បន្ទាប់ពីមានបាតុភាព រកាំរកូសផ្ទៃក្នុង របស់ក្រុមហ៊ុន WTG ដែលទទួលបានអាជ្ញាប័ណ្ណពីរដ្ឋ ចុះធ្វើអាជីវកម្ម ជីកចូកដីថ្មគ្រួសក្រហម នៅចំណុចភ្នំព្រះ ក្នុងឃុំទឹកហូត ស្រុករលាប្អៀរ ខេត្តកំពង់ឆ្នាំង រហូតបែកធ្លាយ នូវរឿងរ៉ាវ ចេញពីដៃគូភាគហ៊ុនជាមួយគ្នា ហើយត្រូវបាន គេហទំព័រសារព័ត៌មាន ខ្លះដកស្រង់ ប្រភពមកចុះផ្សាយ ចោទប្រកាន់ថា លោក ពៅ ស៊ឹង បានលួចយក អាជ្ញាប័ណ្ណរបស់ក្រុមហ៊ុន WTG មករកស៊ី ចូលកដីគ្រួសក្រហម នៅចំណុចខាងលើនោះ ត្រូវបាលោក ពៅ ស៊ឹង បដិសេធថា ជារឿងមិនពិតទេ ។
ជួបបំភ្លឺតាមទូរស័ព្ទកាលពីព្រឹកថ្ងៃទី ២៨ ខែមករា ឆ្នាំ២០១៤ លោក ពៅ ស៊ឹង បានផ្តល់បទ សម្ភាសន៍ដល់និពន្ធនាយក កាសែតដំណឹងភ្នំពេញ ដោយបានបញ្ជាក់ថា ព័ត៌មានដែលគេ បានផ្សាយនោះ គឺមិនមែនជាការពិតទេ ព្រោះក្រុមហ៊ុន WTG គឺជារបស់លោកស្រី សុខ ចេង ជាអគ្គនាយិកាក្រុមហ៊ុន ពុំមែនជារបស់លោកទេ ។ ប៉ុន្តែដោយអ្នកស្រី សុខ ចេង ជាភរិយារបស់លោក ហើយពុំសូវបានចុះមើលការងារនៅការដ្ឋានជីកដីនោះ ជាប់លាប់ ទើបខ្ញុំ (ពៅ ស៊ឹង)បានហៅលោក ស្រេង លាងហេង ឱ្យមកចូលហ៊ុនរកស៊ីជាមួយគ្នា ព្រោះគាត់មានពេលច្រើនចុះជាប់នៅការដ្ឋានផ្ទាល់ ។
លោក ពៅ ស៊ឹង បន្តទៀតថា ដោយសារខ្ញុំនិ់ងលោក ស្រេង លាងហេង ជាមិត្តភ័ក្តរាប់អានស្រឡាញ់ គ្នាក៏ទុកចិត្តហៅឱ្យចូលហ៊ុនរកស៊ីជាមួយប្រពន្ធគាត់ដោយចេញដើមទុន ពាក់កណ្តាលម្នាក់ ។ ប៉ុន្តែ (កិច្ចសន្យាដើមទុនរបស់លោក ស្រេង លាងហេង សុំលាក់ទុកសិន)ព្រោះលោកយល់ថា រវាងខ្ញុំ (ពៅ ស៊ឹង) និងលោក ស្រេង លាងហេង ពុំដែលមានទំនាស់ឈ្លោះប្រកែកគ្នាអ្វីនោះទេ ។ ប៉ុន្តែមិនដឹងមូលហេតុអ្វីស្រាប់តែនៅ សុខៗក៏លេចឮរឿងរ៉ាវថា ក្រុមហ៊ុនមានបញ្ហាទំនាស់ផ្ទៃក្នុងបែបនេះទៅវិញ ? ។
