ភ្នំពេញ ៖ លោកឃួង ស្រេង អភិបាលរាជធានីភ្នំពេញបានអញ្ជើញចុះពិនិត្យស្ថាភាពជាក់ស្ដែងនៅកន្លែងអគ្គិភ័យឆេះរោងចក្រផលិតពូកនៅសង្កាត់បឹងទំពុនទី១ខណ្ឌមានជ័យដែលមិនទាន់ថមថយនៅឡើយកាលពីម៉ោងជាង៤ល្ងាច ថ្ងៃទី២៣ ខែសីហា ឆ្នាំ២០១៩នេះ។
លោកអភិបាលរាជធានីបានណែនាំដល់សមត្ថកិច្ចជំនាញនិងអាជ្ញាធរដែនដីរកគ្រប់មធ្យោបាយពន្លត់អគ្គិភ័យនេះឱ្យបាននិងទប់ស្កាត់កុំឱ្យរាលដាលព្រមទាំងចៀសវាងគ្រោះថ្នាក់កើតឡើង។
គិតមកត្រឹមម៉ោង៦ល្ងាចថ្ងៃ២៣សីហា២០១៩នេះ អគ្គិភ័យដែលឆេះរោងចក្រផលិតពូកនៅភូមិចំរើនផលសង្កាត់បឹងទំពុនទី១ ខណ្ឌមានជ័យ រាជធានីភ្នំពេញ មិនទាន់រលត់ទេ បើទោះជាសមត្ថកិច្ចគ្រប់ផ្នែកនិងក្រុមសង្គ្រោះ ខិតខំប្រឹងពន្លត់ចាប់តាំងពីពេលកើតហេតុ វេលាម៉ោងជិត២រសៀលថ្ងៃដដែលនេះ ។
អគ្គិភ័យនេះកំពុងបន្ដរីករាលដាលទៅកាន់អគារកម្ពស់៦ជាន់ ដែលនៅក្បែរនោះយ៉ាងសន្ធោសន្ធៅខណៈកម្លាំងសមត្ថកិច្ចកំពុងតែអន្ដរាគមន៍សង្គ្រោះ ។
តាមសមត្ថកិច្ចបញ្ជាក់ថា អាគារបេតុងកម្ពស់៦ជាន់ដែលឆេះនេះក៍បានបាត់ស្រុតជាបណ្តើរៗដែរ ប៉ុន្តែមិនមានមនុស្សរងគ្រោះថ្នាក់ទេ ក្នុងនោះអាជ្ញាធរបានជន្លៀសពលរដ្ឋចេញពីកន្លែងកើតហេតុ រកកន្លែងសុវត្ថិភាពជាបណ្តោះអាសន្ន៕
