ភ្នំពេញ ៖ លោកស្រីអូសាណៃម៉ៃកូ( Osanai Mieko)គឺជាស្ត្រីជាតិជប៉ុនម្នាក់ដែលជួយសង់សាលារៀនឲ្យកូនខ្មែរបានចំនួន ៣៤៧ខ្នង ដល់កម្ពុជាចាប់តាំងពីឆ្នាំ១៩៩៣មក។លោកស្រីអូសាណៃម៉ៃកូ( Osanai Mieko)បានកើតនៅថ្ងៃទី៨ ខែមករា ឆ្នាំ១៩៣០។ បច្ចុប្បន្នលោកស្រីមានអាយុ៨៨ឆ្នាំហើយ។
លោកយាយ អូសាណៃម៉ៃកូ( Osanai Mieko)ជាស្ថាបនិកអង្គការJAPAN TEAM OF YOUNG HUMAN POWER (JHP) ជាសកម្មជនមួយរូបតែងធ្វើអំពើសប្បុរសធម៌ជាច្រើនរាប់មិនអស់តាំងពីដឹងក្ដីរហូតដល់វ័យចាស់ជរា។ លោកយាយ Osanai Mieko ធ្លាប់បានជួយកសាងសាលារៀន កន្លែងជ្រោកកោន សម្រាប់ជនភៀសខ្លួនដោយសារសង្គ្រាមដូចជា ប្រទេសនៅក្នុងទ្វីបអាហ្វ្រិក នេប៉ាល់ ឡាវ ឥណ្ឌា អ៊ីរ៉ាក់ អាហ្វហ្គានីស្ថានជាដើម។
ក្នុងនោះកម្ពុជាជាប្រទេសសំខាន់មួយដែលលោកយាយ បានលះបង់ទាំងកម្លាំងកាយ កម្លាំងចិត្ត និងទឹកប្រាក់ជាច្រើនសន្ធឹកសន្ធាប់ដើម្បីជួយដល់ប្រជាជនខ្មែរ។មូលហេតុលោកយាយ Osanai Mieko ឲ្យដឹងថា ជប៉ុនក៏ដូចជាប្រទេសកម្ពុជាដែរ ការអភិវឌ្ឍប្រទេស គឺចាប់ផ្ដើមពីចំណុចសូន្យ។ ដូច្នេះអ្វីៗទាល់តែមានដៃគូ ពីមហាមិត្តជួយជ្រោមជ្រែងទើបការអភិវឌ្ឍប្រទេស មានការរីកចម្រើនទៅមុខបាន។ ជាក់ស្ដែងដូចជាប្រទេសកម្ពុជា បច្ចុប្បន្នមានការរីកចម្រើនច្រើន គួរជាទីចាប់អារម្មណ៍ បើប្រៀបធៀបពីមុនកម្ពុជាមានតែបាតដៃទទេនោះ។
ហេតុផលខាងលើនេះ ទើបអង្គការ JHP របស់លោកយាយបាន សម្រេចចិត្តមកជួយ ចូលរួមចំណែកកសាងនូវហេដ្ឋារចនាសម្ព័ន្ធមួយចំនួននៅកម្ពុជា ដូចជា៖ ជួយកសាងនូវសាលារៀន ផ្លូវ ប្រព័ន្ធទំនប់ការពារទឹកជំនន់ លូ ប្រព័ន្ធទឹកស្អាត អណ្ដូង ជាពិសេសជួយ ផ្ដល់ជាសំភារៈផ្សេងៗ ដែលប្រជាជនកម្ពុជាកំពុងត្រូវការ និងតម្រូវការចាំបាច់នាពេលបច្ចុប្បន្ននេះ។
អង្គការJHPជប៉ុនបានចាប់ផ្ដើមមកសាងសាលារៀននៅរាជធានីភ្នំពេញ ចាប់តាំងពីឆ្នាំ១៩៩៣ រហូត ដល់ឆ្នាំ១៩៩៨ទើបអង្គការ JHP ជប៉ុនបានបន្ដ ចាប់ផ្ដើមពង្រីកនៅទូទាំងប្រទេសរហូតមកដល់ឆ្នាំ២០១៨នេះ សរុបសាលារៀនដែលអង្គការលោកយាយបានកសាង ចំនួន៣៤៧ខ្នង ហើយថែមទាំងផ្ដល់ជាសម្ភារៈ បំពាក់នូវគ្រឿងបរិក្ខាររួចជាស្រេចហើយដែរ ។នៅខែសីហា ឆ្នាំ ១៩៩០ លោកយាយអូសាណៃ និង បុគ្គលិក ៦ រូបទៀតបានខិតខំដើម្បីជួយដល់ជនភៀសខ្លួនក្នុងជំរំប្រទេសស៊ូដង់ និងបង្កើតក្រុម JIRAC ឡើង។ ក្រុមនេះក៏បានជួយដល់ជនភៀសខ្លួនឃឺដ នៅព្រំដែនអ៊ីរ៉ាក់-អ៊ីរ៉ង់ក្នុងឆ្នាំ ១៩៩១។
នៅឆ្នាំ ១៩៩២ និង ១៩៩៣ JIRAC បានបង្កើតសកម្មភាពរំដោះនៅព្រំដែនកម្ពុជា ថៃ ដើម្បីជួយឲ្យជនភៀសខ្លួនកម្ពុជាត្រឡប់ទៅស្រុកកំណើតវិញ។ សកម្មភាពទាំងនេះបានធ្វើឲ្យក្រុមអ្នកស្រីអូសាណៃ ដឹងពីសារសំខាន់នៃការសាងសង់សាលារៀនសម្រាប់ក្មេងៗ។
ពេលនោះក្រុមការងារលោកស្រី អូសាណៃ បានបង្កើតអង្គការThe Cambodian Children’s School Construction Organization នៅថ្ងៃទី ១៥ កញ្ញា ១៩៩៣។ បន្ទាប់មកបានប្ដូរឈ្មោះអង្គការនេះទៅជា JAPAN TEAM OF YOUNG HUMAN POWER (JHP) និងបង្កើតប្រព័ន្ធសមាជិកនៅខែមេសា ឆ្នាំ ១៩៩៧។