ភ្នំពេញៈ លោកសម រង្ស៊ីដែលអ្នកក្នុងស្រុកហៅថាទណ្ឌឹត មិនត្រូវបានអនុញ្ញាត ឲ្យឡើងថ្លែងសុន្ទរកថា នៅក្នុងមហាសន្និបាតលើកទី១៤១ របស់សហភាពអន្តរសភា (IPU) នៅមជ្ឈមណ្ឌល សាវ៉ា ( SAVA Centre ) នាទីក្រុងប៊ែលក្រាត សាធារណរដ្ឋស៊ែប៊ីទេ កាលពីថ្ងៃទី១៥ ខែតុលា ឆ្នាំ២០១៩ដោយសារមានការតវ៉ាពី គណៈប្រតិភូរដ្ឋសភា នៃទៅពីកម្ពុជាដឹកនាំដោយលោកស្រី ឃួន សុដារី អនុប្រធានទី២ នៃរដ្ឋសភា ។
ប្រភពពត៍មានឲ្យដឹងថាលោក សម រង្ស៊ី បានចុះឈ្មោះ ស្ថិតនៅលេខរៀងទី៦៤ នៃបញ្ជីឈ្មោះអ្នកចូលរួម ដោយបានប្រើឈ្មោះ អង្គការ Liberral Intertional ។ ទោះបីមិនបានឡើងថ្លែងតែ លោក សម រង្ស៊ី ប្រធានស្តីទីអតីតគណបក្សសង្គ្រោះជាតិបានអះអាងកាលពីថ្ងៃទី១៤ ខែតុលានៅក្នុងកិច្ចប្រជុំជាមួយតំណាងរាស្ត្រសេរីនិយមមកពីប្រទេសជាច្រើនឱ្យដឹងថា៖គាត់មានបំណងវិលចូលប្រទេសកម្ពុជាជាមួយពលករខ្មែរដោយដើរឆ្លងកាត់តាមព្រំដែនកម្ពុជា-ថៃ។ លោក សម រង្ស៊ី ក៏បានអំពាវនាវឱ្យប្រទេសសេរីផ្សេងៗដាក់សម្ពាធលើរដ្ឋាភិបាលកម្ពុជាកុំឱ្យប្រើប្រាស់អំពើហិង្សាលើរូបលោក និង អ្នកគាំទ្រពេលចូលមកប្រទេសកម្ពុជាផងដែរ។
សូមបញ្ជាក់ដែរថាលោកអគ្គស្នងការរងនគរបាលជាតិថៃបានថ្លែងថា សមត្ថកិច្ចប៉ូលីស (តម្រួតថៃ) បានប្រកាសពីវិធានការក្នុងការថែរក្សាសណ្តាប់ធ្នាប់នៅក្នុងប្រទេស ហើយចំពោះព័ត៌មានពី ទណ្ឌិតសម រង្ស៊ី អតីតមេដឹកនាំ CNRP នោះ បើសិនចង់ចូលទៅប្រទេសថៃ ធ្វើឲ្យប៉ះពាល់ដល់ប្រទេសថៃ ឬបញ្ហាសន្តិសុខនោះ សមត្ថកិច្ច នឹងមិនអនុញ្ញាតឲ្យធ្វើដំណើរចូលនោះទេ នេះបើតាមប្រភពពី MGR online ភាសាថៃ ដែលបានចេញផ្សាយនៅថ្ងៃទី ១៥ ខែតុលា ឆ្នាំ ២០១៩។ “សម រង្ស៊ី” ធ្វើដំណើរចូលមក ធ្វើឲ្យមានការប៉ះពាល់ដល់ប្រទេសថៃ ឬបញ្ហាសន្តិសុខនោះ ក៏នឹងពិចារណាថា មិនអនុញ្ញាតឲ្យធ្វើដំណើរចូលក្នុងប្រទេសថៃនោះទេ ។
មហាសន្និបាតអន្តរសភា បានប្រារព្ធធ្វើឡើង ក្រោមអធិបតីភាពលោក អាឡិចសាន់ដ័រ វូសីក (Aleksandar Vucic) ប្រធានាធិបតី នៃសាធារណរដ្ឋស៊ែប៊ី លោកស្រី កាប្រ៊ីយែលឡា គូអេវ៉ាស បារ៉ុន (Gabriela Cuevas Barron) ប្រធានសហភាពអន្តរសភា IPU លោកស្រី ម៉ាចា ហ្សកកូវិច (Maja Gojkovic) ប្រធានសភាស៊ែប៊ី និងលោកស្រី ថាតធីយ៉ាណា វ៉ាឡូវ៉ាយ៉ា (Tatiana Valovaya) អគ្គនាយិកា នៃការិយាល័យ អង្គការសហប្រជាជាតិ និងដោយមានការចូលរួម យ៉ាងច្រើន ពីគណៈប្រតិភូសភា ប្រទេសជាសមាជិក IPU ប្រមាណជាង ១.៧០០ នាក់ មកពី ១៤០ ប្រទេស។
ក្នុងនោះមានប្រធានសភា ៧០រូប អនុប្រធាន ៤០ រូប តំណាងរាស្ត្រ ៧០០ នាក់ ជាស្ត្រី៣០% និងវ័យក្មេង១៧% ព្រមទាំងតំណាងស្ថាប័នសំខាន់ៗ មានអង្គការសហប្រជាជាតិ អង្គការអន្តរជាតិ និងដៃគូសង្គមស៊ីវិល មកពីបណ្តាប្រទេស ពាសពេញពិភពលោក ជាច្រើនទៀត។សហភាពអន្តរសភា (IPU) ជាអង្គការនីតិប្បញ្ញត្តិធំមួយ បង្កើតឡើង ក្នុងឆ្នាំ១៨៨៩ ដែលមានសមាជិក ជាសភាមកពីរដ្ឋអធិបតេយ្យ ចំនួន ១៧៩ ។សភាកម្ពុជា ចូលជាសមាជិក IPU ក្នុងខែមេសា ឆ្នាំ១៩៩៧ នៅសន្និសីទអន្តរសភា លើកទី៩៧ នាទីក្រុងសេអ៊ូល សាធារណរដ្ឋកូរ៉េ ។
