ភ្នំពេញ៖ ឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាលត្រូវបានសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ ចេញសម្រេចអនុវត្តវិន័យក្រោមរូបភាព ព្រមានលើកទី១ ដោយមូលហេតុ«ខ្វះការយកចិត្តទុកដាក់លើការគ្រប់គ្រងនិងដឹកនាំ»។
យោងតាមប្រកាសស្តីពីការអនុវត្តវិន័យចំពោះមន្ត្រីនគរបាល ចុះថ្ងៃទី២៥ ខែកក្កដា ឆ្នាំ២០១៩ ដែលចុះហត្ថលេខាដោយសម្តេច ស ខេង បានគូបញ្ជាក់ថា លោក អ៊ាវ ចំរើន ត្រូវកែប្រែកំហុសឆ្គង និង ឥរិយាបថដឹកនាំរបស់ខ្លួនឲ្យបានត្រឹមត្រូវ។ ក្នុងករណីនៅតែប្រព្រឹត្តផ្ទុយពីការណែនាំទៀតនោះ នឹងចាត់វិធានការតាមវិន័យរបស់កងកម្លាំងនគរបាលជាតិ។
ការសម្រេចអនុវត្តវិន័យនេះ ធ្វើឡើងបន្ទាប់ពីមានលិខិតអនាមិកមួយប្តឹងលោក អ៊ាវ ចំរើន ទៅសម្តេចក្រឡាហោម ស ខេង ដោយបកអាក្រាតថា លោកស្នងការនគរបាលខេត្តកណ្តាលរូបនេះ បានប្រើអំណាចផ្តាច់ការ ធ្វើបាបកូនចៅ និងប្រព្រឹត្តអំពើពុករលួយរហូតដល់ចំនួន១៦ចំណុច។ លោក អ៊ាវ ចំរើន បានប្រកែកថា ករណីខាងលើ គឺធ្វើឡើងក្នុងចេតនាបង្ខូចកេរ្តិ៍ឈ្មោះរបស់លោកប៉ុណ្ណោះ។ សូមបញ្ជាក់ដែរថាក្រោយពីមានពាក្យបណ្តឹងនេះ ស្នងការរងនគរបាលខេត្តកណ្តាលចំនួន៦រូប កត្រូវបានហៅឲ្យចូលបំភ្លឺនៅក្រសួងមហាផ្ទៃផងដែរដើម្បីបំភ្លឺ ជុំវិញបណ្តឹងខាងលើហើយក៏ស្ងាត់ឈឹងទៅ។ទើបតែថ្មីៗក៏លេចចេញត្រឹមសម្តេចក្រឡាហោយចេញលិខិតព្រមានសើៗតែប៉ុណ្ណោះ!។