ភ្នំពេញ៖ ក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ នឹងចាប់ផ្ដើមបើកជើងហោះហើរត្រង់ពីរាជធានីភ្នំពេញ ទៅខេត្តដាណាំង ប្រទេសវៀតណាម នៅចុងខែតុលា ឆ្នាំ២០១៩នេះ។
នេះបើតាមការថ្លែងលោក លីម កៅ អគ្គនាយករង នៃក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរនាព្រឹកថ្ងៃទី១២ ខែតុលា ឆ្នាំ២០១៩នេះ ក្នុងពិធីផ្សព្វផ្សាយពីសេវាកម្មថ្មីនេះ និងផ្តល់ព័ត៌មានថ្មីៗ ពីភាពទាក់ទាញរបស់ខេត្តដាណាំង ដែលជាគោលដៅទេសចរណ៍មួយ ក្នុងចំណោមគោលដៅទេសចរណ៍ផ្សេងទៀត ដែលមានទេសភាពស្រស់ស្អាត របស់ប្រទេសវៀតណាម។
លោក លីម កៅ បានថ្លែងថា «ក្នុងនាមជាក្រុមហ៊ុនអាកាសចរណ៍ជាតិ យើងបានវិវឌ្ឍន៍ខ្លួនជាបន្តបន្ទាប់ និងបានឈរជើងយូរជាងគេ (ជាង១០ឆ្នាំមកហើយ) និងឈានមុខទាំងផ្នែកសេវាកម្ម និងសុវត្ថិភាពក្នុងចំណោមក្រុមហ៊ុនអាកាសចរណ៍ដ៏ទៃទៀត»។លោកបានគូសបញ្ជាក់ថា នៅចុងឆ្នាំ២០១៩នេះ ក្រុមហ៊ុន នឹងសម្រេចគោលបំណងធំៗ ក្នុងផែនការពង្រីកជើងហោះហើរ ជាក់ស្តែងការតភ្ជាប់ជើងហោះហើរត្រង់ រវាងរាជធានីភ្នំពេញ និងខេត្តដាណាំងនេះ និងការមកដល់នូវយន្តហោះថ្មី បន្ថែមទៀតប្រភេទ Airbus-321 ដែលមានចំណុះ ២០៣កៅអី។
ចំពោះកាលវិភាគ ហោះហើររដូវកាលថ្មីឆ្នាំ២០១៩ ក្រុមហ៊ុនអាកាសចរណ៍ជាតិ នឹងបង្កើនជើងហោះហើរក្នុងស្រុកដូចជា៖
* បង្កើនជើងហោះហើរពី ០៣ ទៅ ០៥ ជើងក្នុងមួយថ្ងៃរវាងរាជធានីភ្នំពេញ និង ខេត្តសៀមរាប
* បង្កើនជើងហោះហើរពី ០៣ ទៅ០៥ ជើងក្នុងមួយសប្តាហ៍រវាងរាជធានីភ្នំពេញ និងខេត្តព្រះសីហនុ ហើយប្តូរប្រភេទយន្តហោះពី ATR-72 ចំណុះ ៦៨កៅអី ទៅ Airbus ចំណុះ១៨០កៅអី សម្រាប់ជើងហោះហើររ វាងខេត្តសៀមរាប និង ខេត្តព្រះសីហនុ។
លោកកៅបន្ដទៀតថា ក្រៅពីនេះទៀត ជើងហោះហើរអន្តរជាតិមួយចំនួន ដូចជាជើងហោះហើរ ពីខេត្តព្រះសីហនុ ទៅកាន់ទីក្រុងហូជីមិញ នឹងបង្កើនចំនួនជើងហោះហើរពី ០៧ ទៅ១១ជើង រីឯជើងហោះហើរ ពីខេត្តសៀមរាប ទៅកាន់ខេត្តដាណាំង នឹងធ្វើការហោះហើរជារៀងរាល់ថ្ងៃ ដោយត្រូវប្តូរប្រភេទយន្តហោះ ATR-72 ចំណុះ៦៨កៅអី មកប្រើយន្តហោះ Airbus-320 ចំណុះ១៨០ កៅអីវិញ។
ជើងហោះហើររវាង រាជធានីភ្នំពេញ និងទីក្រុងដាណាំង ចំនួន០៥ ជើងក្នុងមួយសប្តាហ៍ ចាប់ពីថ្ងៃទី២៧ ខែតុលា ឆ្នាំ២០១៩ រហូតដល់ថ្ងៃទី៣១ ខែធ្នូ ឆ្នាំ២០១៩ ហើយចាប់ពីថ្ងៃទី០១ ខែមករា ឆ្នាំ២០២០នេះតទៅ នឹងមានហោះហើររាល់ថ្ងៃ។ នេះជាការគូសបញ្ជាក់បន្ថែម របស់លោក លីម កៅ អគ្គនាយករងនៃក្រុមហ៊ុនអាកាសចរណ៍ជាតិ កម្ពុជា អង្គរ អ៊ែរ៕
