កំពត ៖ ថ្ងៃទី៣ ខែកញ្ញា ឆ្នាំ២០១៩នេះលោក ជាវ តាយ អភិបាលខេត្តកំពត បានធ្វើជាអធិបតីក្នុងពិធីផ្លាស់ប្តូប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិព្រែក ចាកខេត្តកំពត ដោយលោក ង៉ែត សាវឿន នាយករងរដ្ឋបាលសាលា ខេត្តកំពត ឲ្យមកកាន់មុខតំណែងជាប្រធានទីស្នាក់ការត្រួតពិនិត្យច្រកទ្វារព្រំដែនអន្តរជាតិព្រែកចាកខេត្តកំពត ជំនួសលោក ឡេង វិបុល ដែលប្រធានទីស្នាក់ការចាស់ឲ្យទៅបម្រើការងារ នៅអង្គភាពដើមវិញ។
លោក ជាវ តាយ អភិបាលខេត្ត បាន មេដឹកនាំច្រកថ្មីនេះអនុវត្ត ឲ្យបានត្រឹមត្រូវនូវការបំពេញតួនាទីភារកិច្ច ស្របតាមច្បាប់លិខិតបទដ្ឋានគតិយុត្តជាធរមាន និងធ្វើកិច្ចសហប្រតិបត្តិការជាមួយភាគីជាមិត្តរវាងកម្ពុជា-វៀតណាម ឲ្យបានល្អថែមទៀត ត្រូវមានសាមគ្គីភាពល្អ ដោយចេះសម្របសម្រួល ក្នុងការផ្ដល់សេវាសាធារណៈប្រកបដោយភាពជឿជាក់ និងទុកចិត្តពីប្រជាពលរដ្ឋរស់នៅជាប់ព្រំដែន ។
ត្រូវចូលរួមលុបបំបាត់ប៉ុស្តិ៍ត្រួតពិនិត្យអនាធិបតេយ្យអោយបាន ពង្រឹងកិច្ចសហប្រតិបត្តិការ បន្ថែមទៀត ជាមួយស្ថាប័ន ពាក់ព័ន្ធ និងកងកម្លាំងសមត្ថកិច្ចនានា ដើម្បីរក្សាការពារបូរណភាពទឹកដី អធិបតេយ្យភាព បង្កើនការគ្រប់គ្រងការចេញចូលឆ្លងកាត់ព្រំដែនទាំងមនុស្ស និងទំនិញឲ្យបានម៉ឺងម៉ាត់ បបន្តពង្រឹងទំនាក់ទំនងកិច្ចសហប្រតិបត្តិការល្អជាមួយអាជ្ញាធរ កងកម្លាំងសមត្ថកិច្ចពាក់ព័ន្ធប្រទេសជិតខាង ដើម្បីប្រែក្លាយតំបន់ព្រំដែនទៅជាតំបន់ប្រកបដោយសន្តិភាព មិត្តភាពសហប្រតិបត្តិការ និងការអភិវឌ្ឍ៕