ភ្នំពេញ ៖ ប្រធានក្រុមអង្គរក្សរបស់លោក សម រង្ស៊ី ត្រូវបានជនមិនស្គាល់មុខពីរនាក់លួចវាយពីក្រោយ បណ្តាលឲ្យរងរបួសបែកក្បាលហូរឈាមពេលដើរត្រឡប់មកពីផ្សារម្នាក់ឯងទៅផ្ទះ។
ប្រធានក្រុមអង្គរក្សរបស់លោក សម រង្ស៊ី ឈ្មោះ ពូក ចន្ដា ប្រាប់កាសែតថា កាលពីវេលាម៉ោង ៩ព្រឹកថ្ងៃទី២២ ខែកញ្ញាមានជនមិនស្គាលមុខ ២នាក់ បានជិះម៉ូតូមិនស្គាល់ម៉ាក និងពាក់មួយសុវត្តភាពជិត បានយកដំបងដែកមកវាយលោកពីក្រោយទាំងមិនដឹងខ្លួន ហើយថា ក្រោយលួចវាយរួច ជនល្មើសទាំងនោះបានជិះម៉ូតូរត់គេចខ្លួនបាត់អស់។
លោក ពូក ចន្ដា បញ្ជាក់ថា ហេតុការណ៍ហិង្សានេះ កើតឡើងចម្ងាយប្រមាណ ១០០ម៉ែត្រពីទីស្នាក់ការធំរគណបក្សសង្គ្រោះជាតិ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
ប្រធានក្រុមអង្គរក្សអតីតមេដឹកនាំបក្សឆាំងសរូបនេះ អះអាងថា របួសក្បាលដែលជនល្មើសលួចវាយនោះ ត្រូវបានពេទ្យដេរអស់ប្រាំថ្នេរ ហើយថា ក្រោយកើតហេតុ លោកបានប្តឹងករណីនេះទៅប៉ុសិ៍នគរបាលសង្កាត់ចាក់អង្រែពីបទមនុស្សឃាត៖ «ខ្ញុំដាក់ពាក្យបណ្តឹងទៅម្សិលមិញហើយ។ ខ្ញុំដាក់ពាក្យទៅប៉ុស្តិ៍នគរបាលចាក់អង្រែក្រោម ឲ្យដឹងលឺ ដោយខ្ញុំប្រាប់គេថា មានជនល្មើសពីរនាក់វាលួចវាយយើងពីក្រោយ និងធ្វើមនុស្សឃាតដល់អាយុវជីវិតយើង។ គ្រាន់តែដាក់ពាក្យឲ្យគេដឹងលឺទេ។ បើគេស្រាវជ្រាវរកមុខជនដៃឱ្យយើង គេរកទៅ ប៉ុន្តែ មិនងាយទេនៅស្រុកយើង»។
លោក ពូក ចន្តា អះអាងថា លោកមិនធ្លាប់មានជម្លោះជាមួយអ្នកណាពីមុននោះទេ ប៉ុន្តែ សព្វថ្ងៃនេះ លោកជាអ្នកយាមផ្ទះឱ្យលោក សម រង្ស៊ី នៅសង្កាត់ចាក់អង្រែក្រោម។
អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន ប្រាប់កាសែតថា សមត្ថកិច្ចកំពុងស្រាវជ្រាវករណីនេះ ដោយលោកថា ពុំមានការរើសអើងចំពោះអ្នកមាននិន្នការនយោបាយទៅខាងបក្សណាមួយឡើយ។៖ «សូមបញ្ជាក់ថា អ្នកណាក៏ដោយឱ្យតែជនរងគ្រោះ គឺសុទ្ធតែត្រូវការពារដោយច្បាប់ ហើយសមត្ថកិច្ចយើងការពារដូចគ្នា និងអ្នកណាក៏ដោយឱ្យតែជាជនល្មើស គឺសមត្ថកិច្ចយើងត្រូវតែស្វែងរកចាប់មកអនុវត្តច្បាប់ដោយមិនប្រកាន់ថា គាត់ពីមុនមកជាអ្នកការពារ សម រង្ស៊ី ទេ។ ពលរដ្ឋខ្មែរណាក៏ដោយឱ្យតែធ្វើខុសគេស្រាវចាប់ខ្លួនដូចគ្នាហ្នឹង»។
អតីតមន្ត្រីជាន់ខ្ពស់គណបក្សសង្គ្រោះជាតិ ប្រកាសថា មានសមាជិករបស់ខ្លួន ២៦នាក់ហើយ ត្រូវបានរដ្ឋាភិបាលចាប់ខ្លួនដាក់ពន្ធនាគារ ហើយមាន សមាជិកបក្សប្រឆាំងជាង ១៥០នាក់ ត្រូវបានកោះហៅទៅសួរនាំពាក់ព័ន្ធបញ្ហានយោបាយ៕
