រតនគិរី៖ ជនដៃដល់ដែលបានបាញ់សម្លាប់ ជនរងគ្រោះនៅកណ្ដាលក្រុងបានលុង ក្នុងហាងកាហ្វេមួយកន្លែងបង្កឲ្យមានការភ្ញាក់ផ្អើលយ៉ាងខ្លាំងដែលត្រូវសមត្ថកិច្ចចាប់ខ្លួនបានក្រោយប្រព្រឹត្តអំពើឃាតកម្ម រយៈពេលជាងមួយម៉ោងនោះ គឺជាមន្ដ្រីនគរបាល ហើយក៏ជាមិត្តភ័ក្រជាមួយជនរងគ្រោះទៀតផង។
ស្នងការនគរបាលខេត្តរតនគិរីលោកឧត្តមសេនីយ៍ផ្កាយពីរ យិន ចំណាន បានប្រាប់សារព័ត៌មាន ឲ្យដឹងថាជនដៃដល់ត្រូវបានកម្លាំងនគរបាលរបស់លោកដឹកនាំដោយ លោកឧត្តមសេនីយ៍ត្រី ផែនឌីណាស្នងការរងនគរបាលទទួលផែនព្រហ្មទណ្ឌតាមចាប់ខ្លួនបាននៅវេលាម៉ោង១០៖៤៥នាទី នៅរម្មណីយដ្ឋានបឹងយក្សឡោម ក្រុងបានលុង ពោលក្រោយធ្វើសកម្មភាពក្នុងរយៈពេលជាង១ម៉ោងនិងដកហូតរថយន្ដរបស់ជនដៃដល់ដែលបើកទៅធ្វើសកម្មភាពមួយគ្រឿងផងដែរ ម៉ាក NISSAN ពណ៌ស ពាក់ស្លាកលេខ 2N-5011។
លោកឧត្តមសេនីយ៍ស្នងការ បានបញ្ជាក់ទៀតថា ជនដៃដល់រូបនេះ ឈ្មោះ នួន មករា អាយុ៣១ឆ្នាំ ជាមន្ដ្រីនគរបាលការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តរតនគិរី។ ដោយមិនចង់បញ្ជាក់លម្អិត លោកស្នងការ បានអះអាងត្រឹមថា ការសម្លាប់ជនរងគ្រោះដោយការបាញ់ប្រហារនេះ ផ្ដើមចេញពីរឿងគំនុំផ្ទាល់ខ្លួន។
ជនដៃដល់ នួន មករា ស្ថិតក្រោមការសួរនាំ របស់នគរបាលព្រហ្មទណ្ឌ នៅស្នងការដ្ឋាននគរបាលខេត្តរតនគិរីដើម្បីកសាងសំណុំរឿងបញ្ជូនទៅកាន់តុលាការផ្ដន្ទាទោសទៅតាមផ្លូវច្បាប់។
សូមបញ្ជាក់ថា លោក ផន ទុំដែលមានតួនាទីជានាយរងការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តរតនគិរីពេលកំពុងអង្គុយផឹកកាហ្វេ នៅក្នុងហាងមួយកន្លែង ភូមិអូរកន្សែងសង្កាត់បឹងកន្សែង ក្រុងបានលុង នៅវេលាម៉ោងប្រមាណ០៩៖២០នាទីព្រឹកមិញ បានរង់នូវការបាញ់ប្រហារ មួយគ្រាប់ចំក្បាល ពីសំណាក់ជនដៃដល់បណ្ដាលឲ្យប្រកាច់ នៅកន្លែងកើតហេតុ ហើយសាក្សី ព្រមទាំងសមត្ថកិច្ចបានអះអាងដូចគ្នាថា ជនរងគ្រោះបានស្លាប់នៅពេលនោះ។
ប៉ុន្ដែមួយសន្ទុះក្រោយមក ក្រុមគ្រួសាររបស់ជនរងគ្រោះដែលបានធ្វើដំណើរមកដល់ទីតាំងកើតហេតុនោះ នៅតែមិនអស់ចិត្ត និងបានដឹកជនរងគ្រោះឈ្ពោះទៅមន្ទីរពេទ្យនៅប្រទេសវៀតណាម៕
ដោយ ៖ ចាបសំអាន
