បន្ទាយមានជ័យ ៖ ប្រជាពលរដ្ឋនៅក្រុងប៉ោយប៉ែតមានក្តីកង្វល់យ៉ាងខ្លាំងដោយសារមានសកម្មភាពលួចបានកើតឡើងក្នុងមូលដ្ឋានគួរឲ្យព្រួយបារម្ភ ទន្ទឹមនិងបនល្បែងស៊ីសងខុសច្បាប់បានកកើតមានយ៉ាងគំហុកនៅក្នុងអាណាចក្រក្រុងប៉ោយប៉ែតក្លាយជាឆ្នាងបាយសមត្តកិច្ច ។
ករណីយ៍កើតបនល្បែងនេះមានសេចក្តីរាយការណ៍មួយបានឲ្យដឹងមកថា មានលោក មេបញ្ជាការរងកងរាជអាវុធហត្ថ ខេត្តបន្ទាយមានជ័យម្នាក់ពាក់សក្តិ៥ឈ្មោះវណ្ណ:លីហោដែលជាអ្នកមើលកការខុសត្រូវបនល្បែងសង្វៀនភ្នាល់ជលមាន់មួយជ្រកក្រោមស្លាបកាស៊ីណូ របស់ឧកញ៉ា កុកអាន ស្ថិតក្នុងភូមិក្បាលស្ពាន១សង្កាត់និងក្រុងប៉ោយប៉ែត តែងតែដើរអួតអាងថា គេមានស្រឡាយជាមួយអ្នកធំម្នាក់នៅគៀកនិងលោក នាយករដ្ឋមន្ត្រីទៀតផង?! ។ ក្រៅពីបនល្បែងបញ្ជល់មាន់ចាក់លុយនៅទីតាំងកាស៊ីណូខាងលើនោះប៉េអឹមរូបនេះក៏មានហ៊ុនល្បែងស៊ីសងមួយទីតាំងទៀតនៅ ក្បាលស្ពាន៣ក្បែរស៊ុបប្រហិតត្រីក្រុងប៉ោយប៉ែត ។
បើតាមអ្នកញៀនល្បែង ទីតាំងបនល្បែងដែលកាងដោយលោកមេបញ្ជាការរងកងរាជអាវុធហត្ថ ឈ្មោះ វណ្ណ លីហោ បើកឲ្យពលរដ្ឋខ្មែរចូលលេងភ្នាល់យ៉ាងអាណាធិបតេយ្យ គ្មានសមត្ថកិច្ចណាហ៊ានក្អកជាមួយរូបនោះទេ ។ ភាពល្បីល្បាញ និងអំណាចរបស់លោកប៉េអឹមកាងល្បែងស៊ីសង បង្កឲ្យមានមជ្ឈដ្ឋានពលរដ្ឋ រិះគន់យ៉ាងខ្លាំង ចំពោះអាជ្ញាធររាជរដ្ឋាភិបាល ដែលមានបុគ្គល វណ្ណៈលីហោប្រើស្បែកប៉េអឹម ពាក់សំញែងបន្លាចមហាជន ។ពលរដ្ឋបន្តថា បនល្បែងដែលកាងដោយមន្ត្រីប៉េអឹមនោះតែងបង្កជម្លោះ វៃតប់គ្នាញឹកញាប់ធើ្វសង្គមកើតអសន្តិសុខ ។
ពលរដ្ឋថា ឆ្ងល់ថាតើលោកនាយឧត្តមសេនីយ៍ សៅ សុខា មេបញ្ជាការរងកងយោធពលខេមរភូមិន្ទនិងជាមេបញ្ជាការកងរាជអាវុធហត្ថលើផ្ទៃប្រទេសដឹងរឿងលោក វណ្ណៈលីហោប្រើអំណាចរដ្ឋបំរើផលប្រយោជន៍ឈ្មួញបង្កឲ្យខូចសណ្តាប់ធ្នាប់ គោលនយោបាយភូមិឃុំមានសុវត្ថិភាពដែរទេឬលោករវស់តែចុះបង្ក្រាបបទល្មើសព្រៃឈើភ្លេចមើលកូនចៅទៅហើយ!? ។
មិនអាចទាក់ទងលោកវណ្ណៈលីហោមេបញ្ជាការរងកងរាជអាវុធហត្ថ ខេត្តបន្ទាយមានជ័យអំពីមូលហេតុលោកទៅការពារបនល្បែងភ្នាល់ជល់មាន់បានទេ!។