ខេត្តប៉ៃលិន៖ នៅព្រឹកថ្ងៃទី០៥ ខែសីហា ឆ្នាំ២០១៦ មន្ទីរកសិកម្មខេត្ត បានចែកពូជពោតCP ចំនួន៣៨០ ការ៉ុង និងពូជស្រួវចំនួន១០០០គឺឡូក្រាម ដល់សហគមន៍អភិវឌ្ឍន៍កសិកម្មនៅក្នុងខេត្តប៉ៃលិនចំនួន២៥ ដើម្បីយកទៅចែកដល់កសិករដែលទទួលរងគ្រោះដោយសារគ្រោះធម្មជាតិ ។
ពិធីចែកពូជពោត និងពូជស្រួវ ដល់សហគមន៏នេះ ស្ថិតក្រោមអធិបតីភាព លោក អៀង វុធ អភិបាលរង នៃគណៈអភិបាលខេត្តប៉ៃលិន តំណាងដ៏ខ្ពង់ខ្ពស់លោក កើត សុធា អភិបាលនៃគណៈអភិបាលខេត្ត និងមានការអញ្ជើញចូលរួមពីលោក សាយ សុផាត ប្រធានមន្ទីរកសិកម្មខេត្តប៉ៃលិន ,លោក ឡូ លុយ អភិបាលរងក្រុងប៉ៃលិន ,អភិបាលរងស្រុកសាលាក្រៅ ព្រមទាំងតំណាងសហគមន៏ លោកមេភូមិ ប្រជាពលរដ្ឋយ៉ាងច្រើនកុះករ ។
លោក សាយ សុផាត ប្រធានមន្ទីរកសិកម្មខេត្តប៉ៃលិន បានឲ្យដឹងថា៖ នៅដើមរដូវវស្សាឆ្នាំ២០១៦ នេះ កសិករក្នុងខេត្តប៉ៃលិន ដែលពួកគាត់ធ្វើការដាំដំណាំពោតក្រហម នៅចន្លោះខែឧសភា និងខែមិថុនា បានទទូលរងដោយគ្រោះរាំងស្ងួតនៅតាមតំបនមួយចំនួន ធ្វើឲ្យខូចខាតដំណាំពោតក្រហមចំនួន៣០៩ហិកតា គិតជាថវិកាដែលបានចំណាយទៅលើផលិតកម្មគឺចំនួន៤៦៣៥០ ដុល្លាអាមេរិច ។
លោកបន្តឲ្យដឹងថា៖ ដោយទទួលសំណើរពីសហគមន៏អភិវឌ្ឍន៏កសិកម្ម និងដើម្បីជួយដល់កសិករឲ្យបានទាន់ ពេលវេលា មន្ទីរកសិកម្មខេត្ត បានទិញពូជពោតពីក្រុមហ៊ុន ស៊ីភី ចំនួន៣៨០ការ៉ុង និងពូជស្រូវចំនួន១០០០គីឡូក្រាម យកទៅចែកជូនដល់កសិករដែលជាសមាជិកសហគមន៍ រងគ្រោះខូចខាតធ្ងន់ធ្ងរជាងគេ ។លោកបានបញ្ជាក់ថា៖ ខេត្តប៉ៃលិន មានផ្ទៃដីកសិកម្មចំនួន៥៧៥០០ហិកតា ក្នុងនោះដីសម្រាប់ធ្វើចំការចំនួន ៤៧៥០០ហិកតា ,ចំណែកដីស្រែចំនួន ១០០០០ហិកតា ហើយនៅឆ្នាំ២០១៦នេះ កសិករដាំដុះដំណាំពោតក្រហម ចំនួន១៩៨៥ហិកតា ,ដំណាំដំឡូងមី ចំនួន ៥៩០៧ហិកតា ព្រមទាំងធ្វើស្រែវស្សា ចំនួន៥៤០០ហិកតាផងដែរ ។
លោក អៀង វុធ អភិបាលរង នៃគណៈអភិបាលខេត្តប៉ៃលិន តំណាងដ៏ខ្ពង់ខ្ពស់លោក កើត សុធា អភិបាលនៃគណៈអភិបាលខេត្ត បានមានប្រសាសន៍លើកឡើងថា៖ រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចាត់ទុកវិស័យកសិកម្ម ជាផ្នែកមួយយ៉ាងសំខាន់ ដើម្បីស្តារខឿនសេដ្ឋកិច្ចជាតិ ឲ្យបានរីកចំរើន ព្រោះថាកម្ពុជា ជាប្រទេសដែលមានសក្តានុពល លើផ្នែកកសិកម្ម ដោយប្រជាពលរដ្ឋជាង៨០% ជាកសិករប្រកបរបរកសិកម្ម ដូចនេះការឧបត្ថម្ភពូជពោត និងពូជស្រួវដល់កសិករនាពេលនេះ គឺជាការចូលរួមចំណែកយ៉ាងសំខាន់ដល់កសិករ ក្នុងការបង្កបង្កើតផលឲ្យទាន់រដូវកាល ។ លោក បានសំណូមពរដល់កសិករទាំងអស់ ត្រួវយកពូជពោត និងពូជស្រូវទាំងនេះ ទៅដាំដុះតាមបច្ចេកទេស និងឲ្យបានទាន់រដូវកាល ដើម្បីឲ្យដាំណាំដុះលូតលាស់បានល្អ ហើយទទូលបានទិន្នផលខ្ពស់ផងដែរ ៕
អត្ថបទ ទូច សុខន
