ភ្នំពេញ៖ លោក ស៊ិន បូណាអតីតចៅសង្កាត់កោះដាច់ មកពីគណបក្សសង្គ្រោះជាតិ បានរងរបួសធ្ងន់រហូតបាក់ដៃខាងឆ្វេងកាលពី ម៉ោងប្រមាណ៩ព្រឹកថ្ងៃទី២៥កញ្ញាពេលធ្វើដំណើរតាមបណ្តោយផ្លូវជាតិលេខ៦Aកំពុងសម្រាកព្យាបាលនៅមន្ទីពេទ្យឯកមួយម្តុំស្ពានជ្រោយចង្វារ។
លោក ស៊ិន បូណាបានរៀបរាប់ថា៖ «ពេលមានរឿង ខ្ញុំជិះម៉ូតូម៉ាកស្មាស តែអ្នកវាយមានគ្នាពីរនាក់ជិះតាមពីក្រោយគេជិះម៉ូតូអាវេវ ហើយមានសៀតកាំភ្លើងខ្លីនៅចង្កេះទៀត តែមើលអត់ស្គាល់ទេ ព្រោះគេពាក់ម៉ាស់ផង ពាក់មួកសុវត្ថិភាពផង។ ពួកវាមកដល់ វាធាក់ម៉ូតូខ្ញុំផ្តួល ហើយវាវាយយកៗ ខ្ញុំគេចអត់ទាន់ ដល់យកដៃរងទៅបាក់ដៃបណ្តោយ ហើយវាក៏ឡើងម៉ូតូទៅបាត់»។
ករណិយ៍លួចវាយនេះលោក លោក ស៊ិន បូណាឲ្យកាសែតដឹងថាវាជារឿងដែលមានការរៀបចំទុកជាមុន ព្រោះមុនកើតហេតុប្រមាណ១សប្តាហ៍មានជនមិនស្គាល់មុខប៉ុន្មាននាក់បានលបចូលមកក្នុងបរិវេណផ្ទះលោក លួចថតស្លាកលេខរថយន្ត និងម៉ូតូ។ អតីតចៅសង្កាត់មកពីគណបក្សប្រឆាំងដែលជាប់ឆ្នោតនាឆ្នាំ២០១៧ បានរម្លឹកបន្ថែមថា លោកបានជួបបញ្ហាគេគេជិះតាមវាយ និងជិះមកបុកចំនួនពីរលើកហើយ។ លោកបានរៀបរាប់បន្តថា លើកទី១នៅឆ្នាំ២០១៨ មានក្មេងប្រុសម្នាក់ជិះឆ្លងថ្នល់មកបុកលោកពេញទំហឹងរហូតបាក់ដៃខាងស្តាំ។
លោក ស៊ិន បូណាបានបញ្ជាក់បន្ថែមថា៖ «បញ្ហាលើកទី១នៅឆ្នាំ២០១៨ គ្រោះថ្នាក់កើតឡើងដូចជារឿងចៃដន្យអីចឹង។ បើសិនខ្ញុំមិនបានស្តាប់ឮផ្ទាល់ត្រចៀក ពេលក្មេងនោះវាបោះពាក្យថា ចង់បុកឱ្យងាប់តែវាបែរជាមិនងាប់ទៅវិញ។ រឿងលើកទីមួយយើងមានពាក្យបណ្តឹង ប៉ុន្តែការអន្តរាគមន៍វាដូចជាមិនមាន ហើយលើកនេះខ្ញុំបានទូរស័ព្ទទៅប៉ូលីសទាំងបួសដែរ តែគេអត់លើកទូរស័ព្ទ»។
សូមបញ្ជាក់ថា៖អតីតប្រធានក្រុមអង្គរក្សលោក សម រង្ស៊ី កាលពីថ្ងៃទី២២ ខែកញ្ញា ឆ្នាំ២០១៩ ក៏ត្រូវបានជនមិនស្គាល់មុខពីរនាក់លួចវាយពីក្រោយ បណ្តាលឲ្យរងរបួសបែកក្បាលហូរឈាម ខណៈដែលអង្គរក្សរូបនេះដើរត្រឡប់មកពីផ្សារម្នាក់ឯងបម្រុងទៅផ្ទះផងដែរ៕