ធនាគារជាតិកាណាដាកាន់កាប់ភាគហ៊ុនធនាគារ ABA នៅកម្ពុជា ១០០ភាគរយហើយ!
កម្ពុជា ៖ សារព័ត៌មាន BNN Bloomberg របស់ប្រទេសកាណាដា បានចុះផ្សាយឲ្យដឹងថា ធនាគារជាតិប្រទេសកាណាដាបាន ទិញយកភាគហ៊ុននៅសល់ ១០% នៅក្នុងធនាគារ ABA ក្នុងតម្លៃ ៨៣,៥លានដុល្លារអាមេរិកដែលធ្វើឲ្យ ធនាគារជាតិកាណាដាបានបង្កើនភាពជាម្ចាស់របស់ខ្លួននៅក្នុងធនាគារ ABA រហូតដល់ ១០០% តែម្តង។
ធនាគារជាតិកាណាដា បានក្លាយជាភាគហ៊ុនិករបស់ធនាគារ ABA នៅកម្ពុជា នៅក្នុងឆ្នាំ២០១៤ ដោយបានទិញយកចំណែកភាគហ៊ុនដំបូងចំនួន ១០%។បន្ទាប់មកក៏បានបង្កើនការទិញយកចំណែកភាគហ៊ុនបន្ថែមរហូតដល់ ៤២% នៅក្នុងឆ្នាំ២០១៥ និងបង្កើនដល់ ៩០% នៅក្នុងឆ្នាំ២០១៦។
នៅក្នុងប្រកាសព័ត៌មាន លោក Askhat Azhikhanov នាយកប្រតិបត្តិរបស់ធនាគារ ABA បាននិយាយថា “ប្រតិបត្តិការចុងក្រោយរបស់ធនាគារជាតិកាណាដា បង្ហាញយ៉ាងច្បាស់ពីទំនុកចិត្តខ្ពស់របស់ធនាគារ មកលើ ABA និងមកលើទីផ្សារធនាគារនៅក្នុងប្រទេសកម្ពុជា។”
គិតមកត្រឹមថ្ងៃទី៣០ ខែកញ្ញា ឆ្នាំ២០១៩ ទ្រព្យសកម្មរបស់ធនាគារ ABA មានចំនួន ៤,១ប៊ីលានដុល្លារ។ ធនាគារផ្តល់សេវាជូនដល់អតិថិជនជាង ៦៥០.០០០នាក់ តាមរយៈបណ្តាញសាខាចំនួន ៧០សាខា កន្លែងស្វ័យសេវាធនាគារជាង ៥៥០កន្លែង និងប្រព័ន្ធធនាគារអនឡាញនិងធនាគារតាមទូរស័ព្ទជាច្រើនទៀត៕