ភ្នំពេញ៖ សហភាពអឺរ៉ុប(EU)នឹងបន្តកិច្ចសហប្រតិបត្តិការយ៉ាងជិតស្និទ្ធជាមួយរាជរដ្ឋាភិបាលកម្ពុជាជាបន្តទៀត។ការអះអាងនេះបានធ្វើឡើងនៅព្រឹកថ្ងៃច័ន្ទ ទី១៩ ខែសីហា ឆ្នាំ២០១៩នេះពេលដែលសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជួបពិភាក្សាការងារជាមួយ លោកជចដេហ្គា( George Edgar) ឯកអគ្គរដ្ឋទូតសហភាពអឺរ៉ុប ដែលបានចប់អណត្តិនៅប្រទេសកម្ពុជា។
លោកជចដេហ្គា( George Edgar) បានមានប្រសាន៍ពីការងារ និងសមិទ្ធផលសំខាន់ៗរបស់ឯកឧត្តមនៅក្នុងរយៈពេល៤ឆ្នាំកន្លងមកនេះ ដែលលោកបានបំពេញការងារជាឯកអគ្គរដ្ឋទូតសហភាពអឺរ៉ុបនៅកម្ពុជា។តាមលោកជចដេហ្គា( George Edgar) EU និងប្រកាសជួយដល់កម្ពុជានៅថ្ងៃពុធខាងមុខនេះ នូវទឹកប្រាក់ជាង១០០លានដុល្លារសម្រាប់វិស័យជលផល ។ រាជរដ្ឋាភិបាលកម្ពុជាបានលុបចោលនូវឡូនេសាទ ហើយផ្ដល់ឲ្យសហគមន៍ប្រជាពលរដ្ឋ ដើម្បីជាផលប្រយោជន៍របស់ប្រជាជនតែម្ដងកាលពីឆ្នាំ២០១២ ហើយ EU បានជួយទៅដល់វិស័យមួយនេះ ដែលនឹងជួយដល់ប្រជាពលរដ្ឋកម្ពុជាផងដែរ។
ឯកអគ្គរដ្ឋទូតចប់អាណត្តិបានគូសបញ្ជាក់អំពីការជួយទៅដល់វិស័យបម្រែបម្រួលអាកាសធាតុដែលប្រទេសកម្ពុជាយើងជាប្រទេសមួយនៅតំបន់អាស៊ីអាគ្នេយ៍ដែលងាយរងគ្រោះដោយបម្រែបម្រួលអាកាសធាតុដែលនេះក៏ជាបញ្ហាពិភពលោកផងដែរ។ មិនតែប៉ុណ្ណោះ EU នឹងបន្តជួយលើវិស័យព្រៃឈើ ដែលបច្ចុប្បន្នជាការងារអាទិភាពរបស់រាជរដ្ឋាភិបាលកម្ពុជា ក្នុងការប្រឆាំងការកាប់បំផ្លាញព្រៃឈើខុសច្បាប់ ។ ឯកអគ្គរដ្ឋទូតចប់អាណត្តិក៏បានអបអរសាទរលើលទ្ធផលការងារក្នុងវិស័យទាំង២នេះ គឺវិស័យជលផល និងព្រៃឈើនេះ ។ EU ក៏បានធ្វើវិភាគទានដ៏ថ្លៃថ្លាទៅដល់តុលាការខ្មែរក្រហមដែលជាតុលាការកូនកាត់ ឱ្យមានភាពជោគជ័យកន្លងមកផងដែរ។
ពាក់ព័ន្ធនឹងដំណើរការរបស់តុលាការខ្មែរក្រហមដែលនឹងមកដល់ទីបញ្ចប់នៅពេលខាងមុខនេះ សម្ដេចតេជោនាយករដ្ឋមន្ត្រី ក៏បានអរគុណចំពោះ EU ដែលបានជួយវិភាគទានក្នុងការស្វែងរកយុត្តិធម៌ចំពោះប្រជាពលរដ្ឋកម្ពុជា ជាពិសេសមិនត្រឹមតែប្រជាពលរដ្ឋដែលបាត់បង់អាយុជីវិតប៉ុណ្ណោះទេ ថែមទាំងជួយដល់ប្រជាពលរដ្ឋរងគ្រោះដែលបានឆ្លងកាត់របបប្រល័យពូជសាសន៍នោះថែមទៀតផង។
EU នឹងបន្តកិច្ចសហប្រតិបត្តិការយ៉ាងជិតស្និទ្ធជាមួយរាជរដ្ឋាភិបាលកម្ពុជាជាបន្តទៀត ជាពិសេសការផ្ដោតទៅលើគ្រប់វិស័យ និងទិដ្ឋភាពនៃទំនាក់ទំនង រវាង EU ជាមួយកម្ពុជា ជាពិសេសការបន្តធ្វើការជាមួយគ្នាក្នុងភាពជាដៃគូនេះ ហើយនៅពេលខាងមុខនេះ កម្ពុជាយើងនឹងធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ីអឺរ៉ុបផងដែរ ដែលនៅពេលនោះ ថ្នាក់ដឹកនាំ រដ្ឋជាសមាជិកនៃសហភាពអឺរ៉ុបជាច្រើន ក៏នឹងអញ្ជើញមកចូលរួមកិច្ចប្រជុំកំពូលនោះផងដែរ៕