ព្រះវិហ៊ា ៖ កងទ័ពកម្ពុជា និងឡាវ កំពុងចរចាគ្នាពីបញ្ហាព្រំដែននៅចំណុចទន្លេរពៅក្នុងតំបន់មុំបីនៃ ស្រុកឆែប ខេត្តព្រះវិហារ។ លោកឧត្តមសេនីយ៍ ម៉ៅ ផល្លាអ្នកនាំពាក្យកងទ័ពជើងគោក ដែលថ្លែងប្រាប់កាសែតថា កងទ័ពឡាវបានលើកគ្នាចូលមកកាន់កាប់ទឹកដីខ្មែរក្នុងចំនុចទន្លេរពៅនេះ តាំងពីថ្ងៃទី១៤ ខែសីហាមកម្ល៉េះ ដោយឡាវសំអាងថានេះជាទឹកដីរបស់គេ។
លោក ម៉ៅ ផល្លា៖ មកដល់ពេលនេះយើងនៅរក្សាលំនឹង មកដល់ពេលនេះយកទាមទារឱ្យដក(ទ័ព)និងដកពាក្យ ដែលថាប្រជាជនកម្ពុជាឈ្លានពានទឹកដី។វាយកផែនទីជាឯកតោភាគីមកសំអាង ដូចកាលថៃយកមកអ៊ីចឹង។មកដល់ពេលនេះ គាត់(លោកហ៊ុន ម៉ាណែត)បានត្រលប់ពីចរចារវិញហើយមេមេជួបគ្នាអស់ហើយ។ យើងព្យាយាមបញ្ចៀសការប៉ះទង្គិចទាំងសងខាង តែយើងរង់ចាំមើលសភាពការណ៍ជាក់ស្ដែងបន្តទៀត។
សូមបញ្ជាក់ដែរថានៅព្រឹកថ្ងៃទី ២៣ សីហានេះ តាមសេចក្តីរាយការណ៍របស់មន្ទីរព័ត៌មាន ខេត្តព្រះវិហារផ្ញើទៅកាន់រដ្ឋមន្ត្រីក្រសួងព័ត៌មានលោក ខៀវ កាញារីទ្ធបានឲ្យដឹងថា កងទ័ពឡាវបានបង្កើនកងកម្លាំងរបស់ខ្លួននៅព្រឹកថ្ងៃទី ២៣ សីហានេះ និងកំពុងបន្តឈរជើងនៅចំណុចទន្លេរពៅ ក្នុងតំបន់មុំ៣ (WA25261-77542) នៃខេត្តព្រះវិហារ ឈមនឹងខេត្តចំប៉ាសាក់ប្រទេសឡាវ។
ចំណែកឯភាគីកម្ពុជាឯណេះវិញ ក៏បានដាក់ពង្រាយកងទ័ពនៅតាមគោលដៅរួចជាស្រេចហើយដែរ។ ករណិយ៍នេះ កាលពីថ្ងៃទី ២២ សីហា លោក ស្រី ឌឹក មេបញ្ជាការកងពលធំលេខ៣ ប្រចាំទិសខេត្តព្រះវិហារ ទើបតែបានប្រជុំផ្សព្វផ្សាយដល់ថ្នាក់ដឹកនាំ និងសមត្ថកិច្ចស្រុកជាំក្សាន្តឲ្យត្រៀមលក្ខណៈជម្លៀសប្រជាជនចំនួន៤ភូមិក្នុងឃុំចំនួនពីរនៃស្រុកជាំក្សាន្ត ខេត្តព្រះវិហារ ក្នុងករណីដែលមានការផ្ទុះអាវុធ។
គួរកត់សម្គាល់ថា ការប្រឈមមុខដាក់គ្នារវាងកងទ័ពកម្ពុជា-ឡាវនេះ បានកើតឡើងតាំងពីថ្ងៃទី ១៤ សីហាមកម្ល៉េះ បន្ទាប់ពីកងទ័ពឡាវបានលើកគ្នាចូលមកកាន់កាប់ទឹកដីខ្មែរក្នុងចំនុចទន្លេរពៅនេះ ដោយសំអាងថា ជាទឹកដីរបស់គេ។ បន្ទាប់មក កាលពីថ្ងៃទី ១៩ សីហា ភាគីទាំងពីរបានជួបចរចារគ្នាចំនួនពីរលើករួចមកហើយ ដោយក្នុងនោះ ភាគីកម្ពុជា បានស្នើសុំឲ្យភាគីឡាវដកចេញពីចំណុចកើតហេតុ (WA25261-77542)។ ប៉ុន្តែភាគីឡាវមិនព្រមដកចេញនោះទេ ហើយថែមទាំងបានអះអាងដោយយោងតាមផែនទីដែលបោះពុម្ពដោយប្រទេសវៀតណាមថា ចំណុចដែលពួកគេបោះទីតាំងនោះ គឺស្ថិតនៅក្នុងទឹកដីឡាវ ដែលមានចំងាយ១គីឡូម៉ែត្រពីព្រំដែន។
មានការកត់សម្គាល់ដែរថាការផ្ទុះឡើងរឿងទាហ៊ានឡាវចូលដីខ្មែរគឺបន្ទាប់ពីលោកសមរង្ស៊ីមេបក្សប្រឆាំងប្រកាសចូលស្រុកវិញនៅថ្ងៃទី៩វិច្ឆិកាឆ្នាំ២០១៩ខាងមុខនេះបើទោះជាមានរឿងអ្វីកើតឡើងក៏ដោយ។កាលពីខែសីហាឆ្នា២០១៧មួយឆ្នាំមុនបោះឆ្នោតសកលចូលមកដល់ បញ្ហាព្រំដែនកម្ពុជា-ឡាវ ធ្លាប់បានជួបភាពតានតឹងខ្លាំងនឹងគ្នាម្តង ដែរ។កាលនោះយោធាឡាវបានចូលមកឈរជើងនៅតំបន់អូរអាឡៃ និងអូរតាង៉ាវ ស្ថិតក្នុងស្រុក សៀមប៉ាង ខេត្តស្ទឹងត្រែង។
ប្រមុខរដ្ឋាភិបាលកម្ពុជាសម្តេច ហ៊ុន សែន ហោះទៅកាន់ទីក្រុងវៀងច័ន្ទន៍ជាបន្ទាន់ ដើម្បីចរចារហើយនៅប៉ុន្មានថ្ងៃក្រោយមក នាយករដ្ឋមន្ត្រីឡាវ លោក ថងលូន ស៊ីស៊ូលីត ក៏បានហោះមកកាន់ទីក្រុងភ្នំពេញវិញដែរ ដើម្បីដោះស្រាយលើបញ្ហាព្រំដែននេះដែរ។ កាលនោះ មេដឹកនាំទាំងពីរ បានឯកភាពគ្នាថា នឹងសរសេរលិខិតផ្ញើទៅកាន់ប្រធានាធិបតីបារាំង ដើម្បីស្នើសុំបញ្ជូនអ្នកជំនាញការព្រំដែនបារាំង ឲ្យមកជួយវាស់វែង និងដោះស្រាយបញ្ហាជម្លោះនៅតាមបន្ទាត់ព្រំដែនរវាងប្រទេសទាំងពីរ ដែលនៅសេសសល់ប្រមាណជា១៦%ទៀត៕
