ខេត្តស្ទឹងត្រែង ៖គ្រាប់ត្នោតចំនួន៣ម៉ឺនត្រូវបានថ្នាក់ដឹកនាំខេត្តស្ទឹងត្រែង នាំយកទៅដាំនៅតាមខ្សែបន្ទាត់ព្រំដែនកម្ពុជា-ឡាវនៅចំនុចបង្គោលព្រំដែនលេខ០៤០ និង០៤២ កាលពីព្រឹកថ្ងៃទី១១ សីហាម្សិលម៉ិញ ។លោក ម៉ុម សារឿន អភិបាលខេត្តស្ទឹងត្រែង បានមានប្រសាសន៍ថា:ដើមត្នោតជារុក្ខជាតិដែលផ្តល់នូវគុណសម្បត្តិយ៉ាងច្រើនដល់ប្រជាជនខ្មែរ តាំងពីសម័យបុរាណកាលមក តំណាងឲ្យអត្តសញ្ញាណជាតិខ្មែរនិងជាដួងប្រលឹងជាតិ ដែលប្រជាជនខ្មែរ បានសំគាល់នូវទឹកដីរបស់ខ្លួន ពីបុរាណកាលរហូតមកដល់បច្ចុប្បន្ននេះ ។
សកម្មភាពដាំដើមត្នោតនាពេលនេះគឺជាសកម្មភាពប្រវត្តិសាស្ត្ររបស់ខេត្តស្ទឹងត្រែង ក្នុងការបង្ហាញពីវប្បធម៌ដ៏ផូរផង់របស់ជាតិ និងការថែរក្សាអត្តសញ្ញាណនៃដួងប្រលឹងជាតិ ក៏ដូចជាក្នុងការការពារអធិបតេយ្យភាពជាតិ និងបំផុសផ្នត់គំនិតឲ្យក្មេងជំនាន់ក្រោយៗទៀត ឲ្យចេះស្រលាញ់នូវអ្វីដែលជាអត្តសញ្ញាណជាតិ និងដួងព្រលឹងរបស់ជាតិខ្មែរយើង ។
លោក ព្រំ ចាន់ថា ប្រធានមន្ទីរអភិវឌ្ឍន៍ជនបទបានឲ្យដឹងថា:ការដាំដើមត្នោតនេះ គឺជា លើកទី២ហើយ ដែលមន្ទីរអភិវឌ្ឍន៍ជនបទ បានសហការជាមួយរដ្ឋបាលខេត្ត និងមន្ទីរជាច្រើនទៀត រួមគ្នារៀបចំពិធីនេះឡើង ទៅដាំនៅតាមបណ្តោយខ្សែរក្រវ៉ាតព្រំដែន កម្ពុជា-ឡាវ ស្ថិតនៅត្រង់ចំនុចបង្គោលព្រំដែនលេខ០៤០ និង០៤២ ក្នុងភូមិសាស្ត្រ នៃស្រុកបូរីអូរស្វាយសែនជ័យ និងស្រុក សៀមប៉ាង ខេត្តស្ទឹងត្រែង ៕
