ភ្នំពេញ ៖ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មានបានបង្ហើបឱ្យដឹងថា ឯកឧត្តម នឹងធ្វើជាអធិបតីក្នុងការរៀបចំសិក្ខាសាលាមួយ ស្តីអំពីអ្នកនាំពាក្យនៅតាមបណ្តា ខេត្តនៅ ពេលខាងមុខនេះ។
នេះបើតាមឯកឧត្តម ផៃ ស៊ីផាន រដ្ឋមន្ត្រីប្រតិភូអម នាយករដ្ឋមន្ត្រី និងជាប្រធានអង្គភាពអ្នកនាំ ពាក្យរាជរដ្ឋាភិបាលកម្ពុជា បានជួបពិភាក្សាជាឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មានថ្ងៃទី០៦ ខែកញ្ញា ឆ្នាំ២០១៩ ដើម្បីពង្រឹងកិច្ចសហប្រតិបត្តិការលើការបន្សាបព័ត៌មានក្លែងក្លាយឱ្យមានប្រសិទ្ធភាព។
ឯកឧត្តម បានពិគ្រោះជាមួយឯកឧត្តមរដ្ឋមន្ត្រីពីយុទ្ធសាស្ត្រក្នុងការបញ្ចេញព័ត៌មានប្រកប ដោយប្រសិទ្ធភាព ដើម្បីបន្សាបព័ត៌មាន ក្លែងបន្លំ ដែលនាំឱ្យសាធារណៈជនភាន់ច្រឡំ ដោយ ក្នុងនោះ ក្រុមការងារអ្នកនាំពាក្យត្រូវរៀបចំជាសន្និសីទសារព័ត៌មានជាដើម។ ថ្នាក់ដឹកនាំស្ថាប័នទាំងពីរក៏បានពិភាក្សាពីគោលការណ៍ពង្រឹងសមត្ថ ភាពអ្នកនាំពាក្យនៅតាមខេត្តក្រុង ជាប្រយោជន៍ឱ្យអ្នកទាំងនោះមាន សមត្ថភាពឆ្លើយឆ្លង ជាមួយអ្នកសារព័ត៌មាន ប្រកបដោយវិជ្ជាជីវៈ។
ឯកឧត្តម ផៃ ស៊ីផាន រដ្ឋមន្ត្រីប្រតិភូអម នាយករដ្ឋមន្ត្រី បានបញ្ជាក់ថា រាល់កិច្ចការដែលទីស្តីការសុំយោបល់ពាក់ព័ន្ធវិស័យសារព័ត៌មាន ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មានបានឯកភាពយល់ព្រមសហការល្អ លើការងារក្នុងក្របខ័ណ្ឌ វិស័យសារព័ត៌មាន។ ក្រៅពីកិច្ចសហប្រតិបត្តិការ លើវិស័យព័ត៌មាន ប្រធានអង្គភាព អ្នកនាំពាក្យរាជរដ្ឋាភិបាលកម្ពុជាក៏ឆ្លៀតយកឱកាសនេះ សម្តែងនូវការគោរពចំពោះភក្តីភាព របស់ ឯកឧត្តម រដ្នមន្ត្រី ខៀវ កាញារីទ្ធ ដែលជាថ្នាក់ដឹកនាំមួយរូប តែងតែផ្តល់នូវគុណធម៌ និងសីលធម៌ ប្រកបដោយវិជ្ជាជីវៈ។
ឯកឧត្តម ផៃ ស៊ីផាន ក៏បាន ជម្រាបជូនឯកឧត្តម រដ្នមន្ត្រី ពីការងារបណ្តុះបណ្តាល សារព័ត៌មាន រយៈពេល៣ខែកន្លងមកដែលនិយាយពីកិច្ចការងារសារព័ត៌មាន ជាមួយវិស័យ ផ្សេងៗ ក៏ដូចជាគោល នយោបាយការបរទេសដើម្បីឱ្យអ្នកសារព័ត៌មាន មានសមត្ថភាព ក្នុងការស្វែងរកព័ត៌មានល្អៗមកផ្សព្វផ្សាយជូនសាធារណជនបានជ្រាប៕