ខេត្តកំពត៖ ប្រជាពលរដ្ឋជាអ្នកដឹកទំនិញដោះដូរតាមព្រំដែនប្រមាណជាង៥០នាក់ បានប្រមូលផ្តុំគ្នាបិទផ្លូវផ្លូវជាតិលេខ៣៣នៅមុខស្នាក់ការគយចល័ត នៃឃុំឫស្សីស្រុកខាងលិច នៅវេលាម៉ោង៨និង៣៥នាទីព្រឹក ថ្ងៃទី១៥ ខែកញ្ញា ឆ្នាំ២០១៩ តវ៉ាឲ្យបញ្ចុះតម្លៃលើសេវាដឹកជញ្ជូនទំនិញតាមម៉ូតូ និងរថយន្ត។
តំណាងពលរដ្ឋម្នាក់ឈ្មោះ សាយ កេត រស់នៅឃុំស្វាយទងខាងត្បូង ស្រុកកំពង់ត្រាច បានបញ្ជាក់អះអាងថា បញ្ហាដែលពួកគាត់បបួលគ្នីគ្នាមកតវ៉ានេះ គឺសំដៅតែលើអង្គភាពគយចល័តមួយគត់ ដែលបច្ចុប្បន្នដាក់ស្នាក់ការនៅជិតរង្វង់មូលភូមិលក នៃឃុំឫស្សីស្រុកខាងលិចកៀបពេក។
ពួកគាត់រកស៊ីប្រកបមុខរបរដឹកទំនិញដោះដូរតូចតាចសម្រាប់ដោះស្រាយជីវភាពប្រចាំថ្ងៃបែបនេះជាង១០ឆ្នាំមកហើយ ។កន្លងមកអង្គភាពគយចល័តបានយកតម្លៃសេវាតាមមធ្យោបាយដឹកជញ្ជូននានា ពិសេសម៉ូតូដែលដឹកទំនិញឆ្លងកាត់ចាប់ពី២ម៉ឺនរៀល ទៅ៣ម៉ឺនរៀលប៉ុណ្ណោះ(ក្នុង១ជើង) ។តែពេលចុងក្រោយនេះអង្គភាពគយចល័តបែរជាឲ្យពួកគាត់បង់សេវាដឹកជញ្ជូនរហូតដល់១លានរៀល(ក្នុង១ជើង)លើសមុនជាង៣០ដងឯណោះ តើឲ្យពួកគាត់ទៅរកលុយឯណាបានគ្រប់ចំនួនបង់ឲ្យទៅ ណាមួយកម្រឹតនៃប្រាក់ចំណូលរកបាននោះ ។
ករណីយ៍នេះលោក យី ថុល ប្រធានស្នាក់ការគយ និងរដ្ឋាករព្រែកចាក បានលើកឡើងថា ការដំឡើងពន្ធរាល់មុខទំនិញបែបនេះគឺដោយសារគោលការណ៍ខាងលើ តម្រូវឲ្យស្ថាប័នរបស់លោកប្រមូលពន្ធជូនរដ្ឋឲ្យបានគ្រប់ចំនួន ទើបតម្លៃសេវាបង់ប្រាក់អាចប្រែប្រួល? ប៉ុន្តែបើមានសំណូមពរពីបងប្អូនអាជីវករដែលរកស៊ីដឹកទំនិញឲ្យបញ្ចុះតម្លៃលើមធ្យោបាយបែបនេះទៅហើយ លោកនឹងសុំយោបល់ពីថ្នាក់លើ ដើម្បីរកដំណោះស្រាយជូននៅពេលក្រោយ?។ប្រការនេះធ្វើឲ្យគេឆ្ងល់ថាហេតុអីបានបាត់ចំណូលពន្ធហើយមកកៀបពលរដ្ឋចឹង?។
លោក ង៉ែត សាវឿន ប្រធានស្នាក់ការត្រួតពិនិត្យច្រកទ្វារព្រំដែនអន្តរជាតិព្រែកចាក ក៏បានបើកកិច្ចប្រជុំនៅស្នាក់ការនៃច្រកទ្វារព្រំដែនអន្តរជាតិ ជាមួយស្ថាប័នពាក់ព័ន្ធរួមនិងអាជីវករ ដើម្បីរកដំណោះស្រាយរួមគ្នា ដោយខណៈនោះប្រធានស្នាក់ការក៏បានជំរុញដល់ស្ថាប័នគយដែលជាអង្គភាពជំនាញ ជួយបន្ធូរបន្ថយនូវតម្លៃសេវាដឹកជញ្ជូនដល់បងប្អូនអាជីវករ ពិសេសពលរដ្ឋក្នុងភូមិសាស្ត្រច្រកទ្វារព្រំដែនអន្តរជាតិព្រែកចាក ដើម្បីបង្កភាពងាយស្រួលឲ្យពួកគាត់បានដោះដូរទំនិញតាមព្រំដែនសម្រាប់ដោះស្រាយជីវភាពគ្រួសារប្រចាំថ្ងៃឲ្យកាន់តែងាយស្រួល ស្របតាមអនុសាសន៍របស់សម្តេចតេជោ ហ៊ុន សែន ដែលតែងតែគិតគូរពីទុក្ខលំបាករបស់ប្រជាពលរដ្ឋគ្រប់មជ្ឈដ្ឋានទូទាំងប្រទេស ដោយមិនទុកឲ្យពលរដ្ឋណាម្នាក់ដាច់បាយស្លាប់នោះឡើយ។
លោក ង៉ែត សុផល អភិបាលរងស្រុកកំពង់ត្រាច ក៏បានលើកឡើងដោយបានណែនាំដល់អ្នករកស៊ីដឹកទំនិញខាងលើឲ្យយល់អំពីច្បាប់និងទម្លាប់ ដូចជាករណីបិទផ្លូវធ្វើបាតុកម្មដើម្បីតវ៉ានេះជាដើម គឺខុសនឹងច្បាប់ទាំងស្រុង។លោកថា លើកក្រោយបើបងប្អូនមានបញ្ហាអ្វីមួយ គួរសុំអន្តរាគមន៍ពីអាជ្ញាធរដែនដីជាមុនសិន ព្រោះថាការធ្វើបាតុកម្មត្រូវសុំច្បាប់ពីក្រសួងមហាផ្ទៃជាមុនសិន ដោយយើងមិនអាចធ្វើឲ្យប្រាសចាកនឹងច្បាប់បែបនេះឡើយ។ ក្នុងនាមគណៈអភិបាលស្រុកកំពង់ត្រាច លោកក៏សូមឲ្យស្ថាប័នពាក់ព័ន្ធគួរយោគយល់ អធ្យាស្រ័យដល់ពលរដ្ឋដែលរកសីុដឹកទំនិញនៅច្រកព្រំដែននេះផង ព្រោះពួកគាត់សុទ្ធតែជាប្រជាពលរដ្ឋក្នុងស្រុកប្រកបមុខរបរដោះដួរកំប៉ិកកំប៉ុកសម្រាប់ចិញ្ចឹមឆ្នាំងតែប៉ុណ្ណោះ។
