(បាត់ដំបង) ៖ឡានក្រុងពីរជាន់របស់ក្រុមហ៊ុន រឹទ្ធមុន្នី មួយគ្រឿងត្រូវបានឆាបឆេះទាំងស្រុងដោយពុំដឹងមូលហេតុនិងបណ្តាលឲ្យ ស្ត្រីជាអ្នកដំណើរម្នាក់បានស្លាប់យ៉ាងវេទនានៅក្នុងភ្នក់ភ្លើង នោះ ។ ដែលហេតុការណ៌ខាងលើនេះ បានកើតឡើងនាម៉ោង១០:៤០ នាទីយប់ថ្ងៃទី ៦ ខែសីហា ឆ្នាំ២០១៦ ត្រង់ចំណុចហួស រង្វង់មូលរំសាយសក់ ស្ថិតនៅក្នុងក្រុងបាត់ដំបង ខេត្តបាត់ដំបង ។
អ្នកដែលឃើញហេតុការណ៍បានប្រាប់ថានៅវេលាខាងលើគេបានឃើញឡានក្រុងរបស់ក្រុមហ៊ុន រឹទ្ធមុន្នី ដែលឆេះខាងលើបានបើកចេញពីក្រុងបាត់ដំបង ឆ្ពោះទៅទីក្រុងភ្នំពេញ ស្រាប់តែកំពុងបើកសុខៗគេបានឃើញផ្សែងហ៊ុយចេញពីរថយន្តក្រុងនោះ ហើយបង្កជាអណ្តាតភ្លើងភ្លាមៗផងដែរ ឃើញដូចនោះ អ្នកបើកបរក៏បានឈប់រថយន្ត ឲ្យអ្នកដំណើរដែលជិះនៅក្នុងនោះនាំគ្នារត់ចុះចេញ ពីរថយន្តទាំងភ័យស្លន់ស្លោរ ដោយអ្នកខ្លះពុំបានយករបស់របរចេញទាន់ឡើយ។
បន្ទាប់ពីអ្នកដំណើររត់ចុះហើយគេបានឃើញរថយន្តពន្លត់អគ្គីភ័យចេញមកជួយបាញ់ពន្លត់ផងដែរ តែជួយមិនបាននោះទេធ្វើឲ្យរថយន្តក្រុងនោះនៅតែឆេះទាំងស្រុងដដែល ។
បន្ទាប់ពីឆេះអស់ហើយ អ្វីដែលគួរអោយរន្ធត់នោះ គឺសមត្ថកិច្ចបានឡើងទៅមើលលើរថយន្តក៏ប្រទះឃើញស្ត្រីជាអ្នកដំណើរម្នាក់បានឆេះស្លាប់នៅក្នុងភ្នក់ភ្លើងនោះយ៉ាងវេទនាបំផុត ។
សមត្ថកិច្ចបានបញ្ជាក់ថា ការឆេះនេះពុំទាន់ដឹងថាពីមូលហេតុនៅឡើយទេ ហើយសម្ភារៈដែលខូចខាតនោះ ក៏ពុំទាន់ដឹងដែរ គឺត្រឹមតែដឹងថាមានអ្នកដំណើរជាស្ត្រីម្នាក់បានឆេះស្លាប់នៅក្នុងនោះ ។
ក្រោយកើតហេតុ រថយន្តដែលឆេះនៅសល់តែគ្រោងឆ្អឹងនោះ ត្រូវបានសមត្ថកិច្ចជំនាញចុះមកស្ទួចយកទៅរក្សាទុកនៅការិយាល័យចរាចរណ៍ក្រុងបាត់ដំបងដើម្បីរងចាំខាងតំណាងក្រុមហ៊ុន ចូលមកដោះស្រាយគ្នានៅពេលក្រោយ ៕