ភ្នំពេញ៖ និស្សិតភូមិន្ទកសិកម្ម នៃសាកលវិទ្យាល័យភូមិន្ទកសិកម្ម (Royal University of Agriculture, RUA) ចំនួន១៦៩នាក់ នឹងត្រូវចេញដំណើរទៅធ្វើកម្មសិក្សា នៅ ប្រទេសអ៊ីស្រាអែលសម្រាប់ឆ្នាំសិក្សា២០១៩-២០២០ ។
ក្នុងឱកាសសំណេះសំណាលជាមួយនិស្សិតភូមិន្ទកសិកម្មជំនាន់ទី១២ នៅសាកល វិទ្យាល័យភូមិន្ទកសិកម្ម (Royal University of Agriculture, RUA) កាលពីរសៀលថ្ងៃទី៣០ ខែសីហា ឆ្នាំ២០១៩រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម វេង សាខុន បានផ្តល់ អនុសាសន៍សំខាន់ៗមួយចំនួនឱ្យនិស្សិត ត្រូវខិតខំសិក្សា រៀនសូត្រ និងក្រេបជញ្ជក់យកបទពិសោធន៍ ចំណេះដឹង ចំណេះធ្វើទាំងបច្ចេកទេស និងការគ្រប់គ្រង ដើម្បីពង្រឹងសមត្ថភាពរបស់ខ្លួនលើជំនាញបច្ចេកទេសទំនើប (Modern Technology) បច្ចេកវិទ្យាវៃឆ្លាត (SMART Technology) ដើម្បីរត់ឱ្យទាន់សម័យ កាលឧស្សា ហកម្មទី៤ សម័យបច្ចេកវិទ្យាព័ត៌មានវិទ្យា(ICT) និងសម័យបញ្ញាសិប្បនិមិត្ត AI (Artificial Intelligence)ជាដើម។
ឯកឧត្តមរដ្ឋមន្ត្រីក៏បានកោតសរសើរនិងវាយតម្លៃខ្ពស់ចំពោះ RUA ដែលបាន និងកំពុងពង្រឹង និងពង្រីកកិច្ចសហប្រតិបត្តិការយ៉ាងល្អប្រសើរជាមួយក្រុមហ៊ុន Agrostudie ក្នុងការផ្តល់ឱកាសឱ្យនិស្សិតឆ្នាំទី៣ បានទៅចូលរួមធ្វើកម្មសិក្សានៅប្រទេសអ៊ីស្រាអែល ដើម្បីដកស្រង់ផ្លាស់ប្តូរបទពិសោធន៍ទាំងទ្រឹស្តី និងការអនុវត្តជាក់ស្តែងក្នុងបន្ទប់សិក្សា ក្នុងមន្ទីរពិសោធន៍ និងនៅចំការ។
លោក ង៉ោ ប៉ុនថាន សកលវិទ្យាធិកានៃសាកលវិទ្យាល័យ ភូមិន្ទកសិកម្មបានឱ្យដឹងថា សាកលវិទ្យាល័យបានធ្វើសហប្រតិបត្តិការជាមួយក្រុមហ៊ុន Agrostudies លើការបណ្តុះបណ្តាលធនធានមនុស្សផ្នែកកសិកម្មតាំងពីឆ្នាំ២០០៨មក ក្នុងគោលបំណងលើកកម្ពស់ការអប់រំទាំងផ្នែកទ្រឹស្តី និងការអនុវត្តដល់និស្សិតសម្រាប់ រយៈពេល១១ខែ ហើយកិច្ចសហប្រតិបត្តិការនេះមានអាយុ ១២ឆ្នាំហើយ។
សរុបទាំង ១២ជំនាន់ RUA បានបញ្ជូននិស្សិតចំនួន ១០៥៦នាក់។ ក្នុងនោះសម្រាប់វគ្គនេះមាន និស្សិតចំនួន១៦៩នាក់ មកពីសាលាជាតិកសិកម្មព្រែកលៀប និងសាលាជាតិកសិកម្ម កំពង់ចាម ដែលនឹងត្រូវចេញដំណើរនៅក្នុងខែកញ្ញានេះ។ ចំពោះលក្ខខណ្ឌនៃការជ្រើសរើស លក្ខខណ្ឌការងារ ប្រាក់បៀវត្សរ៍ អាហារ ការស្នាក់នៅ និងមុខវិជ្ជាសំខាន់ៗ ដែលតម្រូវឱ្យនិស្សិតរៀនដើម្បីសន្សំក្រេឌីត៕
