ខេត្តរតនគិរី៖នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាអាវុធហត្ថលើផ្ទៃប្រទេសនិងជាប្រធានគណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ នាព្រឹកថ្ងៃទី០៨ខែសីហាឆ្នាំ២០១៩បានដឹកនាំកិច្ចប្រជុំត្រួតពិនិត្យការងារទប់ស្កាត់និងបង្ក្រាបបទល្មើសធនធានធម្មជាតិក្នុងខេត្តរតនគិរី។
កិច្ចប្រជុំមានការចូលរួមពីសំណាក់ឯកឧត្តម ថង សាវុន អភិបាលខេត្ត និងចូលរួមពីអន្តរក្រសួង ព្រមទាំងអង្គភាពពាក់ព័ន្ធក្នុងខេត្ត ។
នាយឧត្តមសេនីយ៍ សៅ សុខា មានប្រសាសន៍ថា ការប្រជុំលើកនេះសំខាន់ គឺស្តាប់របាយការណ៍ របស់ក្រុមការងាររបស់គណៈកម្មាជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ ដែលបានធ្វើប្រតិបត្តិការ ជាមួយនឹងគណៈកម្មការ ក៏ដូចជា ស្ថានប័ន អាជ្ញាធរនិងសមត្ថកិច្ចនានានៅខេត្ត។
ឯកឧត្តម មាន ប្រសាសន៍បន្តទៀតថា ក្រុមហ៊ុនដែលបានទទួលសិទិ្ធដីសម្បទានពីរាជរដ្ឋាភិបាលក្នុងការវិនិយោគស្របច្បាប់ប៉ុន្តែធ្វើសកម្មភាពមិនស្របច្បាប់ ដែលនាំឲ្យមានបទល្មើសធនធានធម្មជាតិហើយបើតាមរបាយការណ៍របស់ក្រុមការងាររបស់គណៈកម្មាជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ មានបីចំនុចសំខាន់, ទី១៖ ទីតាំង ភូមិសាស្ថ្រ កន្លែងដែលក្រុមហ៊ុនវិនិយោគ កន្លែងអភិរក្ស និងអភិវឌ្ឍន៍ រវាងកសិកម្ម និងបរិស្ថានមានចំនុចខ្លះមិនទាន់ឯកភាពគ្នា, ទី២៖ ពាក់ព័ន្ធនឹងការជ្រកក្រោមលេសឬស្លាកសញ្ញា ក្នុងនោះមានភាពស្របច្បាប់របស់ក្រុមហ៊ុន កាប់ឈើកន្លែងផ្សេងអូសចូលក្រុមហ៊ុនដើម្បីផលិតចេញជាឈើស្របច្បាប់ ការយកស្លាក សញ្ញាក្រសួងស្ថាប័នរបស់រដ្ឋដើម្បីជ្រកពួនគេចវេស, ទី៣៖ ការបង្កើតឲ្យមានភាពស្របច្បាប់ការចេញឯកសារបំពានជាដើម។
នាយឧត្តមសេនីយ៍សៅ សុខាបានបញ្ជាក់ថាការងារបន្តសុំឲ្យអប់រំផ្សព្វផ្សាយច្បាប់ដល់មន្ត្រីក្រោមឱវាទ សុំពង្រឹងជំនាញបរិស្ថានរដ្ឋបាល ព្រៃឈេីដោយធ្វេីការទប់ស្កាត់បង្ក្រាបបទល្មេីសព្រៃឈេី ពេលមានកិច្ចប្រជំុសុំដាក់ខ្លឹមសារអំពីព្រៃឈេីធ្វេីជាការពិភាក្សាដាក់ចេញទិសដៅបន្តនិងត្រូវគ្រប់គ្រងមន្ត្រីរបស់ខ្លួនឲ្យបានខ្ជាប់ខ្ជួនត្រូវធ្វេីជាគំរូ៕
ដោយ៖ចាបសំអាន