ភ្នំពេញ ៖ ប្រទះឃើញក្មេងស្រីសាច់សខ្ចីរូបស្រស់ម្នាក់ មានអាយុប្រហែល១៨ឆ្នាំ ក្នុងសភាពមិនប្រក្រតី ដោយមិននិយាយស្តីអ្វីទាំងអស់ ដៃជើងដងខ្លួនញ័រញ៉ាកទទ្រើក មិនដឹងថាត្រូវថ្នាំសណ្ដំអ្វីឬក៏ប្រើប្រាស់ថ្នាំញៀនហួសកម្រិតកាលពីវេលាម៉ោង១និង៣០នាទីរសៀលថ្ងៃអង្គារ ទី២០ ខែសីហា ឆ្នាំ២០១៩ នៅតាមផ្លូវបេតុង១៩៧០ ភូមិពោងពាយ សង្កាត់ភ្នំពេញថ្មី ខណ្ឌសែនសុខ ។
សមត្ថកិច្ចខណ្ឌសែនសុខឲ្យដឹងថា មុនពេលកើតហេតុមានប្រជាពលរដ្ឋក្នុងមូលដ្ឋាន បានរាយការណ៍ប្រាប់ថា មានក្មេងស្រីស្រស់ស្អាតម្នាក់ ស្លៀកខោយឺតជើងវែង ពណ៌ខៀវ អាវយឺត ដៃខ្លី ពណ៌ប្រផេះ មានស្ពាយកាបូបតូចមួយ កំពុងតែឈរនៅតាមបណ្ដោយផ្លូវបេតុង១៩៧០ មិនដឹងថា មានបញ្ហាអ្វីនោះទេ ដោយក្នុងសភាពមិនប្រក្រតី ដោយមិននិយាយស្តីអ្វីទាំងអស់ ដៃជើងដងខ្លួនញ័រញ៉ាកទទ្រើក មិនដឹងថាត្រូវថ្នាំសណ្ដំអ្វី ឬក៏ប្រើប្រាស់ថ្នាំញៀនហួសកម្រិត ។
សមត្ថកិច្ចក៏បានចុះទៅដល់កន្លែងកើតហេតុ រួចនាំនាងយកមកសាលាសង្កាត់ភ្នំពេញថ្មី ដើម្បីសាកសួររកសាច់ញាតិ ។ប៉ុន្តែសួរនាំអស់ជាច្រើនម៉ោងក៏នាងមិនព្រមនិយាយ ទើបសមត្ថកិច្ចសម្រេចចិត្តហៅម៉ូតូរ៊ឺម៉កដឹកបញ្ជូនបន្តទៅមន្ទីរសង្គមកិច្ចរាជធានីភ្នំពេញ ។តែអ្វីដែលហួសចិត្តគឺ ពេលទៅដល់មន្ទីរសង្គមកិច្ចរាជធានីភ្នំពេញ សមត្តកិច្ចរវល់តែចូលទៅធ្វើបែបបទប្រគល់នាងឲ្យទៅខាងមន្ទីរ ស្រាប់តែនាងឲ្យអ្នកបើករ៉ឺម៉កជិះចេញទៅបាត់មិនដឹងថាទៅណានោះទេ ។
សមត្ថកិច្ចខណ្ឌសែនសុខ ក៏ត្រឡប់មកមូលដ្ឋានខ្លួនវិញទៅ? ៕
