ភ្នំពេញ ៖ ប្រជាពលរដ្ឋខ្មែរចំនួន២នាក់ បានបាត់ខ្លួនក្នុងដីថៃក្នុងចំណោម៧នាក់ដែលបានចូលហើយរងគ្រោះដោយទឹកជំនន់កាលពីថ្ងៃទី១៧កញ្ញា ។ នាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ នាថ្ងៃទី១៨ ខែឧសភា ឆ្នាំ២០១៩ បានដឹកនាំកម្លាំងចម្រុះ២៥នាក់ ដែលមានអាជ្ញាធរ កងកម្លាំងប្រដាប់អាវុធសហការជាមួយភាគីថៃ និងប្រជាពលរដ្ឋបន្តប្រតិបត្តិការរុករកប្រជាពលរដ្ឋខ្មែរ ចំនួន២នាក់ ដែលបានបាត់ខ្លួន នៅចំណុចព្រំដែនកម្ពុជា-ថៃ ច្រកពាមតា ឃុំតាតោក ស្រុកសំឡូត ខេត្តបាត់ដំបង កាលពីថ្ងៃទី១៦ ខែកញ្ញា ឆ្នាំ២០១៩។
ប្រតិបត្តិការនេះ កំពុងទទួលបានការយកចិត្តទុកដាក់ និងបញ្ជារផ្ទាល់ពី ឯកឧត្តម គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ខណៈដែលក្រុមការងារ កំពុងតែមមាញឹកក្នុងប្រតិបត្តិការរុករក។ដល់ថ្ងៃទី១៨ ខែកញ្ញា ឆ្នាំ២០១៩មានរយៈពេល២ថ្ងៃអ្នកភូមិបានប្រទះឃើញស្បែកជើង១គូនិងមួក១ រួមនិងពោះវៀននៅកន្លែងកើតហេតុស្ថិតនៅចំណុចពាមតា ភូមិអូរត្រែង ឃុំតាតោក ស្រុកសំឡូត ខេត្តបាត់ដំបង ជាប់ទល់ដែនកម្ពុជា-ថៃ ។
ប្រពន្ធជនរងគ្រោះម្នាក់ក្នុងចំណោម២នាក់ដែលបាត់ខ្លួនអះអាងប្រាប់នគរបាលប៉ុស្ថិ៍រដ្ឋបាលឃុំតាតោកថាស្បែកជើងនិងមួកនោះពិតជារបស់ប្តីគាត់ប្រាកដ ។ ដោយឡែកពោះវៀនដែលគេប្រទះឃើញជាមួយស្បែកជើងនិងមួក មិនទាន់មានការអះអាងថាជាពោះវៀនរបស់ជនរងគ្រោះរឺពោះវៀនសត្វនោះទេ ។ ជុំវិញបញ្ហានេះ អភិបាលខេត្តដំបងស្តីទី លោក ហឿង សុគន្ធ បានប្រាប់អ្នកយកព័ត៌មានយើងឲ្យដឹងថា ប្រតិបត្តិការរុករកជនរងគ្រោះបាត់ខ្លួនក៏មានការចូលរួមសហការពីសមត្ថកិច្ចថៃ ពីព្រោះចំណុចដែលជនរងគ្រោះបាត់ខ្លួននៅលើភ្នំ ស្ថិតនៅក្នុងទឹកដីថៃ ដោយភាគីថៃគេកំពុងបន្តស្រាវជ្រាវរករុកជាមួយសមត្ថកិច្ចកម្ពុជា ។
សូមញ្ជាក់ថា កាលពីថ្ងៃទី១៦ ខែកញ្ញា ឆ្នាំ២០១៩ ប្រជាពលរដ្ឋ៧នាក់ រស់នៅភូមិអូរត្រែង ឃុំតាតោក ស្រុកសំឡូត ខេត្តបាត់ដំបង បានឡើងលើភ្នំចំណុច ពាមតា ស្ថិតក្នុងភូមិសាស្ត្រ ភូមិអូរត្រែង ឃុំតាតោក ស្រុកសំឡូត ដើម្បីរកវល្លិ៍និងបរបាញ់សត្វ ខណៈប្រជាពលរដ្ឋទាំង៧នាក់កំពុងនាំគ្នាអង្គុយអាំងភ្លើងដែលមានភ្លៀងធ្លាក់ខ្លាំងច្រោះទឹកបណ្តាលឲ្យបាក់ដីភ្នំពីផ្នែកខាងលើមកក្រោមនាំពួកគេទាំង៧នាក់រត់គេចខ្លួន ។
ពេលនោះមានពលរដ្ឋ៥នាក់បានគេចខ្លួនដោយសុវត្ថិភាពគ្រាន់តែមានម្នាក់ប៉ុណ្ណោះបានរងរបួសដោយឡែក២នាក់ផ្សេងទៀតបាត់ខ្លួន ។ ជនរងគ្រោះទាំង២នាក់មានឈ្មោះ ផាន់ វី ភេទប្រុស អាយុ២០ឆ្នាំ ឈ្មោះ ឆាង កុយ ភេទប្រុស អាយុ២៥ឆ្នាំ ចំណែកអ្នករងរបួសមានឈ្មោះ ទ្រី កុសល ភេទប្រុស អាយុ២៥ឆ្នាំ ពួកគេរស់នៅភូមិអូរត្រែង ឃុំតាតោក ស្រុកសំឡូត ។
