ភ្នំពេញ៖ ចោរកាច់កម៉ូតូមួយរូប បានលួចដោះខ្នោះដៃ រត់គេចខ្លួនបាត់ដោយសុវត្ថិភាពពីបរិវេណសាលាដំបូងរាជធានីភ្នំពេញ ដោយសុវត្ថិភាពកាលពីម៉ោង ៤ និង៥០នាទីរសៀលថ្ងៃទី១៨ ខែសីហា ឆ្នាំ២០១៩បន្ទាប់ពីចៅក្រមចោទប្រកាន់រួច។
ជនជាប់ចោទដែលលួចរត់រួចពីដៃប៉ូលិសមានឈ្មោះ អឹម រតនៈ ហៅ អាកណ្ដុរ ភេទប្រុស អាយុ ៣២ឆ្នាំ មុខរបរ មិនពិតប្រាកដ ជាអតីតមន្ត្រីនគរបាលរដ្ឋបាលបឹងទំពន់ រស់ភូមិព្រែកទាល់ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ។ជនជាប់ចោទត្រូវកម្លាំងនគរបាលប៉ុស្តិ៍ស្ទឹងមានជ័យ១ ឃាត់ខ្លួនកាលពីយប់ថ្ងៃទី១៦ ខែសីហា ឆ្នាំ២០១៩ នៅចំណុចក្រោមស្ពានអាកាសស្ទឹងមានជ័យភូមិមានជ័យ១ ខណ្ឌមានជ័យ រាជធានីភ្នំពេញពេលធ្វើសកម្មភាពលួចកាច់កម៉ូតូរបស់ប្រជាពលរដ្ឋ។
សូមជម្រាបជូនថា លោកព្រះរាជអាជ្ញារង ឡុង ជាប បានបើកការស៊ើបសួរ និងចោទប្រកាន់លើឈ្មោះ អឹម រតនៈ ហៅ អាកណ្ដុរ ពីបទលួច រួចបញ្ជូនសំណុំរឿងទៅចៅក្រមស៊ើបសួរចាត់ការតាមច្បាប់។ជនជាប់ចោទ បានដោះខ្នោះដៃ និងរត់គេចខ្លួន នៅគ្រាដែលនគរបាលព្រហ្មទណ្ឌខណ្ឌមានជ័យ កំពុងរង់ចាំយកដីកាឃុំខ្លួនជនជាប់ចោទ ពីលោកស្រី អ៊ុក រ៉េតគន្ធា ចៅក្រមស៊ើបសួរ និងជាអនុប្រធាន សាលាដំបូងរាជធានីភ្នំពេញ។
មានសេចក្តីរាយការណ៍ថា ការត់គេចខ្លួនរបស់ជនសង្ស័យ និងជនត្រូវចោទ នៅក្នុងបរិវេណសាលាដំបូងរាជធានីភ្នំពេញ មិនមែនទើបតែកើតឡើងលើកនេះនោះទេ ពោលគឺធ្លាប់កើតមានជាញឹកញយណាស់មកហើយ។
