ភ្នំពេញ ៖ សម្តេចតេជោ ហ៊ុន សែន ប្រធានគណបក្សប្រជាជនកម្ពុជានៅក្នុងកិច្ចប្រជុំកម្មាធិការកណ្តាល គណបក្សប្រជាជនកម្ពុជា នៅថ្ងៃទី២២ ខែសីហា ឆ្នាំ២០១៩នេះ បានគូសបញ្ជាក់ថា កម្ពុជាត្រូវតែអនុវត្តច្បាប់ចំពោះការវិលត្រឡប់របស់ លោក សម រង្ស៉ី។
នេះបើតាម លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជា។«ពាក់ព័ន្ធនឹងរឿងវិលត្រឡប់របស់ ទណ្ឌិត សម រង្ស៉ី គឺមិនមែនជារឿងរបស់ សម រង្ស៉ី តែម្នាក់ទេ ប៉ុន្តែសម្រាប់យើងគឺត្រូវតែអនុវត្តច្បាប់ ហើយយើងត្រូវតែពង្រឹងស្ថិរភាពនយោបាយ និងសេចក្តីសុខប្រជាពលរដ្ឋ មិនឱ្យបដិវត្តពណ៌កើតឡើងជាថ្មី ដូចអ្វីដែលធ្លាប់ជួប នៅឆ្នាំ២០១៣»។
ការប្រតិកម្មនេះកើតឡើងបន្ទាប់ពីកាលពីថ្ងៃទី១៦ ខែសីហា ឆ្នាំ២០១៩ ទណ្ឌិត សម រង្ស៉ី បានប្រកាសអំពីកាលបរិច្ឆេទត្រឡប់មកកាន់ប្រទេសកម្ពុជា នៅថ្ងៃទី០៩ ខែវិច្ឆិកា ឆ្នាំ២០១៩ ខាងមុខនេះ ដែលចំនឹងថ្ងៃបុណ្យឯករាជ្យជាតិ ។លោក ឈឹម ផលវរុណ បញ្ជាក់ថា «ដូច្នេះរឿង សម រង្ស៉ី មិនមែនជារឿងសមរង្ស៉ីជាបុគ្គលទេគឺពាក់ព័ន្ធនឹងការយកលេសនៃការរំលាយគណបក្សសង្គ្រោះជាតិ ការយកលេសដោយប្រើពាក្យប្រជាធិបតេយ្យ សេរីភាព ប៉ុន្តែលេសទាំងនេះ គឺជាលេសដើម្បីទាញកម្ពុជា ឱ្យធ្លាក់ទៅក្នុងការប្រទាញប្រទង់គ្នារវាងមហាអំណាច និងមហាអំណាចតែប៉ុណ្ណោះ។
ដើម្បីការពារប្រទេសកុំឱ្យធ្លាក់ក្នុងហានិភ័យនេះ គឺសម្តេចតេជោ ហ៊ុន សែន បានលើកឡើងថា កម្ពុជាត្រូវតែប្រកាន់ខ្ជាប់នូវគោលការអព្យាក្រឹត្យ អចិន្ត្រៃយ៍ ដែលចែងក្នុងរដ្ឋធម្មនុញ និងគោលការណ៍ឯករាជ្យ ដោយកសាងប្រទេសដោយខ្លួនឯង មិនអាចឱ្យប្រទេសណាមួយ ទាញកម្ពុជាឱ្យធ្វើតាមខ្លួនបានទេ។
បើតាមលោកសុខឥសាន្តវិញសម្តេចនាយករដ្ឋមន្ត្រី បានបញ្ជាក់ជាថ្មីទៀតថា កម្ពុជាមិនអាចយកអធិបតេយ្យភាពជាតិទៅដោះដូរយកជំនួយ ឬការគាំទ្រណាមួយ ដូចយ៉ាងឋានៈអនុគ្រោះពន្ធ«អ្វីៗទាំងអស់លើកលែងតែអាវុធ» ឬហៅថា EBA របស់សភាពអឺរ៉ុប និងប្រព័ន្ធឋានៈអនុគ្រោះពន្ធទូទៅ GSP របស់សហរដ្ឋអាមេរិកនោះទេ។
ដោយឡែក ក្រៅពីរឿងសមរង្ស៊ីចូលស្រុកសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ក៏បានប្រកាសឲ្យមន្ត្រីនគរបាលយោធា និងកងរាជអាវុធហត្ថជ្រើសរើសរវាងគោរម្យងារជា «ឧកញ៉ា» និងមន្ត្រី?។ លោក ឈឹម ផលវរុណ បានបញ្ជាក់ ថា «នេះជាការបញ្ជាក់អំពីភាពម៉ឺងម៉ាត់ គឺសម្តេចបានបញ្ជាពីកន្លែងប្រជុំព្រឹកមិញនេះតែម្តង គឺលែងឱ្យមានភាព ជាន់គ្នារវាង ងារ «ឧកញ៉ា» និងឋានន្តរស័ក្តិ ឧត្តមសេនីយ៍ វរសេនីយ៍ ក្នុងក្របខណ្ឌប្រដាប់អាវុធ មានដូចជាប៉ូលិស ទាហាន និងកងរាជអាវុធហត្ថទៀតទេ គឺសាម៉ីខ្លួនត្រូវសម្រេចជ្រើសរើស យកមួយ អត់មួយ»។
សម្រាប់ការអនុវត្តនូវអភិក្រមទី៥ នៅក្នុងអាណត្តិទី០៦នេះផងដែរ សម្តេចបានណែនាំចំៗ ទៅអង្គភាពប្រឆាំងអំពើពុករលួយ ដែលដឹកនាំដោយលោកទេសរដ្ឋមន្ត្រី ឱម យ៉ិនទៀង ហើយ សម្តេចចង្អុលចំទៅនាយឧត្តមសេនីយ៍ សៅសុខាពាក់ព័ន្ធនឹងការបង្ក្រាបបទល្មើសព្រៃឈើ ។ សម្តេចបានបញ្ជាឱ្យ រឹបអូសទ្រព្យសម្បត្តិពីជនដែលបំផ្លាញធនធានធម្មជាតិកម្ពុជាផងដែរ ៕
