ32ឆ្នាំ រស់នៅភូមិក្បាស្ពាន២ ក្នុងភូមិឃុំកើតហេតុខាងលើ ដោយ ម៉ូតូម៉ាកហុងដាC125ពណ៌ខ្មៅពាក់ស្លាកលេខ បន្ទាយមានជ័យ1E.5236បើកពីកើតទៅលិច ដល់ចំណុចកើតហេតុក៏បង្កោលភ្លើងដួលមកប៉ះម៉ូតូ បោកខ្ទាត់មនុស្សចេញបណ្ដាលឲ្យអ្នកជិះពីក្រោយស្លាប់ភ្លាមៗម្នាក់ឈ្មោះហេង ម៉េងហួ ភេទស្រី អាយុ០៩ឆ្នាំនៅនឹងកន្លែង។
ក្រោយសមត្តកិច្ចធ្វើការវាសវែងចប់ សាកសពត្រូវបានឪពុក ម្តាយ យកទៅធ្វើបុណ្យតាមប្រពៃណី។ រីឯរថយន្ត និងម៉ូតូត្រូវបានយកទៅរក្សាទុកនៅអធិការដ្ឋាននគរបាលក្រុងប៉ោយប៉ែតរង់ចាំធ្វើការដោះស្រាយ៕