ភ្នំពេញ ៖ លោក សម រង្ស៊ី មេដឹកនាំអ្នកប្រឆាំងដែលបាននិងកំពុងទទួលការចាប់អារម្មណ៍រឿងមកស្រុកខ្មែរថ្ងៃទី៩វិច្ឆិកាខាងមុខនេះអាឡូវល្បីម៉ាប្រ៉ាវទៀតហើយដោយសាសម្តីរបស់គាត់រឿងមហាក្សត្រដែលច្បាប់ហាមមិនឲ្យប៉ះពាល់។
លោក សម រង្សីបានផ្តល់កិច្ចសម្ភាសន៍ ជាមួយវិទ្យុអាស៊ីសេរី និងត្រូវបានផ្សព្វផ្សាយ ជាសាធារណៈ នាយប់ថ្ងៃទី ១២ ខែកញ្ញា ឆ្នាំ២០១៩ ដែលមានខ្លឹមសារថា៖គ្មាននរណាអាចប្រៀបធៀបជាមួយព្រះនរោត្តម សីហនុ បានទេ ។ ព្រះអង្គប្រជុំរកដំណោះស្រាយនយោបាយ កាលពីព្រះអង្គនៅមានព្រះជន្ម ។ ខ្ញុំជឿថាឥឡូវនេះ មានតែសហគមន៍អន្តរជាតិទេ ពីព្រោះអ្នកដែលរស់នៅលើទឹកដីប្រទេសកម្ពុជា គឺជាចំណាប់ខ្មាំងរបស់ ហ៊ុន សែន សូម្បីតែព្រះមហាក្សត្ររបស់យើង គឺជាចំណាប់ខ្មាំងរបស់ ហ៊ុន សែន ។ ដូច្នេះលោកអត់ហ៊ានធ្វើអ្វីទេ លោកខ្លាច ហ៊ុន សែន លោកចង់រក្សារាជបល្ល័ងលោក ដូច្នេះយើងទុកព្រះអង្គមួយអន្លើទៅ យើងមិនអាចរំពឹងព្រះមហាក្សត្រដែលជាអាយ៉ងរបស់ ហ៊ុន សែន បានទេ»។ ។
នៅក្នុងសេចក្តីថ្លែងការណ៍មួយទំព័រ រាជវាំងកម្ពុជា បានសរសេរថា ក្រសួងព្រះបរមរាជវាំង សូមប្រកាសដាច់អហង្កាថ្កោលទោសចំពោះលោក សម រង្សី ដែលមានចរិតជាជនក្បត់ជាតិ តែងតែពោលពាក្យប៉ះពាល់ដល់ព្រះកិត្តិនាម ព្រះករុណា ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលព្រះអង្គ កំពុងគង់ប្រថាប់បំពេញព្រះរាជតួនាទីដ៏ឧត្តុង្គឧត្តម ជានិមិត្តរូបនៃឯកភាពជាតិ និងនិរន្តរភាពជាតិ។
ក្រៅពីនេះមានការថ្កោលទោសពីគណបក្សប្រជាជននិងស្ថាបន័ក្រសួងនានារបស់រាជរដ្ឋាភិបាលលោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ នៅរសៀលថ្ងៃទី១៣ ខែកញ្ញា ឆ្នាំ២០១៩នេះ បានចេញលិខិតបញ្ជាឲ្យព្រះរាជអាជ្ញា អមសាលាដំបូងរាជធានីភ្នំពេញ ចាត់វិធានការជាបន្ទាន់ និងតឹងរឹងបំផុតលើ លោក សម រង្ស៊ី ករណីប្រមាថយ៉ាងធ្ងន់ធ្ងរ ដល់ព្រះចេស្ដា អង្គព្រះមហាក្សត្រកម្ពុជាដោយដកយកឃា្ថមកចោទថា៖“ព្រះមហាក្សត្ររបស់យើង គឺជាចំណាប់ខ្មាំងរបស់ ហ៊ុន សែន ដូច្នេះលោកអត់ហ៊ានធ្វើអីទេ លោកខ្លាច ហ៊ុន សែន លោកចង់តែរក្សារាជបល្ល័ង្ក លោក ដូច្នេះយើងទុកព្រះអង្គមួយអន្លើទៅ យើងមិនអាចរំពឹងព្រះមហាក្សត្រ ដែលជាអាយ៉ងរបស់លោក ហ៊ុន សែន ដូចសព្វថ្ងៃបាន”។
ក្រសួងយុត្តធិមបានចាត់ទុក ពាក្យសម្ដីរបស់លោកសម រង្ស៊ី ដែលបានផ្សព្វផ្សាយជាសាធារណៈនេះ បានធ្វើឲ្យប៉ះពាល់យ៉ាងធ្ងន់ធ្ងរ ដល់ព្រះកិត្តិនាមព្រះមហាក្សត្រ ។ ការប្រមាថយ៉ាងធ្ងន់ធ្ងរ ដល់ព្រះចេស្ដា អង្គព្រះមហាក្សត្រខាងលើនេះ គឺជាទង្វើរំលោភបំពាន លើរដ្ឋធម្មនុញ្ញកម្ពុជា ហើយទង្វើនេះ ត្រូវបានកំណត់ ជាបទល្មើសព្រហ្មទណ្ឌ ដែលមានចែងនិងផ្តន្ទាទោស តាមបញ្ញត្តមាត្រា៤៣៧ ស្ទួន នៃក្រមព្រហ្មទណ្ឌ។
ប្រភពបញ្ជាក់ថា “យោងតាមមាត្រា២៩ នៃក្រមនីតិវិធីព្រហ្មទណ្ឌ នៃព្រះរាជាណាចក្រកម្ពុជា ក្រសួងយុត្តិធម៌ សូមលោកព្រះរាជអាជ្ញា ចាត់វិធានការផ្លូវច្បាប់ជាបន្ទាន់ និងដោយតឹងរ៉ឹងបំផុត ចំពោះអំពើប្រមាថ ចំពោះអង្គព្រះមហាក្សត្រខាងលើ ដោយអនុវត្ត ស្របតាមនីតិវិធីជាធរមាន” ។
មុនការស្នើរបស់រដ្ឋមន្ត្រីយុត្តិធម៌នេះ បន្ទាប់ពីក្រសួងព្រះបរមរាជវាំង បានចេញសេចក្តីថ្លែងការណ៍ ថ្កោលទោសលោក សម រង្ស៊ីយ៉ាងដាច់អហង្កា ។ រាជអាជ្ញាតុលាការបានចោទប្រកាន់លោកសមរង្ស៊ីហើយ!។
