ភ្នំពេញ ៖ បង្កាក្រែងមានមានក្រុមអតីតអ្នកគាំទ្រ គណបក្សប្រឆាំងរៀបចំ គម្រោងចលនាប្រមូលម្តុំតាមវត្តអារ៉ាមពេលភ្ជុំក្នុងកិច្ចប្រជុំគណៈបញ្ជាការ ឯកភាពរាជធានីភ្នំពេញនៅថ្ងៃទី១៨ ខែកញ្ញា ឆ្នាំ២០១៩ អភិបាលរាជធានីភ្នំពេញ បានបញ្ជាឲ្យកងកម្លាំងប្រដាប់អាវុធ និងអាជ្ញាធរដែនដីត្រូវពង្រឹងបន្ថែម នូវកិច្ចការពារសុវត្ថិភាពប្រជាពលរដ្ឋ ក្នុងឱកាសបុណ្យភ្ជុំបិណ្ឌ ។
លោក ឃួង ស្រេង មានប្រសាសន៍ថា “ខែនេះ គឺជាខែដែលបងប្អូនប្រជាពលរដ្ឋ បាននិងកំពុងប្រារព្ធពិធីភ្ជុំបិណ្ឌ ដូច្នេះកងកម្លាំងប្រដាប់អាវុធ ទាំង២ភេទ អាជ្ញាធរដែនដី កម្លាំងពាក់ព័ន្ធទាំងអស់ ត្រូវតែពង្រឹងបន្ថែម កិច្ចការពារសុវត្ថិភាព ជូនប្រជាពលរដ្ឋ ទាំងការធ្វើដំណើរទៅវត្តអារ៉ាម ក៏ដូចជាចាកចេញ ពីផ្ទះទៅកាន់បណ្ដាខេត្តនានា ។ យើងត្រូវការពារភូមិឋាន លំនៅឋាន របស់ពួកគាត់ ពិសេសលើបទល្មើសចោរកម្ម លួច ឆក់ ប្លន់ជាដើម” ។ លោកថា កន្លងមកបានទប់ស្កាត់បទល្មើសផ្សេងៗ មានលក្ខណៈល្អប្រសើរហើយ ប៉ុន្តែត្រូវពង្រឹងថែមទៀត ដោយមិនបន្ធូរដៃឡើយ។
វិទ្យុបារាំងបានផ្សាយថាសម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំឲ្យត្រៀមទប់ស្កាត់ កម្លាំងប្រមូលផ្ដុំ ក្នុងឱកាសពិធីបុណ្យភ្ជុំបិណ្ឌ ។ សម្តេច ស ខេង ចេញបញ្ជាផ្ទាល់មាត់ ឲ្យអាជ្ញាធរមានសមត្ថកិច្ច នៅតាមមូលដ្ឋានទប់ស្កាត់ ចលនាប្រមូលនៅតាមវត្តអារ៉ាម។ បើតាមរដ្ឋមន្ត្រីមហាផ្ទៃ ពួកប្រឆាំងក្រៅច្បាប់ នឹងចុះទៅតាមវត្តអារាម រៀបចំផែនការខ្មៅ។ ទោះជាយ៉ាងណាសម្តេចក្រឡាហោមបាននិយាយបង្កាថាលោកមិនបានហាមមិនឲ្យប្រជាពលរដ្ឋមកធ្វើបុណ្យភ្ជុំនោះទេ។
លោក ស ថេត ស្នងការនគរបាលរាជធានីភ្នំពេញ បានឲ្យដឹងដែរថា ក្នុងឱកាសបុណ្យភ្ជុំបិណ្ឌនេះ មានកងកម្លាំងសមត្ថកិច្ច ចំនួន២៣៥១នាក់ ដាក់ពង្រាយការពារសន្តិសុខ សុវត្ថិភាពពលរដ្ឋ នៅតាមវត្តអារាមចំនួន១៤៩វត្ត និងនៅកន្លែងផ្សេងៗទៀត ក្នុងរាជធានីភ្នំពេញ ។
សម្រាប់ ការសម្រួលចរាចរណ៍ផ្លូវគោកវិញ លោកស្នងការថា បាននិងកំពុងអនុវត្តយ៉ាងខ្ជាប់ខ្ជួន បើទោះបីកំពុងភ្លៀងធ្លាក់ក៏ដោយ ក៏កម្លាំងសមត្ថកិច្ច នៅតែឈរជើង តាមគោលដៅរបស់ខ្លួន ។ក្រៅពីនៅក្នុងរាជធានីភ្នំពេញដែលពេលភ្ជុំមិនសូវមានមនុស្សនោះនៅតាមបណ្តាខេត្តលោកនាយឧត្តមសេនីយ៍នេតសាសវឿនអគ្គស្នងការនគរបាលជាតិក៏បានដាក់ចេញផែនការឲ្យនគរបាលចេញកម្លាំងការពារផងដែរ៕
