ឧត្តរមានជ័យ ៖ សង្ឃជាចៅអធិការវត្តមួយអង្គត្រូវបាននគរបាលខេត្តឧត្តរមានជ័យ បានធ្វើការឃាត់ខ្លួននារសៀលថ្ងៃទី១៦ ខែសីហា ឆ្នាំ២០១៩ពាក់ព័ន្ធថា បានសម្លាប់អ្នករត់ម៉ូតូឌុប មូលហេតុខឹងជនរងគ្រោះទារប្រាក់ជំពាក់ចំនួន៤ ៥០០ដុល្លារអាមេរិក និងដឹងរឿងព្រះចៅអធិការវត្តអង្គនោះមានស្រីញី។
ស្នងការនគរបាលខេត្តឧត្តរមានជ័យ លោកឧត្តមសេនីយ៍ទោ ម៉ែន លី បានប្រាប់សារពត៍មានឲ្យដឹងថា ថាករណីឃាតកម្មនេះ បានកើតឡើងតាំងពីថ្ងៃទី១៤ ខែសីហាមកម្លេះ ប៉ុន្ដែទើប ក ម្លាំងសមត្ថកិច្ចបានកំណត់មុខសញ្ញាបាន និងឈានទៅដល់ឃាត់ខ្លួនជនដៃដល់ ដែលជាព្រះសង្ឃនាម ឆាយ ឡុង ព្រះជន្ម២៧វស្សា តែម្តង។
មូលហេតុដែលនាំឲ្យមានអំពើឃាតកម្មនេះ គឺបណ្ដាលមកពីព្រះសង្ឃ ខឹងជនរងគ្រោះដែលជាអ្នករត់ម៉ូតូឌុបដឹងថាខ្លួនលួចមានស្រីស្នេហ៍ ដែលជាទង្វើខុសនឹងវិន័យរបស់សង្ឃ។ ហេតុផលមួយទៀត គឺព្រះសង្ឃឃាតក ក៏បានខ្ចីលុយជនរងគ្រោះជាង៤០០០ដុល្លារ ប៉ុន្ដែគ្មានលុយសងផងដែរ។
បើតាមលោកឧត្តមសេនីយ៍ស្នងការ គឺកាលពីថ្ងៃទី១៤ ខែសីហា ឆ្នាំ២០១៩ កម្លាំងសមត្ថកិច្ចនគរបាល បានទទួលបណ្តឹងពីប្រជាពលរដ្ឋដែលជាក្រុមគ្រួសាររបស់ជនរងគ្រោះថា គាត់បានបាត់ប្តីរបស់គាត់ចេញទៅរត់ម៉ូតូឌុប មិនឃើញត្រឡប់មកវិញ។
លុះនៅព្រឹកថ្ងៃ១៥ ខែសីហា បានរកឃើញម៉ូតូរបស់ជនគ្រោះ និងសម្លៀកបំពាក់របស់ជនរងគ្រោះ ត្រូវបានគេយកទៅបោះចោលនៅស្ពានខាង លិចទីរួមស្រុកអន្លង់វែង តាមបណ្តោយផ្លូវហាយវេក្នុងកំពតព្រៃ ម៉ូតូមានប្រឡាក់ទៅដោយឈាម ។ក្រោយមកកម្លាំងជំនាញ បានធ្វើការស្រាវជ្រាវស៊ើបអង្កេតយ៉ាងយកចិត្តទុកដាក់ រហូតមកដល់រសៀលថ្ងៃទី១៦ ខែសីហា ឆ្នាំ២០១៩នេះ សមត្ថកិច្ចបានកំណត់មុខសញ្ញាជនសង្ស័យ ចំនួន២នាក់ ដោយម្នាក់ជាព្រះសង្ឃជាចៅអធិការវត្ត និងម្នាក់ទៀតជាប្អូនបង្កើតរបស់ព្រះសង្ឃ។
ជនសង្ស័យ ជាសង្ឃព្រះនាម ឆាយ ឡុង ព្រះជន្ម២៧វស្សា បានសារភាពថា លោកពិតជាបានវាយសម្លាប់ជនរងគ្រោះឈ្មោះ ដាត់ ហាត់ ជាអ្នករត់ម៉ូតូឌុបស្លាប់ពិតប្រាកដមែន វាយដោញញួត្រង់កញ្ចឹងក និងបាននាំសមត្ថកិច្ចទៅចង្អុលបង្ហាញសាកសពនៅក្នុងព្រៃ។ ទោះជាយ៉ាងណាជនសង្ស័យសារភាពថា លោកប្រព្រឹត្តតែអង្គឯងពុំពាក់ពន្ធ័និងប្អូនលោកនោះទេ។កម្លាំងនគរបាលជំនាញបានសុំមន្ទីរធម្មការនិមន្តព្រះ សង្ឃធ្វើពិធីផ្សឹកតាមបែបពុទ្ធសាសនារួចធ្វើការឃាត់ខ្លួនតាមនីតិវិធី៕