ភ្នំពេញ ៖ ជនសង្ស័យសម្លាប់គ្រូបង្រៀនកាលពីវេលាម៉ោង១១៖៣០នាទីយប់ថ្ងៃទី២៧ខែសីហាស្ថិតតាមបណ្ដោយផ្លូវបេតុងច្រកចូលមណ្ឌលកែប្រែឱកាសខ្ញុំ ប្រមាណ៥០០ម៉ែត្រ ក្នុងសង្កាត់ឃ្មួញ ខណ្ឌសែនសុខចាប់ខ្លួនបានហើយគឺប្រពន្ធជនរងគ្រោះ។
លោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខឲ្យដឹងថា នៅថ្ងៃទី៣០ខែសីហានេះថាសមត្ថកិច្ចបានចាប់ខ្លួនជនសង្ស័យជាប្រពន្ធបានហើយពាក់ព័ន្ធការរួមដៃគ្នាជាមួយសាហាយបាញ់សម្លាប់ប្តីជាគ្រូបង្រៀននៅខណ្ឌសែនសុខ ។ ឯជនផ្សំគំនិតជាសាហាយដែលបានរត់គេចខ្លួន សមត្ថកិច្ចកំពុងខិតខំស្វែងរកចាប់ ។
ជនសង្ស័យជាប្រពន្ធរូបនេះ មានឈ្មោះ ឃឿន ស៊ីហ៊ន ហៅស៊ីហ៊ន អាយុ២៦ឆ្នាំ ស្នាក់នៅភូមិសែនសុខ៥សង្កាត់ឃ្មួញ ខណ្ឌសែនសុខ។គេនៅចាំបានថាក្រោយហេតុការណ៍បាញ់សម្លាប់នេះស្ត្រីជាប្រពន្ធបាននៅកន្លែងកើតហេតុហើយបានសម្តែងយំសោកបោកខ្លួនប្រាប់សមត្ថកិច្ចអំពីករណីនេះ។
ប៉ុន្តែការស៊ើបអង្កេតយ៉ាងយកចិត្តទុកដាក់សមត្ថកិច្ចរកឃើញតម្រុយថាប្រពន្ធជាអ្នករួមគំនិតជាមួយសាហាយបាញ់សម្លាប់ប្តីខ្លួនឯងគ្រូបង្រៀន។
តាមសាច់ញាតិជនរងគ្រោះឲ្យដឹងថាជនសង្ស័យជាប្រពន្ធធ្លាប់ក្បត់ប្តីច្រើនដងនិងធ្លាប់ចុះចោលផ្ទះតែប្តីចេះតែអនុគ្រោះឲ្យ។ទីបំផុតឃុបឃឹតគ្នាសម្លាប់ប្តី!។
សូមបញ្ជាក់ថាបុរសជាគ្រូបង្រៀនម្នាក់បានស្លាប់យ៉ាងអាណោចអាធ័មនៅក្បែរម៉ូតូខណៈត្រូវឃាតករបាញ់ប្រហារចំនួន៣គ្រាប់រួចជនបង្កបានរត់គេចខ្លួនចេញពីកន្លែងកើតហេតុបាត់ មានឈ្មោះ រឿន រតនាភេទប្រុសអាយុ៣៣ឆ្នាំមុខរបរគ្រូបង្រៀនវិទ្យាល័យទួលប្រសាទ សង្កាត់ឃ្មួញខណ្ឌសែនសុខស្នាក់នៅភូមិសែនសុខ៥សង្កាត់ឃ្មួញខណ្ឌសែនសខ។
ជនរងគ្រោះជិះម៉ូតូស្កុបពីពណ៌សពាក់ផ្លាកលេខរតនគិរី1E7838ធ្វើដំណើរតាមបណ្ដោយផ្លូវបេតុងក្នុងទិសដៅពីកើតទៅលិចសំដៅមកផ្ទះវិញតាមការហៅរបស់ប្រពន្ធ។តែពេលមកដល់ចំណុចកើតហេតុត្រូវឃាតករត្រៀមស្រេចបាញ់ប្រហារចំនួន៣គ្រាប់បណ្ដាលឲ្យស្លាប់ភ្លាមៗនៅលើដងផ្លូវរួច។ជនបង្កបានចេញពីកន្លែងកើតហេតុបាត់ស្រមោលបន្សល់នៅសំបកកាទុស្យចំនួនមួយនិងជនរងគ្រោះដេកស្លាប់នៅក្បែរម៉ូតូគួរឱ្យរន្ធត់ ៕