លោក ពៅ ស៊ឹង បន្ថែមទៀតថា ការចូកយកដីគ្រួសក្រហមដឹកតាមសាឡង់ឆ្លងកាត់ខេត្តកំពង់ឆ្នាំង ទៅស្រុកស្អាង ខេត្តកណ្តាលនោះក៏ខាងក្រុមហ៊ុនសុទ្ធតែបានសុំច្បាប់អនុញ្ញាតត្រឹមត្រូវ ។ មកដល់ពេលនេះខាងក្រុមហ៊ុន WTG បានចុះមើលការខុសត្រូវលើការដ្ឋានជីកដីដោយខ្លួនឯង ព្រោះលោក ស្រេង លាងហេង បោះបង់ចោលការងារ ។ ចំណែកឯផ្លូវថ្នល់ក្នុងខេត្តវិញដែលរងការខូចខាតដោយសារឡានដឹកថ្ម នាពេលកន្លងមកក៏ខាងក្រុមហ៊ុនបានជួសជុលឡើងវិញ សឹងតែទាំងស្រុងនៅតែការចាក់ក្រាលកៅស៊ូនៅពេលខាង មុខនោះទេ ។
លើសពីនេះទៀតផ្លូវចូលទៅតំបន់ភ្នំព្រះ ចម្ងាយប្រមាណ ៩គីឡូម៉ែត្រពីផ្លូវជាតិលេខ ៥ ក៏បានធ្វើការ ស្ថាបនាយ៉ាងល្អ និងធំទូលាយដើម្បីងាយស្រួលដល់ការធ្វើដំណើររបស់ប្រជាពលរដ្ឋផងដែរ ។ លោកបន្តទៀតថា ខាងក្រុមហ៊ុន WTG មិនដែលធ្វើសកម្មភាពអាជីវកម្មរបស់ខ្លួនដោយមិនគិតពីផលប្រយោជន៍ជាតិ និងប្រជាពលរដ្ឋនោះទេ គឺបានធ្វើឡើងទៅតាមការកំណត់របស់អាជ្ញាធរខេត្ត និងមន្ទីរជំនាញច្បាស់លាស់ ។ សូម្បីតែកាលពីលើកមុន ខាងអាជ្ញាធរសមត្ថកិច្ចបានចាប់ឃាត់រថយន្តដឹកថ្មរបស់ក្រុមហ៊ុនដែលដឹកលើសចំណុះ ក៏ខាងក្រុមហ៊ុនបានចូលបង់ ផាកពិន័យចូលរដ្ឋទៅតាមច្បាប់ដែរ ។ អ្វីដែលធ្វើឱ្យលោកចង់អស់សំណើចថែមទៀតនោះ គឺគេថាលោកប្រើប្រាស់ ឬតាំងខ្លួនជាឧកញ៉ាថៅកែកោះពេជ្រនោះ គឺកាន់តែខុសការពិតទាំងស្រុងតែម្តង ។ ប៉ុន្តែទោះជាបែបនេះក្តីក៏លោក ពៅ ស៊ឹង បានប្រាប់ថា រូបលោកផ្ទាល់មិនប្រឡូកប្រឡាក់ក្នុងករណីនេះទេ លោករវល់តែការងារធ្វើបុណ្យទាន ប្រសើរជាងហើយក៏មិនចង់វែងឆ្ងាយ និងតបតអ្វីជាមួយព័ត៌មានដែលបានលេចឮនោះឡើយ សូមទុកឱ្យអ្នកអានពិចារណា និងអស់លោកអាជ្ញាធរពាក់ព័ន្ធពិនិត្យមើលជាក់ស្តែងចុះ ។
ជុំវិញការបកស្រាយបំភ្លឺរបស់លោក ពៅ ស៊ឹង ជុំវញបញ្ហាខាងលើនេះ សារព័ត៌មាន ដឹងភ្នំពេញ មិនទាន់ អាចស្វែងរកការពន្យល់បំភ្លឺពីភាគីលោក ស្រេង លាងហេង បាននៅឡើយទេ ៕
