ហុងគ្រី៖ នៅទីក្រុងប៊ូដាប៉េស ប្រទេសហុងគ្រីនារសៀលថ្ងៃទី១៥ខែតុលា ឆ្នាំ២០១៩ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានចុះ អនុស្សរណៈស្តីពី កិច្ចសហប្រតិបត្តិការពណិជ្ជកម្មរវាងសភាពាណិជ្ជកម្មកម្ពុជា ជាមួយសភាពាណិជ្ជកម្ម និងឧស្សាហកម្ម នៃប្រទេសហុងគ្រី ក្រោមអធិបតីភាពឯកឧត្តម ប៉ាន សូរស័ក្ដិរដ្ឋមន្ត្រី ក្រសួងពាណិជ្ជកម្មកម្ពុជា ។
អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជាបានថ្លែងឲ្យដឹងថា តាមរយៈការចុះកិច្ចព្រមព្រៀងថ្ងៃនេះ រំពឹងថានឹងជួយបង្កើនទំហំពាណិជ្ជកម្មប្រទេសទាំងពីរថែមទៀត ខណៈដែលបច្ចុប្បន្ន ការធ្វើពាណិជ្ជកម្មនៅមានចំនួនតិចតួចនៅឡើយ ពោលគឺចាប់ពីឆ្នាំ២០១៣ រហូតដល់ឆ្នាំពាក់កណ្តាលឆ្នាំ២០១៨ ទំហំពាណិជ្ជកម្ម ទ្វេភាគីកម្ពុជា-ហុងគ្រី មានចំនួនជាង ១៦លានដុល្លារអាមេរិកប៉ុណ្ណោះ។ ក្នុងនោះកម្ពុជា នាំចេញទៅហុងគ្រីមានទឹកប្រាក់ ១៣លានដុល្លារអាមេរិក និងនាំចូលមានទឹកប្រាក់ជាង ៣លានដុល្លារអាមេរិក។
សូមជម្រាបថា ពិធីចុះកិច្ចព្រមព្រៀងនេះ ត្រូវបានធ្វើឡើងស្របគ្នានឹងដំណើរទស្សកិច្ចនិងកិច្ចប្រជ៉ំស្តីពីទឹក របស់គណៈប្រតិភូ ជាន់ខ្ពស់កម្ពុជា ដឹកនាំដោយសម្តេចតេជោនាយករដ្ឋមន្ត្រី ហ៊ុន សែន ទៅកាន់សាធារណរដ្ឋហុងគ្រី បន្ទាប់ពីទស្សនកិច្ច នៅប្រទេសឆែករួច។
