រាជធានីភ្នំពេញ៖ ជនជាតិចិនសរុប១០៥នាក់ មានស្រី១០នាក់ ពាក់ព័ន្ធការស្នាក់នៅខុសច្បាប់ និង បើកលេងល្បែងតាមអ៊ឺនធឺណិតត្រូវបានកម្លាំងនាយកដ្ឋានស៊ើបអង្កេតនិងអនុវត្តនីតិវិធី នៃអគ្គនាយកដ្ឋានអន្ដោប្រវេសន៍ចុះចាប់កាលពីយប់ថ្ងៃទី៩ ខែកញ្ញានៅក្នុងសាកលវិទ្យាល័យបរទេសមួយ ។
សមត្ថកិច្ច បញ្ជាក់ថា ប្រតិបត្តិការចាប់ខ្លួនជនជាតិចិនទាំង១០៥នាក់នេះ ត្រូវបានធ្វើឡើងក្នុងអគារកម្ពស់៩ជាន់នៃអគារ SUN TOWN សាកលវិទ្យាល័យ “Excelpolitan University” នៅតាមបណ្ដោយផ្លូវទ្រុងមាន់ ស្ថិតក្នុងសង្កាត់អូរបែកក្អម ខណ្ឌសែនសុខ ។ពាក់ព័ន្ធករណីនេះ ក្រសួងការងារ បានសេចក្តីប្រកាសព័ត៌មាន ស្តីពីការឈប់ទទួលស្គាល់វិទ្យាស្ថានអ៊ិកសែលប៉ូលីធាន“Excelpolitan University” ។
ក្នុងសេចក្តីប្រកាសព័ត៌មានចុះថ្ងៃទី១០ ខែកញ្ញា ក្រសួងការងារបានជូនដំណឹងទៅសាធារណជន សិក្ខាកាម សិស្សនិស្សិត ដោយបញ្ជាក់ថា ក្រសួងសម្រេចឈប់ទទួលស្គាល់វិទ្យាស្ថានអ៊ិកសែលប៉ូលីធាន (EXCELPOLITAN INSTITUTE)។មូលហេតុគឺ វិទ្យាស្ថានមួយនេះ មិនអនុវត្តន៍តាមស្មារតីប្រកាសដែលក្រសួង បានអនុញ្ញាតឲ្យធ្វើការបណ្តុះបណ្តាល។ បញ្ជាក់បន្ថែមថា រហូតមកដល់វិទ្យាស្ថាននោះ មិនទានបានធ្វើការបណ្តុះបណ្តាលនៅឡើយទេ។
ក្នុងប្រតិបត្តិការខាងលើដឹកនាំដោយ ឧត្តមសេនីយ៍ទោ វឌ្ឍនៈ មង្គល ប្រធាននាយកដ្ឋានស៊ើបអង្កេត និងអនុវត្តនីតិវិធី លោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ នឹងលោក ផាន់ លីវ៉ា ក្រឡាបញ្ជី ត្រួតពិនិត្យ និងឃាត់ខ្លួនជនជាតិចិន ស្ថិតអគារពាណិជ្ជកម្ម SUNTOWN សង្កាត់អូរបែកក្អម ខណ្ឌសែនសុខ។
ក្នុងប្រតិបត្តិការខាងលើ បានពិនិត្យរកឃើញជនជាតិចិនសរុបចំនួន១០៥នាក់ (ស្រី១០នាក់) ពីបទស្នាក់នៅខុសច្បាប់ និងសង្ស័យប្រព្រឹត្តល្បែងប្រព័ន្ធអ៊ីនធើណិត (VOIP)។ដកហូតវត្ថុតាងៈទូរស័ព្ទដៃចំនួន១៩១គ្រឿង, កុំព្យូទ័រយួរដៃ (laptop) ចំនួន៤គ្រឿង, Ipaid ២គ្រឿង, កាមេរ៉ាចំនួន២គ្រឿង, លិខិតឆ្លងដែនចំនួន៤៧ក្បាល, រថយន្ត១គ្រឿងម៉ាក LEXUS ផ្លាកលេខភ្នំពេញ2-J9168, MONITER ចំនួន៩៥គ្រឿង និងCASE ចំនួន៨០គ្រឿង (ចាស់)។ជនសង្ស័យខាងលើ បានបញ្ជូនទៅនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ដើម្បីអនុវត្តនីតិវិធីបន្តនៃច្បាប់៕