ភ្នំពេញ ៖ លោក សេង សុវណ្ណារ៉ា អនុរដ្ឋលេខាធិការក្រសួងយុត្តិធម៌៣អាណត្តិ ត្រូវបានបញ្ចប់តំណែង ជាអនុរដ្ឋលេខាធិការក្រសួងយុត្តិធម៌និងក្រុមការងារបក្សក្រោយពីផ្ទុះរឿងអាស្រូវ ពាក់ព័ន្ធការឈូសឆាយ និង ទន្ទ្រានយកដីព្រៃចំការស្រស់សាធារណៈរបស់រដ្ឋ ប្រមាណ១ពាន់ហិកតាធ្វើជាកម្មសិទ្ធិផ្ទាល់ខ្លួន នៅចំណុចភូមិអន្ត្រេះ ឃុំអរបួនលើ ស្រុកកោះញែក ខេត្តមណ្ឌលគិរី ។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃកាលពីថ្ងៃទី១៣ ខែសីហា ឆ្នាំ២០១៩ បានចេញសេចក្តីសម្រេចដកលោក សេង សុវណ្ណារ៉ា ចេញពីសមាជិកក្រុមការងារថ្នាក់ជាតិចូលមូលដ្ឋានខេត្តមណ្ឌលគិរី ដាក់ជំនួសដោយលោក មាស ប្រុស ប្រធានរដ្ឋបាលសាលាដំបូងខេត្តមណ្ឌលគិរី ។បន្ទាប់មក នៅថ្ងៃទី២៤ ខែសីហា ឆ្នាំ២០១៩ ព្រះមហាក្សត្រនៃកម្ពុជា ចេញព្រះរាជក្រឹត្យមួយ បញ្ចប់មុខតំណែងលោក សេង សុវណ្ណារ៉ា អនុរដ្ឋលេខាធិការក្រសួងយុត្តិធម៌ តាមសេចក្តីក្រាបបង្ខំទូលថ្វាយរបស់សម្តេតេជោ ហ៊ុន សែន នាយករដ្ឋមន្ត្រីនៃកម្ពុជា ។
ប្រភពព័ត៌មានពីខេត្តមណ្ឌលគិរី បានឲ្យដឹងពីមូលហេតុហេតុអី លោក សេង សុវណ្ណារ៉ា មានការជាប់ពាក់ព័ន្ធករណីឈូសឆាយ និងទន្ទ្រានយកដីព្រៃចំការស្រស់សាធារណៈរបស់រដ្ឋ ប្រមាណ១ពាន់ហិកតាធ្វើជាកម្មសិទ្ធិផ្ទាល់ខ្លួន នៅចំណុចភូមិអន្ត្រេះ ឃុំអរបួនលើ ស្រុកកោះញែក ខេត្តមណ្ឌលគិរី ?។បន្ទាប់ពីផ្ទុះរឿងអាស្រូវនេះក៏មានបែកធ្លាយឯកសារមួយចំនួន ពាក់ព័ន្ធ អាចជាការឃុបឃិតគ្នាប្រព្រឹត្តអំពើពុករលួយជាប្រព័ន្ធ មានតាំងពីមេភូមិ មេឃុំ អភិបាលស្រុកកោះញែក និង លោក ស្វាយ សំអ៊ាង អភិបាលខេត្តមណ្ឌលគិរីជាមួយលោកសេងសុវណ្ណរ៉ា ។
នៅពេលនេះ មជ្ឈដ្ឋានជាច្រើន រង់ចាំមើលថា តើ លោក សេង សុវណ្ណារ៉ា និង អ្នកពាក់ព័ន្ធទាំងអស់នឹងមានវាសនាយ៉ាងដូចម្តេច?ឬគេធើស៊ីត្រឹមតែលោកសេងសុវណ្ណរ៉ាម្នាក់?។ តែបើគេមិនភ្លេចទេទាំងក្នុងកិច្ចប្រជុំគណៈរដ្ឋមន្ត្រីនិងកិច្ចប្រជុំមជ្ឈឹមបក្សសម្តេចតេជោបានតម្រូវឲ្យអង្គភាពប្រឆាំងអំពើពុករលួយ បើកការស៊ើបអង្កេតនិងអនុវត្តអភិក្រមទី៥គឺការវះកាត់មន្ត្រីខឹលខូច ៕
