ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា និងលោក ម៉ៃទ្រីប៉ាឡា ស្រ៊ីសេនា (MaithripalaSirisena) ប្រធានាធិបតីស្រីលង្កា នារសៀលថ្ងៃទី៨ ខែសីហា ឆ្នាំ២០១៩នេះបានធ្វើជាអធិបតីភាព ក្នុងពិធីចុះហត្ថលេខា លើឯកសារកិច្ចសហប្រតិបត្តិការរួមគ្នាចំនួន២រួមមាន ៖ អនុស្សរណៈនៃការយោគយល់គ្នាស្តីពីកិច្ចពិគ្រោះយោបល់រវាង ក្រសួងការបរទេសនៃប្រទេសទាំងពីរ និងអនុស្សរណៈនៃការយោគយល់គ្នា រវាងសភាពាណិជ្ជកម្មកម្ពុជា និងសភាពាណិជ្ជកម្មក្រុងកូឡំបូ ។
លោក អ៊ាង សុផល្លែត ជំនួយការសម្តេចតេជោ បានប្រាប់ក្រុមអ្នកសារព័ត៌មានថា សម្តេចតេជោ និងលោក ម៉ៃទ្រីប៉ាឡា ស្រ៊ីសេនា បានជួបពិភាក្សាទ្វេភាគីផងដែរ។ ក្នុងជំនួបនោះ ប្រធានាធិបតីស្រីលង្កា បានស្នើឲ្យនាយករដ្ឋមន្ត្រីកម្ពុជា ពង្រឹងចំណងមិត្តភាពរវាងប្រទេសទាំង២លើវិស័យអប់រំ វប្បធម៌ ទេសចរណ៍ ពាណិជ្ជកម្ម អាកាសចរណ៍ស៊ីវិល ពិសេសទៀតជំរុញឲ្យមានការ ហោះហើរត្រង់ពីកម្ពុជាទៅស្រីលង្កាថែមទៀត។
សម្តេចតេជោ បានយល់ស្របទាំងស្រុងចំពោះការលើកឡើងរបស់ប្រធានាធិបតីស្រីលង្កា ។ ទន្ទឹងនឹងនេះ សម្តេចបន្តថា កម្ពុជា-ស្រីលង្កានាពេលកន្លងមកបានរក្សានូវទំនាក់ទំនងការទូតបានយ៉ាងល្អប្រសើរ។ សម្តេចបានអះអាងថាតាមរយៈទស្សនកិច្ចផ្លូវដ្ឋនេះ គឺនឹងពង្រឹងបាននូវចំណងមិត្តភាព និងកិច្ចសហប្រតិបត្តិការរវាងប្រទេសទាំង២កាន់តែរឹងមាំល្អប្រសើរថែមទៀត ។
លោក ម៉ៃទ្រីប៉ាឡា ស្រ៊ីសេនា (MaithripalaSirisena) ប្រធានាធិបតីស្រីលង្កា បានមកដល់កម្ពុជា នៅម៉ោងប្រមាណ ជា១១ព្រឹកថ្ងៃទី៧ ខែសីហា ឆ្នាំ២០១៩ ដើម្បីបំពេញទស្សនកិច្ចចាប់ពីថ្ងៃទី៧-១០សីហា តបតាមការអញ្ជើញរបស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ។លោកប្រធានាធិបតី បានចូលគាល់ព្រះមហាក្សត្រ ។ ចូលរួមដាំដើមឈើតំណាងប្រទេសស្រីលង្កាចំនួន១០ដើម នៅមជ្ឈមណ្ឌលវិបស្សនាភ្នំឧត្តុង្គ ។ បន្តមកលោក ម៉ៃទ្រីប៉ាឡា ស្រ៊ីសេនា និងសមាជិកគណៈប្រតិភូ ក៏នឹងទស្សនាប្រាសាទនានា នៅខេត្តសៀមរាបផងដែរ៕
