ភ្នំពេញ ៖ បន្ទាប់ពីបញ្ចប់ការសិក្សានៅឯសាកលវិទ្យាល័យន័រតុន កញ្ញា ចិន្តា អតីតនិស្សិតផ្នែក បដិសណ្ឋារកិច្ច និងទេសចរណ៍ ជាមួយនិងមិត្តរួមថ្នាក់ជាច្រើននាក់បានជាប់ជា បាហុនិកា ក្រុមហ៊ុនអាកាសចរណ៍ក្នុងស្រុកមួយ ។ ទទួលបានជោគជ័យមួយជំហានហើយ តែ កញ្ញាចិន្តា មិនបានបញ្ឈប់ត្រឹមនេះទេ គឺនាង បានបន្តការហ្វឹកហាត់ជាពីឡុត(បើកយន្តហោះ)នៅឯក្រៅប្រទេស ទៀត។
បច្ចុប្បន្ន ចិន្តា បានបញ្ចប់ការហ្វឹកហាត់ និង រៀនសូត្របានជោគជ័យ ហើយក៏បានត្រឡប់មកប្រទេសវិញហើយកំពុងហ្វឹកហាត់ការងារជាពីឡុត នៅក្រុមហ៊ុនអាកាសចរណ៍ក្នុងស្រុកមួយ ។ ចិន្តាបាននិយាយថា “អារម្មណ៍ដែលកាន់ចង្កូតបញ្ជាយានដ៏ធំមួយនេះពិតជាអស្ចារ្យណាស់” ហើយនាងក៏ចង់បង្ហាញឲ្យមហាជនបានដឹងថា “មនុស្សស្រីក៏អាចធ្វើការងារនេះបានដែរ!” ។
ចិន្តា ក៏បានជំរុញទឹកចិត្តឲ្យយុវជន-យុវនារីខ្មែរដែលមានសមត្ថភាព និង លទ្ធភាព គួរពិចារណាជំនាញមួយនេះផង ព្រោះបើប្រៀបធៀបទៅប្រទេសផ្សេងទៀត ចំនួនពីឡុតជំនាញជនជាតិខ្មែរ នៅមានកំណត់នៅឡើយ ។
សូមបញ្ជាក់ដែរថាកាលពីឆ្នា២០១៧ក៏មានយុវជនទាំង២រូបនេះ៖១. លឹមស្រេង សេដ្ឋាមុនី បានបញ្ចប់ការសិក្សាលើជំនាញបើកបរយន្តហោះ នៅសាលាដ៏ល្បីល្បាញមួយរបស់អាមេរិក ត្រឹមវ័យ១៩ឆ្នាំ និងបានបញ្ចប់ការហ្វឹកហ្វឺនបើកយន្តហោះខ្នាតធំ Airbus A320 ត្រឹមវ័យ២០ឆ្នាំនៅប្រទេសហ្វីលីពីន។
លឹមស្រេង សេដ្ឋាមុនី ឲ្យដឹងថា ត្រឹមតែរយៈពេល៣ខែប៉ុណ្ណោះ ខ្លួនអាចបើកយន្តហោះខ្នាតធំនេះបាន ពោលគឺត្រឹមខែកុម្ភៈឆ្នាំ ២០១៧ សេដ្ឋាមុនីបានវិលត្រឡប់មកប្រទេសកម្ពុជាវិញ ដោយនាំមកនូវភាពជោគជ័យដ៏ត្រចះត្រចង់ដល់គ្រួសារ និងជាមុខ មាត់សម្រាប់សង្គមជាតិ។ទី២. យុវជនអ៊ុង សុខាណៃ បានបញ្ចប់ការហ្វឹកហ្វឺន បើកយន្តហោះពីប្រទេសហ្វីលីពីននៅ ត្រឹមអាយុ២០ឆ្នាំដែរ ៕