ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានឲ្យកាសែតដឹង ថា ក្រសួងការពារជាតិ បានរកឃើញក្នុងជួរកងទ័ព មានឧកញ៉ាសរុប៩៩នាក់ ។ ក្នុងនោះមានឧកញ៉ាចំនួន៦៥នាក់ នៅចំណុះអគ្គបញ្ជាការដ្ឋានកងយោពលខេមរភូមិន្ទ និង៣៤នាក់ នៅចំណុះទីស្តីការក្រសួងការពារជាតិ។
សម្តេចពិជ័យសេនា ទៀ បាញ់ បានបញ្ជាក់ ថា នៅក្នុងចំណោមឧកញ៉ាទាំង៩៩នាក់ ដែលស្ថិតនៅក្នុងក្របខណ្ឌ នៃកងយោធពលខេមរភូមិន្ទ ក្រសួងការពារជាតិទាំងនោះ មានអ្នកខ្លះក៏បានធ្វើការបញ្ជាក់ជំហររួចហើយថាត្រូវជ្រើសរើសយក «ឧកញ៉ា» ឬ យក «តួនាទី» ប៉ុន្តែការសម្រេចជាផ្លូវការច្បាស់លាស់ គឺត្រូវតែធ្វើតាមនីតិវិធីច្បាប់ជាបន្តបន្ទាប់ទៀត។
បើតាមប្រភពដែលទុកចិត្តបានឲ្យដឹងថានៅក្នុងអគ្គបញ្ជាការដ្ឋានកងទព័មានឧកញ៉ា១៦នាក់សម្រេចចោលសក្តិឧត្តមសេនីយ៍ទុកឧកញ៉ាវិញ។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាកាលពីថ្ងៃទី២២ ខែសីហា ឆ្នាំ២០១៩ក្នុងកិច្ចប្រជុំគណកម្មធិការកណ្តាលគណបក្សប្រជាជន និង នៅក្នុងកិច្ចប្រជុំគណៈរដ្ឋមន្ត្រី កាលពីថ្ងៃសុក្រ ទី៣០ ខែសីហា ឆ្នាំ២០១៩ កន្លងទៅនេះកន្លងមកនេះ បានប្រកាសធ្វើកំំណែទម្រង់កងទព័ដោយមិនឱ្យកងកម្លាំងប្រដាប់អាវុធទាំងអស់របស់កម្ពុជា មានទាហាន នគរបាល និងកងរាជអាវុធហត្ថ មានងារជា «ឧកញ៉ា» តទៅទៀតនោះទេ។ កងកម្លាំងប្រដាប់អាវុធណា ដែលមានងារជា «ឧកញ៉ា» ធ្វើការជ្រើសរើសជាបន្ទាន់ថាតើត្រូវយកងារ «ឧកញ៉ា» ឬយកតួនាទីរបស់ខ្លួន។
សូមបញ្ជាក់ថាស្រុកខ្មែរដោយសារតែអនុត្តសេដ្ឋកិច្ចទីផ្សារសេរីនិងការគ្រប់គ្រងរដ្ឋបាលសាធារណៈមិនបានល្អបង្កឲ្យមានអំពើពុករលួយឃើញថាឧកញ៉ាកើនឡើងខ្ទង់ពាន់នាក់ទៅហើយសព្វថ្ងៃនេះដែលក្នុងនោះជាក់ស្តែងក្នុងកងទព័ក្នុងជួរមន្ត្រីរាជរដ្ឋាភិបាលសម្បូរឧកញ៉ាណាស់ដែរ៕
