ភ្នំពេញ៖ឡានក្រុង១២០គ្រឿងត្រូវបានសាលារាជធានីបញ្ចេញដឹកប្រជាពលរដ្ឋទៅលេងស្រុកហ្វ្រីៗក្នុងឱកាសបុណ្យភ្ជុំបិណ្ឌ។យោងតាម ទំព័រហ្វេសប៊ុកផេកផ្លូវការរបស់ រដ្ឋាករស្វយ័តដឹកជញ្ជូនសាធារណៈរថយន្តក្រុង បានផ្សាយនាថ្ងៃទី ២៥ ខែកញ្ញា ឆ្នាំ២០១៩នេះអំពី ឡានក្រុងសាធារណៈជាច្រើនគ្រឿង បានត្រៀំមជាស្រេចសម្រាប់ បម្រើដល់ប្រជាពលរដ្ឋនៅក្នុងរាជធានីភ្នំពេញក្នុងការធ្វើដំណើរទៅកាន់បណ្តាខេត្តនានា ដោយឥតគិតថ្លៃចាប់ពីថ្ងៃទី ២៦ ដល់ថ្ងៃទី ៣០ ខែកញ្ញា ឆ្នាំ ២០១៩ នៃអំឡុងពេលឱកាសបុណ្យភ្ជុំបិណ្ឌប្រពៃណីជាតិខ្មែរនេះ ។
ក្រៅពីឡានក្រុងក្រសួងសាធារណការ និងដឹកជញ្ជូនក៏បានបញ្ជាក់ឲ្យដឹងដែរថា៖ ចាប់ពីថ្ងៃទី២៥ ដល់ថ្ងៃទី៣០ ខែកញ្ញា ឆ្នាំ២០១៩ បងប្អូនប្រជាពលរដ្ឋអាចជិះរថភ្លើងដោយឥតគិតថ្លៃទៅលេងស្រុកកំណើតក្នុងឱកាសពិធីបុណ្យភ្ជុំបិណ្ឌ។
ខ្សែរថភ្លើងដែលត្រូវធ្វើដំណើរនោះមានបីខ្សែ គឺ ភ្នំពេញ ទៅ ពោធិ៍សាត់ ដោយផ្តើមចេញដំណើរពីភ្នំពេញនៅម៉ោង ៧ និង៣០នាទីព្រឹក ទៅដល់នៅម៉ោង១២ និង៥០នាទីថ្ងៃត្រង់ ហើយត្រឡប់មកពីពោធិ៍សាត់វិញ នៅម៉ោង ១ និង២០នាទីរសៀល មកដល់ភ្នំពេញ នៅវេលាម៉ោង ៦ និង៤០នាទីល្ងាច។
ប៉ោយប៉ែត-ពោធិ៍សាត់ ចេញដំណើរពីប៉ោយប៉ែត នៅវេលាម៉ោង ៧ព្រឹក មកដល់ពោធិ៍សាត់ នៅវេលាម៉ោង ១រសៀល ហើយចេញពីពោធិ៍សាត់ នៅវេលាម៉ោង ១ និង៣០នាទីរសៀល ដល់ប៉ោយប៉ែត វេលាម៉ោង ៦ និង៣០នាទីល្ងាច។
ភ្នំពេញ-ព្រះសីហនុ ខ្សែទី១ ចេញដំណើរពីភ្នំពេញ ម៉ោង៧ព្រឹក ឆ្លងកាត់ស្ថានីយ៍តាកែវ និងកំពត ហើយទៅដល់ម៉ោង ២រសៀល, ខ្សែទី២ ចេញពីភ្នំពេញ ម៉ោង៧យប់ ហើយទៅដល់ខេត្តព្រះសីហនុ នៅម៉ោង ១០យប់។ សម្រាប់ការចេញពីខេត្តព្រះសីហនុ នៅម៉ោង៧ព្រឹក មកដល់ភ្នំពេញម៉ោង២រសៀល និងម៉ោង ៤ល្ងាច មកដល់ភ្នំពេញម៉ោង ១១ និង៣០នាទីយប់៕
