ភ្នំពេញ ៖លោក សេង គឹមឡាក់ តំណាងអយ្យការអមសាលាដំបូងរាជធានីភ្នំពេញនៅថ្ងៃទី១២សីហាបានចេញដីកាកោះហៅលោក សម រង្ស៊ី ជាលើកទី២ ឱ្យចូលបំភ្លឺនៅថ្ងៃទី២៨ សីហា ឆ្នាំ២០១៩ខាងមុខករណីញុះញង់ តាមបណ្តឹងរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
ដីកាកោះហៅលើកទី២ ត្រូវបានសមត្ថកិច្ច យកទៅបិទនៅផ្ទះរបស់ លោក សម រង្ស៉ី នៅសង្កាត់ចាក់អង្រែ ខណ្ឌមានជ័យ រាជធានីភ្នំពេញ នៅព្រឹកថ្ងៃទី១២ ខែសីហា ឆ្នាំ២០១៩នេះ។លោក សម រង្ស៊ី ចោទប្រកាន់ថា សម្តេច(ក្រឡាហោម)មានបំណងគាំទ្រលោក ឌី វិជ្ជា កូនប្រសារសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដើម្បីសងសឹកសម្តេចតេជោ ពាក់ព័ន្ធការស្លាប់របស់លោក ហុក ឡុងឌី អតីតអគ្គស្នងការនគរបាលជាតិដែលត្រូវជាឪពុកបង្កើត ។
ករណីយ៍នេះ តំណាងរាស្ត្រអតីតគណបក្ស សង្គ្រោះជាតិ លោក ហូរ វ៉ាន់ បានប្រតិកម្មតាមហ្វេសប៊ុកថា តើចាំបាច់ចេញដីកា កោះហៅ លោក សម រង្ស៊ីធ្វើអ្វី បើលោកសម រង្ស៊ីនៅប្រទេសបារាំង ហើយថា បើចង់ប្តឹងគួរប្តឹង ទៅតុលាការ បារាំងល្អជាង ។លោក ហូរ វ៉ាន់ “ដីកាអ្វីទៅមិនដឹងសាកសួរពីបទអ្វីទេ ហើយឲ្យចូលខ្លួនយ៉ាងម៉េចទៅ? បើដឹងទាំងអស់គ្នាថា គាត់( សម រង្ស៊ី) នៅស្រុកបារាំង ម៉េចក៏មិនប្ដឹងតុលាការបារាំង? ខ្លាចអី? ឬអាងតែមានតុលាការអាយ៉ង ចាំតែចេញដីកាចាប់បក្សប្រឆាំង យកទៅដាក់គុក?”។
លោកហូវ៉ាន់ថា “គ្រប់គ្រងរដ្ឋអ្វីទៅបើធ្វើបាយឡុក បាយឡ គ្រប់តែរឿងតាំងពីចាប់ កឹម សុខា ចាប់យុវជនភ្នំពេញ១៣នាក់ដាក់គុកលេង ចាប់តំណាងរាស្ត្រ៧នាក់ ដាក់គុកលេង វាយតំណាងរាស្ត្របែកមុខមាត់លេង និងរាប់រយរឿងទៀតដែលខ្ញុំដឹងការ ពិតពេលជាប់គុកព្រៃស។ ឱតុលាការខ្មែរអើយងាប់រាស្ត្រស្លូតត្រង់អស់ហើយ។ មិនដឹងអាងអី? អាងតែសម្ដេច១គត់។ ចុះបើសម្ដេចអស់បុណ្យតើគិតម្ដេចទៅ?”។
ទោះបីជាអគ្គស្នងការនគរបាលជាតិចេញបទបញ្ជារត្រឿមកម្លាំងអនុវត្តន៍ដិការតុលាការដើម្បីចាប់ខ្លួនក៏ដោយក៏អ្នកនាំពាក្យរាជរដ្ឋាភិបាលលោកផៃស៊ីផាននៅថ្ងៃទី១២សីហានេះដែរ បានស្វាគមន៍ ចំពោះការធ្វើមាតុភូមិនិវត្តន៍ របស់លោក សម រង្ស៊ី ដែលមកឆ្លើយតប នឹងកាតព្វកិច្ចយុត្តិធម៌ ចំពោះមុខតុលាការ ដែលប្រជាពលរដ្ឋ ក្នុងសង្គមទំនើប និងស៊ីវិល័យ តែងតែអនុវត្តនូវកាតព្វកិច្ចនេះ ។
លោកផៃស៊ីផានបានលើកឡើងទៀតថា កម្ពុជាជារដ្ឋឯករាជ្យ ប្រកបដោយអធិបតេយ្យភាព ពេញលេញ ។ ពលរដ្ឋបានជ្រើសរើស នូវការទទួលខុសត្រូវជោគវាសនារបស់ខ្លួនមានចំនួន៦អាណត្តិរួចមកហើយ ប្រកបដោយនីតិរដ្ឋដែលមានស្ថាប័នប្រជាធិបតេយ្យបីគឺ នីតិប្បញ្ញត្តិ នីតិប្រតិបត្តិ និងអំណាចតុលាការ កំពុងដំណើរការប្រកប ដោយថាមពល និងទទួលខុសត្រូវ ក្នុងដែនអំណាចរបស់ខ្លួន ដាច់ដោយឡែកពីគ្នា ហើយមិនមានអំណាច ឬឥទ្ធិពល ពីជន ឬក្រុម និងបរទេសណាមួយជ្រៀតជ្រែកក្នុងដែនសមត្ថកិច្ចនេះបានឡើយ ។
