ភ្នំពេញ ៖ បន្ទាប់ពីមានការចែករំលែកតគ្នាក្នុងបណ្តាញសង្គម Facebook ស្តីពីសំណង់អគារផ្ទះ១ល្វែង២ជាន់ មានទីតាំង ស្ថិតនៅតាមចិញ្ចើមផ្លូវលំចូលទៅឡឥដ្ឋ លេខផ្ទះ ១២ ក្រុមទី២៩ ភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ នាពេលថ្មីៗកន្លងទៅប៉ុន្មានថ្ងៃ មុននេះ ។
ឥលូវត្រូវបានប្រភពព័ត៌មានច្បាស់ការណ៍ពីមន្ត្រី នៅមូលដ្ឋាននោះផ្ទាល់ បានទម្លាយប្រាប់អ្នកកាសែតអោយ ដឹងថា៖ សំណង់អគារផ្ទះ១ល្វែង២ជាន់ នៅទីតាំងខាងលើ ជា កម្មសិទ្ធិរបស់ឈ្មោះ ឃុន ចំណាន ដែលទំនងជាប់សាច់ ញាតិឧកញ៉ាដ៏ល្បីឈ្មោះម្នាក់ខាងជំនួញដីធ្លីនៅក្នុងរាជធានី ភ្នំពេញ និង ប្រពន្ធឈ្មោះ សួង ស៊ៀម៉ី ដែលមានលិខិតផ្ទេរ សិទ្ធិគ្រប់គ្រងប្រើប្រាស់ដីធ្លីលេខ ៣៧១ បជចុះថ្ងៃទី ២ ខែ ឧសភា ឆ្នាំ២០១៤ មានទំហំ ៩៨ ម៉ែត្រក្រឡា ។
ប្រជាពលរដ្ឋ បានសម្តែងមតិជាចម្ងល់ និងចោទប្រកាន់អាជ្ញាធរ និង មន្ត្រី ជំនាញពាក់ព័ន្ធគ្រប់លំដាប់ថ្នាក់ថា ជាអ្នកបើកដៃ ឬ ឃុបឃិត គ្នាជាប្រព័ន្ធ បិទភ្នែក លាបាតដៃទទួលយក$$យ៉ាងក្រាស់ ក្រែលពីម្ចាស់ផ្ទះនេះទើបសំណង់ខុសច្បាប់នេះអាចសាងសង់បានយ៉ាងរលូនបែបនេះ ? ។
ជុំវិញករណីនេះ ការិយាល័យ និពន្ធ យើងខ្ញុំមិនអាចសុំការបំភ្លឺពីលោក ពេជ្រ កែវមុន្នី អភិបាលខណ្ឌមានជ័យបានទេ ព្រោះលេខទូរស័ព្ទ របស់លោកជាច្រើនប្រព័ន្ធឆ្លើយតបថា មិនអាចទាក់ទងបានទេ ។
ឯលោក ជា សុខៃ ចៅសង្កាត់ចាក់អង្រែក្រោម និង លោកប្រធានការិយាល័យរៀបចំដែនដី និង ភូមិបាលខណ្ឌ មានជ័យពុំមានលេខទូរស័ព្ទទាក់ទងសុំការបំភ្លឺបញ្ជាក់នោះ ទេ ។
មហាជន និង ប្រជាពលរដ្ឋ ក៏ដូចជាមន្ត្រីរាជការខ្លះ បាន នឹងកំពុងរង់ចាំមើលប្រតិកម្មពីថ្នាក់ដឹកនាំ សាលារាជធានីដែលមានឯកឧត្តម ឃួង ស្រេង ជាអភិបាលរាជធានីភ្នំពេញ ជាពិសេសឯកឧត្តម ជា សុផារ៉ា រដ្ឋមន្ត្រីក្រសួងរៀបចំដែនដី នគរូបណីយកម្ម និង សំណង់ ថា: តើអស់លោកធំទាំង២រូប បានឃើញ និង ជ្រាបដែរទេពីករណី ១ នេះ ឬក៏អស់លោក បានសើមមាត់ សើម ក ស្អិត ក្តៅបំពង់ ក និយាយលែងចេញ ដែរ ចំពោះសំណង់អគារ១ល្វែង ២ ជាន់នេះ ? ។ ចំពោះ ម្ចាស់ ផ្ទះឈ្មោះ ឃុន ចំណាន និង ប្រពន្ធឈ្មោះ សួង ស៊ៀម៉ី មិន អាចសុំការបំភ្លឺបានទេ ព្រោះពុំមានលេខទូរស័ព្ទទំនាក់ ទំនង ៕
