ភ្នំពេញ ៖ ជនសង្ស័យរឿងឆបោកចូលក្របខណ្ឌ័ទាហ៊ានពីររូបដែលប្រើឈ្មោះឧត្តមសេនីយ៍យឹមលាងអតិតមេបញ្ជាការអង្គរក្ស័សពសម្តេចជាស៊ីម ត្រូវបានអាវុធហត្ថរាជធានីភ្នំពេញ បញ្ជូនទៅតុលាការនាព្រឹកថ្ងៃទី១៣ ខែសីហា ឆ្នាំ២០១៩ ។
ជនសង្ស័យទី១មានឈ្មោះថា ប៊ិន ឡាច ហៅ វ៉ែន សារ៉ាត់ ភេទប្រុស ឆ្នាំកំណើត១៩៦២ ត្រូវបានឃាត់ខ្លួនកាលពីថ្ងៃទី០៩ ខែសីហា ឆ្នាំ២០១៩ និងជនសង្ស័យទី២ឈ្មោះ ឈ្មោះ តុប គឹមហុង ហៅ យឹម ឈុនហុង ភេទប្រុស ឆ្នាំកំណើត១៩៧៣ ត្រូវបានឃាត់ខ្លួននៅព្រឹកថ្ងៃទី១២ ខែសីហា ឆ្នាំ២០១៩ ។
សមត្ថកិច្ចអាវុធហត្ថរាជធានីភ្នំពេញបានបង្ហើបឲ្យដឹងថា ជនសង្ស័យ បានសារភាពថា ឈ្មោះ តុប គឹមហុង បានប្រើល្បិច ប្តូរឈ្មោះជា យឹម គឹមហុង កុហក់ជនរងគ្រោះថាជាបងប្អូនជីដូនមួយរបស់ឧត្តមសេនីយ៍ យឹម លាង ព្រមទាំងកុហក់ជនរងគ្រោះទៀតថា នៅពេលឆាប់ៗខាងមុខនេះ លោក យឹម លាង នឹងទៅកាន់អគ្គនាយកដ្ឋានវិស្វកម្ម ដោយបង្កើតនាយកដ្ឋានថ្មីចំនួន០៦ ត្រូវការជ្រើសបុគ្គលិកចំនួន៣០០នាក់ ហើយគេអាចបញ្ចូលក្របខណ្ឌបាន តែត្រូវចំណាយប្រាក់ទៅតាមឋានន្តរសក្តិ ក្នុងនោះថ្នាក់វរសេនីយ៍ តម្លៃ ៥,៥០០$ ទៅ ៦,០០០$។ ថ្នាក់អនុសេនីយ៍ឯក តម្លៃ ៤,៥០០$ ទៅ ៥,០០០$ ។ថ្នាក់អនុសេនីយ៍ទោ តម្លៃ ៣,៥០០$ ទៅ ៤,០០០$ ថ្នាក់អនុសេនីយ៍ត្រី តម្លៃ ២,០០០$ ទៅ ២,៥០០$ និង ថ្នាក់ពលទាហាន តម្លៃ ៧០០$ ទៅ ១,០០០$។
ពួកគេបានធ្វើសកម្មភាពបែបនេះ ឆបោកប្រាក់ ពីជងរងគ្រោះ សរុបប្រមាណ១០០នាក់ហើយ តែពុំមានជនរងគ្រោះណាម្នាក់បានចូលក្របខណ្ឌឡើយ ។ព័ត៌មាននេះ បានឮដល់ឯកឧត្តម យឹម លាង ឯកឧត្តម ក៏ប្តឹងមក កងរាជអាវុធហត្ថរាជធានីភ្នំពេញ ឲ្យធ្វើការស្រាវជ្រាវ រហូតឈានដល់ធ្វើការឃាត់ខ្លួនជនសង្ស័យតែម្តង៕
