ភ្នំពេញ ៖ បុរសម្នាក់បានទទួលមរណភាព នាវេលាម៉ោង ៩:៤៥នាទីយប់ ថ្ងៃទី១ ខែតុលា ឆ្នាំ២០១៩ នៅមន្ទីរពេទ្យរុស្សី ដោយសារតែដកធ្មេញថ្កាមទាល់នៅមន្ទីរពេទ្យអង្គឌួងដោយជនរងគ្រោះបានអះអាងថាគ្រូពេទ្យសម្អាតមិនបានដិតដល់បណ្តាលឲ្យមានមេរោគ។
តែអ្វីដែលគួរឲ្យរំជួលចិត្តនិងកោតសរសើរចំពោះជនរងគ្រោះគឺមុនពេល ទទួលមរណភាពគាត់បានផ្តាំផ្ញើទៅកាន់ប្អូនប្រុសរបស់ខ្លួនឲ្យកលុយដែលលក់ផ្ទះបានទៅបរិច្ចាគជូនមន្ទីរពេទ្យគន្ធបុប្ផា និងដល់អង្គការកុមារកំព្រា។
ហ្វេសប៊ុកមួយឈ្មោះឆាយបញ្ញាសិទ្ធ( Chhay Panha Sith )ជាមិត្តភក្តិរបស់ជនរងគ្រោះបានសរសេររៀបរាប់ថា៖ “សូមមហាសរសើរទឹកចិត្តសប្បុរសសំលាញ់កែវរតនា( Keo Ratana) នៅនាទីចុងក្រោយដែលខ្លួនមុនស្លាប់បន្តិច បានផ្តាំអោយប្អូនប្រុសរបស់ខ្លួន ត្រូវយកលុយដែលនឹងលក់ផ្ទះរបស់ខ្លួនចំនួន ៥០០០$ ជូនមន្ទីរពេទ្យគន្ធបុប្ផា និង ២០០០$ ជូនដល់អង្គការក្មេងកំព្រា។នៅនាទីចុងក្រោយហើយនៅតែគិតដល់អ្នកដទៃ ជាងយើងគ្រប់ៗគ្នាដែលមានសុខភាពល្អ និងរស់មានជីវិត។ សូមវិញ្ញាក្ខនសំលាញ់ទទួលបានកុសលល្អ និងចាប់ជាតិក្រោយមានសុខភាពល្អ អាយុវែង”។
គួររំលឹកថាកាលពីថ្ងៃទី២៩ ខែសីហា ឆ្នាំ២០១៩ ជនរងគ្រោះបានបង្ហោះសាររៀបរាប់ថាខ្លួនបានទៅវះកាត់ដកធ្មេញថ្កាមទាល់ ដោយមានអ្នកគ្រូពេទ្យជាស្ត្រីវ័យចំណាស់ជាអ្នកធ្វើការវះកាត់ ហើយជនរងគ្រោះបានលើកឡើងថាគ្រូពេទ្យពុំបានសំអាតអោយបានដិតដល់ទេ សូម្បីសាច់ដែលនៅសល់កន្លែងផ្សេងក៏មិនកាត់ចេញដែរ រហូតដល់មេរោគឆ្លង ។
យ៉ាងណាមិញជនរងគ្រោះបានទទួលមរណភាពដោយសារតែដកធ្មេញថ្កាមទាល់នេះ មានមហាជនជាច្រើនបានសម្តែងការសោកស្តាយ និងរិះគន់យ៉ាងចាស់ដៃមកលើគ្រូពេទ្យដែលពុំធ្វើការបានម៉ត់ចត់ ក្នុងនោះក៏មានការសំណូមពរឲ្យខាងមន្ទីរពេទ្យចេញមុខបកស្រាយផងដែរ៕
