រាជធានីភ្នំពេញ ៖ គិតមកដល់ឆ្នាំ២០១៩គឺ៤០ឆ្នាំក្រោយពីបានរំដោះប្រជាពលរដ្ឋខ្មែរដែលតាមប៉ាន់ស្មានសល់តែជាង៤លាននាក់នោះអាឡូវកើនដល់ជាង១៥លាននាក់ហើយ។នេះបើតាមការប្រកាសរបស់សម្តេចក្រឡាហោម ស ខេងឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃកាលពីព្រឹកថ្ងៃទី០៧ ខែសីហា ឆ្នាំ២០១៩ដោយយោងតាមលទ្ធផលនៃការជំរឿនប្រជាជនទូទាំងប្រទេសកម្ពុជា ដែលបានធ្វើឡើងកាលពីថ្ងៃទី០៣ ខែមីនា ឆ្នាំ២០១៩ ។
លទ្ធផលបណ្តោះអាសន្នបង្ហាញថា ប្រជាជនសរុបតាមវិធីសាស្ត្រ ឃើញរាប់ (De-facto)មានចំនួន១៥.២៨៨.៤៨៩ នាក់ ក្នុងនោះមានប្រុស៧,៤១៨,៥៧៧នាក់ និងស្រី៧,៨៦៩,៩១២នាក់។ទោះជាយ៉ាងណាលទ្ធផលខាងលើជា តួលេខបណ្តោះអាសន្ន ជំរឿនទូទៅប្រជាជននៅកម្ពុជា ឆ្នាំ២០១៩ ។សម្ដេច ស ខេង បានប្រកាសផ្សាយតួលេខបណ្តោះអាសន្ននៃចំនួនគ្រួសារ ចំនួនប្រជាជនតាមភេទ ខេត្ត-ក្រុង និងដង់ស៊ីតេប្រជាជន ដែលអាចប្រើប្រាស់បានជាបណ្តើរៗរហូតដល់ការចុងក្រោយ នៃការធ្វើជំរឿនទូទៅប្រជាជន ដែលគ្រោងនឹងធ្វើនៅត្រីមាសទី២ ឆ្នាំ២០២០ ខាងមុខនេះ។
សម្ដេច ស ខេង ថា តាមតួលេខបណ្តោះអាសន្ននេះ ពិនិត្យឃើញចំនួនប្រជាជនកម្រិតថ្នាក់ជាតិ មាននិន្នាការកើនឡើងយឺតដោយសារអត្រាផ្តល់កំណើត និងអត្រាកំណើន ប្រជាជនបានថយចុះ ស្របតាមការព្យាករណ៍ដែលបានរំពឹងទុក។ អត្រាកំណើនប្រជាជនប្រចាំឆ្នាំបានថយចុះពី១,៥ភាគរយ ក្នុងចន្លោះឆ្នាំ១៩៩៨ និងឆ្នាំ២០០៨ មក១,២ ភាគរយក្នុងចន្លោះឆ្នាំ២០០៨ និងឆ្នាំ២០១៩។
អត្រាកំណើនប្រចាំឆ្នាំ របស់កម្ពុជាក្នុងទសវត្ស ចុងក្រោយនេះ ពិនិត្យឃើញខ្ពស់ ជាងអត្រាកំណើនមធ្យម នៅអាស៊ីអាគ្នេយ៍ ដែលមានតែ១.០ ភាគរយ។ រាជធានី-ខេត្តមានចំនួន ប្រជាជនច្រើនជាងគេបំផុត គឺភ្នំពេញមានចំនួន ២.១២៩.៣៧១ នាក់ ខណៈខេត្តកែបមានប្រជាជនតិចជាងគេ បំផុត ៤១.៧៩៨នាក់ ប៉ុណ្ណោះ។ ចំណែកដង់ស៊ីតេប្រជាជន ស្មើនឹង៨៦ នាក់ ក្នុងផ្ទៃដីមួយគីឡូម៉ែត្រការ៉េ នៅឆ្នាំ២០១៩។
សម្ដេចក្រឡាហោម បញ្ជាក់ឲ្យដឹងដែរថា បើពិនិត្យតាមតំបន់ភូមិសាស្ត្រនៃប្រទេស តួលេខបណ្តោះអាសន្ននៃជំរឿនប្រជាជនឆ្នាំ២០១៩ បានបង្ហាញថា ប្រជាជនប្រមាណ៤៨,៩ភាគរយ នៃប្រជាជនទាំងអស់រស់នៅតំបន់ទំនាបកណ្តាល ដោយសារតំបន់នេះប្រមូលផ្តុំដោយខេត្តធំៗ ដែលមានការអភិវឌ្ឍខ្ពស់។ បន្ទាប់មកតំបន់ទន្លេសាបមានប្រជាជនប្រមាណ៣១,៤ភាគរយនៃប្រជាជនទាំងអស់នៃតំបន់ខ្ពង់រាប និងភ្នំមាន១២,៧ភាគរយ ចំណែកតំបន់ឆ្នេរ និងសមុទ្រមាន៦,៩ ភាគរយ៕
