មណ្ឌលគិរី ៖លោក ឡោ រស្មី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ចូលបំភ្លឺនៅតុលាការខេត្តមណ្ឌលគីរីនាព្រឹកថ្ងៃទី២១ ខែសីហា នេះចំពោះ៖លោក ហៀង សុភក្ត្រ ព្រះរាជអាជ្ញានៃអយ្យការអមសាលាដំបូងខេត្តមណ្ឌលគិរី ពីដំណើររឿង ពាក់ព័ន្ធករណីការផ្តល់ការអនុញ្ញាតជំហានទី១ចំនួន១.០០០ហិកតា ក្នុងអនុតំបន់ I , អនុតំបន់ II ចំនួន ២,០០០ ហិកតា , អនុតំបន់ III ចំនួន ២;០០០ ហិកតា , អនុតំបន់ IV ចំនួន ២,០០០ ហិកតា និងអនុតំបន់ V ចំនួន ២,៧៤១ ហិកតា ឲ្យទៅក្រុមហ៊ុន ផេស៊ីហ្វិកហ្គេនយ៉ញ-ស្តុកខមភេនីលីមីធីត នៅក្នុងខេត្តមណ្ឌលគិរី ។
លោក ម៉ម វ៉ាន់ដា អ្នកនាំពាក្យអយ្យការអមសាលាដំបូងខេត្តមណ្ឌលគិរី មិនបានប្រាប់ពីចំណាត់ការលោកហៀងសុភក្ត្រយ៉ាងណាទេគ្រាន់តែថា “គាត់បានចូលបំភ្លឺរួចរាល់ហើយ ក្នុងនាមក្រសួង ស្ថានប័នជំនាញ”។លោក ឡោ រស្មីអនុរដ្ឋលេខាធិការក្រសួងកសិកម្ម ត្រូវបានសង្ស័យថា បានអនុញ្ញាតផ្តល់ការអនុញ្ញាតក្រុមហ៊ុន ផេស៊ីហ្វិកហ្គេនយ៉ញ-ស្តុកខមភេនីលីមីធីត នៅក្នុងខេត្តមណ្ឌលគិរី តែក្រុមហ៊ុន នេះ មានការពាក់ព័ន្ធនឹងការកាប់បំផ្លាញព្រៃឈើ និង ដឹកជញ្ជូននាំចេញ។
ពាក់ព័ន្ធបទល្មើសដីធ្លីនៅក្នុងមណ្ឌលគិរីនេះដែរ កាលពីពេលថ្មីៗនេះ លោក ស្វាយ សំអ៊ាង អភិបាលខេត្តមណ្ឌលគិរី ក៏ទើបតែចេញលិខិតដកហូតដីជិត ១.០០០ហិកតា ពីលោក សេង សុវណ្ណារ៉ា អនុរដ្ឋលេខាធិការក្រសួងយុត្តិធម៌ ក្រោយពីសម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្រេចដកលោក សេង សុវណ្ណារ៉ា ចេញពីសមាជិកក្រុមការងារថ្នាក់ជាតិ ចុះជួយខេត្តមណ្ឌលគិរីដោយសារពាក់ពន្ធ័កាន់កាប់ដីធ្លីក្នុងតំបន់ការពារដោយខុសច្បាប់។
គេមិនដឹងថាចំណាត់ការរបស់តុលាការខេត្តមណ្ឌលគីរីខាងលើពាក់ពន្ធ័និងចំណាត់ការរបស់ គណៈកម្មការជាតិដើម្បីទប់ស្កាត់ និង បង្ក្រាបបទល្មើសធនធានធម្មជាតិ ដឹកនាំដោយនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស បង្ក្រាបបទល្មើសព្រៃឈើទ្រង់ទ្រាយធំ ជាបន្តបន្ទាប់ដែរឬអត់នោះទេ? ។
ព្រោះ ក្រៅពីលោក ឡោ រស្មី ក៏មានមន្ត្រីជំនាញរដ្ឋបាលព្រៃឈើ, ថៅកែក្រុមហ៊ុនទទួលដីសម្បទានសេដ្ឋកិច្ចជាជនជាតិចិន, មន្ត្រីក្រសួងមរិស្ថាន និងអ្នកពាក់ព័ន្ធបទល្មើសព្រៃឈើជាង ២០នាក់ទៀត ក៏ត្រូវតំណាងអយ្យការកោះហៅឲ្យចូលខ្លួនបំភ្លឺផងដែរ បន្ទាប់ពីឧកញ៉ា ស៊ឹង សំអុល ឈ្មួញឈើប្រចាំខេត្តមណ្ឌលគិរី និងកូនចៅ៣នាក់ទៀត រួមជាមួយមន្ត្រីជំនាញព្រៃឈើ២នាក់ និងជនជាតិវៀតណាម២នាក់ផង ត្រូវបានតុលាការខេត្តមណ្ឌលគិរីឃុំខ្លួនជាបណ្តោះអាសន្ន ពាក់ព័ន្ធរឿងបទល្មើសព្រៃឈើ។
ទោះជាយ៉ាងណាគេមិនយល់ថាបើរកឃើញបទល្មើសក្នុងអាណាចក្រខេត្តមណ្ឌលគីរីច្រើនចឹងហេតុអីក៏ប្រធានគណបញ្ជាការឯកភាពខេត្តដែលមានអំណាចពេញដៃក្នុងការបង្ក្រាបនិងទប់ស្គា់តអត់មានពាក់ពន្ធ័ចឹងហ្ន!?។