កំពត ៖ នៅព្រឹកថ្ងៃទី ១៦ ខែ កញ្ញា ឆ្នាំ ២០១៩ នៅមន្ទីរបរិស្ថាន ខេត្តកំពត មានការប្រគល់សម្ភារៈប្រើប្រាស់ និង អាវុធជូនមន្ត្រីឧទ្យានុរក្សនៃឧទ្យានជាតិព្រះមុនីវង្សបូកគោ ។ លោក សូត យា អនុរដ្ឋលេខាធិការក្រសួងបរិស្ថានដែលចុះបំពាក់អាវុធបានណែនាំឱ្យមន្ត្រីឧទ្យានុរក្សត្រូវបង្កើនការយកចិត្តទុកដាក់ក្នុងកិច្ចបង្ការទប់ស្កាត់និង បង្ក្រាបឱ្យបាននូវរាល់បទល្មើសផ្សេងៗស្ថិតក្នុងដែនគ្រប់គ្រងរបស់ខ្លួន ។
ដោយសារតែក្នុងដែនឧទ្យានជាតិមានវិសាលភាព ធំល្ហល្ហេវនោះគឺជាទីតាំងយ៉ាងគាប់ប្រសើរសម្រាប់ការដោះដូរ និង ការប្រើប្រាស់គ្រឿងញៀនរបស់ជនខិលខូច ហេតុនេះត្រូវមានការគិតគូរជាចម្បងលើ បញ្ហានៃសកម្មភាពគ្រឿងញៀន ។ ពោលគឺមន្ត្រីជំនាញត្រូវដើរល្បាតគ្រប់ច្រកល្ហកទោះក្នុងដងជ្រោះឬទីព្រៃជ្រៅដើម្បីតាមដានក្រែងកើតមានករណីលួចលបដាំរុក្ខជាតិមិនស្របច្បាប់ ពិសេសដើមកញ្ឆាដែលជាវត្ថុធាតុសម្រាប់ផលិតគ្រឿងញៀននោះ ។
លោក សូត យា បានបញ្ជាក់ថា៖ ពាក់ព័ន្ធនឹងការប្រគល់ជូនអាវុធនេះដែរ ប្រធានអង្គភាពត្រូវទំនាក់ ទំនងជាមួយអ្នកជំនាញផ្នែកអាវុធដើម្បីទទួលបាននូវការហ្វឹកហាត់បំណងចេះប្រើប្រាស់ ក៏ដូចជាការថែទាំប្រកបដោយគុណភាពព្រមទាំងរួចផុតពីទោសទណ្ឌទាំងឡាយ ។ ម្យ៉ាងទៀតរាល់ពេលចុះបំពេញ ការងារ ដែលកាន់អាវុធជាប់តាមខ្លួនចាំបាច់ត្រូវតែមានលិខិតបេសកកម្ម ហើយគ្រងដោយឯកសណ្ឋានសម្គាល់ស្ថាប័នឱ្យបានត្រឹមត្រូវ ។សូមបញ្ជាក់ថាប៉ុន្មានខែមុននេះមន្ត្រីបរិស្ថាននៅមណ្ឌលគិរីនិងកំពង់ធំរងការបាញ់ប្រហានិងកាប់ពីពួកឧក្រឹដ្ឋជនព្រៃឈើបណ្តាលឲ្យរងរបួសដែលមកដល់ពេលនេះមិនទាន់រកឃើញជនដៃដល់មកផ្តន្ទាទោសនៅឡើយ៕
