ភ្នំពេញ ៖ ទណ្ឌឹត ហូរ ចំរើនអតីតឧកញ៉ា ដែលធ្លាប់ត្រូវបានតុលាការប្រកាសផ្តន្ទាទោស ដាក់ពន្ធនាគាររឿងគំរាមបាញ់សម្លាប់ប្រពន្ធនោះ អាឡូវត្រូវបានតុលាការ បានប្រកាសផ្តន្ទាទោសមួយ ករណីទៀត ពីបទឆបោក ដោយសម្រេចដាក់ពន្ធនាគារចំនួន ២ឆ្នាំ ៦ខែ ហើយសម្រេចឲ្យសងលុយទៅដើមបណ្តឹង (ជនជាតិកូរ៉េ) ជាង៩៧លានដុល្លារ។
ការសម្រេចដាក់ទោសទណ្ឌដល់អតីតឧកញ៉ារូបនេះ បានធ្វើឡើងដោយលោក ពេជ្រ វវិជ្ជាធរ ចៅក្រមជំនុំជម្រះ និងលោក កុល បុន ព្រះរាជអាជ្ញារងអមសាលាដំបូងរាជធានីភ្នំពេញ។តុលាការនៅតម្រូវឲ្យឈ្មោះហូចំរើន សងជំងឺចិត្តជូនដើមបណ្តឹងចំនួន ២លានដុល្លារ និងពិន័យចូលរដ្ឋចំនួន៦លានរៀលផងដែរ។
សូមបញ្ជាក់ថា កាលពីព្រឹកថ្ថៃទី១៤ ខែកម្ភ: ឆ្នាំ២០១៩ សាលាឧទ្ធរណ៍បានបើកសវនាការ ប្រកាសសាលដីកាលើសំណុំរឿង អតីតឧកញ៉ា ហូរ ចំរើន ពាក់ព័ន្ធបទល្មើសចំនួន ២ករណី គឺករណីឆបោក និងចេញសែកស្អុយ ដោយសម្រេចមិនអនុញ្ញាតឱ្យអតីតឧកញ៉ារូបនេះ នៅក្រៅឃុំនោះទេ និងបន្តឃុំខ្លួនក្នុងពន្ធនាគារ តាមអំណាចសាលក្រមសាលាដំបូងរាជធានីភ្នំពេញដដែល។សាលាឧទ្ធរណ៍បានបង្វិលសំណុំរឿងជូនសាលាដំបូងរាជធានីភ្នំពេញ ដើម្បីបន្តនីតិវិធី រហូតមានការប្រកាសសាលាក្រមនៅ ក្នុងសវនាការនារសៀលថ្ងៃទី២៧ខែសីហា ឆ្នាំ២០១៩នេះ។
សូមរំលឹកថា អតីតឧកញ៉ា ហូរ ចំរើនដែលជាមន្ត្រីយោធាផងដែលត្រូវបានឃាត់ខ្លួនកាលពីរសៀលថ្ងៃទី១៥ ខែឧសភា ឆ្នាំ២០១៨កន្លងទៅ ត្រូវបានតុលាការសម្រេចផ្តន្ទាទោសដាក់ពន្ធនាគារចំនួន ១៨ខែ ក្នុងបទចោទ ប្រើប្រាស់អាវុធ បាញ់បោះគំរាមសម្លាប់ប្រពន្ធ ប្រព្រឹត្តនៅក្នុងភូមិគ្រឹះ ដ៏ស្តុកស្តម្ភរបស់ខ្លួន ក្បែរគុកព្រៃស។
