ចិន៖ អាកាសយានិកអាមេរិកម្នាក់ ដែលបម្រើការងារឱ្យក្រុមហ៊ុនដឹកជញ្ជូនអាមេរិក FedEx កាលពីសប្ដាហ៍មុនត្រូវបានអាជ្ញាធរចិនចាប់ខ្លួនកាលពីដើមសប្តាហ៍កន្លងមកនេះ។ នេះបើតាមការចេញផ្សាយដោយសារព័ត៌មាន Sputnik កាលពីព្រឹកថ្ងៃសៅរ៍ ទី២១ ខែកញ្ញា ឆ្នាំ២០១៩ដែលដកស្រង់ពីក្រសួងការបរទេសចិន ។
បណ្ដាញសារព័ត៌មានអាមេរិកនានាបានឲ្យដឹងពីអត្តសញ្ញាណថាអាកាសយានិកថា ជាអតីតវីរសេនីយឯកកងទ័ពអាកាសអាមេរិកឈ្មោះ លោក ថូដ អេ ហន (Todd A. Hohn) ត្រូវបានចាប់ខ្លួនដោយអាជ្ញាធរគយចិនកាលពីថ្ងៃទី១២ ខែកញ្ញា នៅឯអាកាសយានដ្ឋានអន្តរជាតិប៉ៃយុន (Baiyun) នៃខេត្តក្វាងចូវ (Guangzhou) បន្ទាប់ពីគេរកឃើញគ្រាប់កាំភ្លើងខ្យល់ (airsoft gun pellets) ចំនួន ៦៨១ប្រអប់ នៅក្នុងកាបូកដាក់ឥវ៉ាន់របស់លោក។
លោក Todd A. Hohn ត្រូវអាជ្ញាធរចិនចាប់ខ្លួន ខណៈកំពុងសម្រាករង់ចាំជើងហោះហើរ ខាធេយដ្រាហ្គន (Cathay Dragon)ដើម្បីត្រឡប់ទៅផ្ទះរបស់លោកវិញនៅក្នុងទីក្រុងហុងកុង។ តែបើតាមសារព័ត៌មាន South China Morning Post បានរាយការណ៍ដែរថា បច្ចុប្បន្នលោក Hohn ត្រូវបានដោះលែងឱ្យនៅក្រៅឃុំ តែមិនទាន់អាចចាកចេញពីចិនដីគោកឡើយ រហូតទាល់ការស៊ើបអង្កេតបញ្ចប់ទាំងស្រុង។
គួរបញ្ជាក់ថា ក្រុមហ៊ុនដឹកជញ្ជូនអាមេរិក FedEx ក៏ទំនងជាស្ថិតនៅក្នុងការឃ្លាំមើល របស់អាជ្ញាធរចិនផងដែរ ចាប់តាំងពីការចុះឈ្មោះក្រុមហ៊ុនចិនជាច្រើនជាពិសេស Huawei ទៅក្នុងបញ្ជីខ្មៅពាណិជ្ជកម្មរបស់អាមេរិក ដែលកាលណោះទំនិញរបស់ Huawei ដែលផ្ញើទៅកាន់សហរដ្ឋអាមេរិក ត្រូវបានបង្វែឲ្យខុសគោលដៅជាដើម៕
